Albisteak 14 Marzo, 2025

IndeusBerri: Industria eta Euskararen plaza

Gaur albiste dira INDEUSen Batzar Orokorra, ARTEZek garatutako gunea, Instagram II ikastaroa eta 'Geruza digitala' Industria Berriaren hiztegian.

Euskara Sarean: ARTEZek garatutako gunea euskara erabiltzen laguntzeko baliabideak biltzen dituena. Sarean dauden euskara erabiltzen laguntzeko baliabideak webgune bakar batean bildu ditu ARTEZ euskara zerbitzuak eskaintzen dituen konpainiak. Espazio honen helburu nagusia euskara erabiltzeko baliabide terminologikoak eskuragarri jartzea da, hizkuntzarekin lan egiten duten profesionalentzat zein erabiltzaile orokorrentzat. Guneak sei atal ditu: Hiztegiak, Kontsultak, Gaika, Itzultzaile Automatikoak, Hizkuntzaren Teknologia eta Euskal Ondarea. Atal bakoitzak berari dagokion edukia gordetzen du, adibidez Gaikako atalaren barruan Sektorekako hiztegiak jasota daude, besteak beste Industria Berriaren Spri Hiztegia.

ALBERDI MEKANIZATUAK, BIOLAN eta MITXELENA Kooperatibak bat egin dute INDEUS Industriaren Euskal Plataformarekin. Urteko lehen bilera egin dute Indeus sustatzen duten erakunde publikoek eta Indeuskide diren enpresa, zentro teknologiko eta elkarteek Euskadiko Parke Teknologikoaren Abantoko campusean, Aitor Aldasororen (Eusko Jaurlaritzako Hizkuntza Politikarako Sailburua), Sonia Rodriguezen (Hizkuntza Ikerketa eta Koordinaziorako zuzendaria), eta Mikel Amundarainen (Energiaren Euskal Erakundeko zuzendari nagusia) gidaritzapean. Azken hilabeteetan hiru enpresa berri batu dira Industriaren Euskal Plataformara eta gaurkoan euren burua aurkeztu dute Indeuskideen aurrean: Alberdi Mekanizatuak, Biolan eta Mitxelena kooperatiba.

INSTAGRAM II: Estrategia soziala eta bisuala zure negozioa sustatzeko onlineko ikastaroa datorren martxoaren 24an. Instagram I ikastaroaren jarraipena, Instagramek enpresetarako duen profilaren kudeaketan oinarrituta. Ikastaroan erabilera eta nobedade guztiak landuko ditugu, horien artean egonik Instagram Stories eta sare sozial horren azken eguneraketak, gure marka edo negozioari nabarmentasun handiagoa emateko. Ikastaro osoak lau orduko iraupena izango du; hortaz, bi ikastaroetan (lehenengo zatia eta bigarren zatia) eman beharko da izena ikuspegi orokorragoa lortzeko, bigarrena lehenengoaren jarraipena baita. Interneten eta bere tresnen erabilera erraz eta dohainik ikasi nahi duten mikro-enpresei edo autonomoei zuzendutako ikastaroa.

“Geruza digital” Industria Berriaren Spri Hiztegian. Negozio fisiko bati ezartzen zaion osagarri analogikoa. Negozio hori ez du produktu edo zerbitzu digital batek ordezkatuko, baizik eta bere horretan mantenduko du. Geruza digital hori beharrezkoa da markak egungo denboratara egokitzeko, sarean dauden tresnak erabiliz eta negozioa birdefinitu, ikuspegia/misioa aldatu, produktuak birmoldatu eta berriak sortuz. Geruza digitala gehitzean litekeena da negozio-ereduak aldaketak pairatzea eta etekinei eta efizientziari esker dagokion merkatua handitzea, baina oinarrizko elementu fisikoak ez dira aldatzen.Honen adibide bat Skype da: telefonoa ordezkatzen duen komunikaziorako software bat da, hots, deiak egiteko aukera ematen duena.