Ludus-ek Europako proiektu batean parte hartzen du ingurune birtual naturalago eta murgilgarriagoak sortzeko

Ludus, enpresa bilbotarra, segurtasun eta osasun arloko prestatzaileen lana indartzeko, errealitate birtualean (VR) oinarritutako prestakuntza-irtenbideetan espezializatutako LUMINOUS proiektuan parte hartzen du. Proiektu europar honek, pertsonen eta ingurune birtualen arteko interakzio-modua eraldatzea du helburu. Europako Batzordeak Horizon Europe programaren bidez finantzatutako ekimen honek helburu du adimen artifizialeko abatar adimendunak garatzea, XR (Errealitate Hedatua) inguruneetan komunikazioa eta esperientzia hobetzeko. 

Proiektuak aurrerapauso garrantzitsu bat planteatzen du arlo honetan: adimen artifizial aurreratua eta hizkuntza naturalaren prozesamendua integratzea, erabiltzaileek ahotsa eta gorputz-hizkuntza erabiliz ingurune birtualekin modu arinago eta naturalagoan elkarreragiteko. Abatarrek erantzun errealistak emango dituzte, testuingurura egokitutako aurpegi-adierazpen eta portaera moldakorrekin. 

Ludus-ek teknologia hori bere laneko arriskuen prebentziorako prestakuntza plataforman baliozkotzeaz arduratuko da. Ingurune horretan, abatarrek entrenatzaile pertsonal gisa jardungo dute, erabiltzaileei ahozko jarraibideen bidez gidatuz eta denbora errealeko ‘feedback’-a eskainiz. Sistema barneko eta kanpoko erabiltzaileekin egingo den programa pilotu batean probatuko da, behin betiko ezarpena egin aurretik funtzionamendua hobetu ahal izateko. 

LUMINOUS partzuergoa Adimen Artifizialaren Ikerketarako Alemaniako Zentroak (DFKI) koordinatzen du, eta erreferentziazko 12 erakunde europarrek parte hartzen dute, hala nola Fraunhofer HHI, Ricoh, Vicomtech eta hainbat unibertsitatek, EHU barne. Lankidetza honek, Ludus teknologia-garapenaren lehen lerroan kokatzen du Europan, XR eta prestakuntza aurreratuaren arloan. 

Proiektu honen parte hartzea, Ludus-en estrategiekin erabat bat dator: laneko segurtasuna eta industria-prozesuen eraginkortasuna hobetuko dituzten ikaskuntza-esperientzia eraginkorrago eta pertsonalizatuagoak sortzea. 

SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.   

SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.