Doitasun handiko makinak
Arabako Zayer enpresak Berrikuntza saria jaso du azken Biurtekoan, milioi bat euro balio duen funtzio anitzeko makina sofistikatu bategatik
Zayer enpresak duela 61 urtetik ekoizten ditu neurri handiko makinak, sektoreak bizi duen erritmo eta kemen berdinarekin. Sektoreko erreferente kontrastatu bat dela argi geratu da Makina-erremintaren Biurtekoaren hogeita hamargarren edizioan. Barakaldoko BEC-en ospatutako azoka horretan, sektorearen Estatuko bilgune garrantzitsuenean, Zayer enpresa arabarra berriro protagonista bilakatu zen, makina-erreminta arloko Berrikuntza saria jaso zuelako fresaketa-torneaketako funtzio anitzeko bere mekanizazio-zentroarekin, puntako teknologiako tresna bat milioi bat euro inguru balio duena eta liluraturik utzi zituena epaimahaiko hamaika adituak.
Zayer enpresa 1957an hasi zen fresatzeko makina txikiak, artezteko makinak eta tornuak egiten, denak ere gero eta sofistikatuagoak, harik eta denborarekin nazioarteko marka ospetsu bihurtu den arte. Gaur egun 200 langile ditu Betoñoko industrialdeko bere kuartel generalean, eta munduko herrialde garrantzitsuenetara esportatzen ditu bere makinak. Zayer-eko zuzendari teknikoak, Luis Callejak, enpresaren gakoak azaltzen dizkigu.
Zer ikusi zuen epaimahaiak zuen makinan?
Hainbat alderdi baloratu zituen: %50, berrikuntza; %25, makinaren diseinu estetikoa; eta gainerakoa beste kontu batzuk, hala nola ergonomia, segurtasuna eta jasangarritasuna. Badirudi hortxe lortu genituela puntuazio onenak. Sari honek ikaragarri animatzen gaitu eta bultzada moral handia ematen digu aurrera jarraitzeko bide beretik.
Nola deskribatu daiteke ARION G izeneko zuen makina hori?
Txirbil-harroketa bidez dabilen makina-erreminta bat da, mekanizazio sektorean ohikoak diren bi prozesu egiteko aukera ematen duena: fresaketa eta torneaketa. Bestela esanda, “bi batera” motako zerbitzu bat eskaintzen dugu, enpresei lehiarako funtsezko abantaila emango diena. Makina honekin lortzen dena da malgutasun gehiago izatea mekanizazio prozesuetan, produktibitatea handitzeko eta, batez ere, doitasuna bermatzeko pieza batean, posible izango delako makina berean aritzea lanean, hasieratik bukaeraraino, pieza makinatik kendu behar izan gabe, kentzen denean normalean handitu egiten baita desdoiketa arriskua.
Nori interesatzen zaizkio zuek Gasteizen diseinatu eta egiten dituzuen honelako makinak?
Fresaketa eta torneaketako mekanizazio prozesuekin sektore askotako piezak landu daitezke, baina nola gure makinak bi metro diametroko plater bat daukan hamar tonarainoko piezak moldatzeko gauza dena, aurkeztu dugun makina sektore aeronautikora dago zuzendua gehienbat.
Oker al gaude esaten badugu Airbus edo Boeing bezalako fabrikatzaile bati saltzen zaion Rolls Royce turbina batean aurki daitezkeen piezen moldaketaren zati bat zuen makina bati esker izan dela posible?
Ez, ez, halaxe da, gure zorionerako. Horrelako bezeroekin lan egiteak egundoko exijentzia maila ezartzen digu egunero.
2010ean zuen instalazioak handitu zenituzten euren gaitasuna emendatzeko eta garabi bat sartu zenuten makina handiagoak egiteko. Nolako tamainez ari gara?
Biurtekora eraman dugun makina txikienetako bat da. Prestatuta gaude askoz makina handiagoak egiteko, hamahiru metroko altuera izan dezaketenak eta hirurogei tonarainoko piezak mugitzeko gauza direnak. Hori guztia, gainera, muntaketa-pabiloi girotu batean, bezeroentzako produktuen azken harrera ingurune kontrolatu batean egiteko modua eskaintzen diguna.
Zer balio dezake merkatuan Biurtekoan aurkeztu duzuen bezalako makina batek?
Kostuak ezberdinak dira bezero bakoitzaren beharren arabera eta makina bakoitzak dituen osagarrien arabera, baina BECen erakutsi genuenak milioi eurotik gora balio du. Makina oso azkarrak dira eta sinestezineko teknologia dutenak, informazio mordo bat ematen diotena hala bezeroari nola fabrikatzaileari.
Makina horiek zerikusi gutxi izango dute noski zuk 1984an, enpresara sartu zinenean, erabiltzen zenituen haiekin…
Bai horixe, ez dute batere zerikusirik. Bilakaera izugarria izan dute, batez ere alde mekanikoan, ikaragarri sinplifikatu baita. Bestalde, alde elektronikoak funtzionalitate handia ematen die egungo makinei, eta horren ondorioz azkenean ekipoak askoz ere produktiboagoak dira.
Lotutako albisteak
Aracel proiektuak irtenbide berriak garatu ditu eraikuntzan energia-mendekotasuna murrizteko
Belako Lanak buru duela, karbono-aztarna baxuko mortero bat eta isolamendurako eko-panelak diseinatu ditu, SATE sistema batean integratzeko. SPRI Taldearen Hazitek laguntza-programaren babesa izan du.
Makegik retrofitting industrialaren aldeko apustua egin du, nazioarteko hedapenerako bide gisa
Makina-erreminten eguneratzean espezializatutako enpresa gipuzkoarra merkatu aeroespazialean oinarritutako lan-ildo berriak garatzen ari da.
HIMUGI proiektuak mugikortasunean eta garraioan aplikazioak dituen hidrogeno-propultsio sistema bat lortu nahi du
Euskal erakundeen arteko partaidetza eta lankidetza handia du, eta SPRIren Hazitek programaren laguntza ekonomikoa jaso du.
Ceit zentro teknologikoak 300 enplegu baino gehiago sortzen dituzten 20 spin-off sustatu ditu eta 30 M € inguruko inbertsioa ekarri dute
Mikel Jauregi sailburuak Ceit bisitatu du, ikerketa aplikatuko eta teknologia enpresara transferitzeko erreferentziazko zentro teknologikoa
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Jon Ander Egaña: “BASQUE FOOD CLUSTERrek elikadura euskal industriaren sektore estrategiko gisa kokatzea lortu du”
Elikatze-katearen euskal elkartea 150 enpresa eta erakunde baino gehiagoren lehiakortasuna hobetzeko lanean ari da, berrikuntzaren garapenarekin, lankidetza-proiektuekin eta teknologien integrazioarekin.
Siteco, 30 urte automatikoki ordaintzeko makinak ekoizten
Arabako enpresak administrazio publikoarekin eta ostalaritza sektorearekin egiten du lan, eta urteak daramatza nazioarteko merkatuan.
Mecanizados Patro enpresak “fidagarritasuna, segurtasuna eta eraginkortasuna” eskaintzen ditu trenbide-sektorean
Serie laburretarako eta luzeetarako pieza espezifikoak fabrikatzen ditu enpresa arabarrak, doitasun handiko lan-tresna eta makinekin.