Euskarazko txatbot publikoak hobetzeko laguntza deia egin du HiTZ zentroak.
HiTZ, Hizkuntza Teknologiako Euskal Zentroak dei bat egin du euskarazko txatbot publikoak hobetzeko laguntza eskatuz Txatbot ebaluatorioaren bidez. Ekarpena egiteko bidea oso erraza da: estekan klikatu, erregistratu, sartu, galdetu eta erantzun hoberena aukeratu. Erraza eta dibertigarria, lehiaketa eta sariak daude! HiTZen hainbat txatbot lehian jarri ditu, hipotesi zientifikoak baieztatzeko asmoz. Denetarik dago, txatbot onak, oso onak eta txarrak ere. Otsailaren 17ra arteko epea dago ariketan parte hartzeko eta zentroak erronka bat ere ezarri du: baietz 20 mila erantzun lortu!
218 saltokik bat egin dute Elhuyarrek sustatutako “Otsailaren 11 erakusleihoak” ekimenarekin.
Emakume eta Neska Zientzialarien Nazioarteko Eguna izango da otsailaren 11n. Egun horretarako, bosgarren urtez, “Otsailaren 11 erakusleihoak” ekimena jarri du martxan Elhuyarrek, eta Abanto-Zierbena, Arrasate, Arrigorriaga, Barakaldo, Bilbo, Durango, Elgoibar eta Irurako 218 saltokik hartuko dute parte, otsailaren 3tik 11ra. Establezimendu bakoitzak emakume zientzialari bati eskainiko dio erakusleihoa. Zientzialariarekin lotutako ilustrazioak eta informazioa biltzen duten horma-irudiak jarriko dituzte dendan, eta haren ikerketan inspiratuta apainduko dute dendako erakusleihoa.
Jendaurrean.eus erakundeek euskaraz komunikatzeko gidaren online aurkezpena.
Erakundeek komunikazio publikoa modu erosoan eta eraginkorrean egiteko, ezinbestekoa da hizkuntzak egoki kudeatzea. Gure testuinguruan, horrek barne hartzen du euskarari dagokion tokia ematea enpresen, administrazio publikoen, kultur eragileen, kirol taldeen eta denetariko elkarteen komunikazioan. Erakunde horietako arduradunek, komunikazio arloko profesionalek, eledunek eta euskara-teknikariek hamaika erronka eta zalantza aurkitzen dituzte. Zer egin sare sozialetan? Nola prestatu eledunak? Nola kudeatu hizkuntzak ekitaldi handietan? Zein irizpide erabili hedabideekin? Gida hau erantzunak bilatzen laguntzeko tresna da.
“Datu-bilketa” Industria Berriaren Spri Hiztegian.
Sistema jakin baten aldagai espezifikoei buruzko informazioa biltzeko eta neurtzeko prozesua, gero sistemari buruzko galderei erantzuteko eta emaitzak ebaluatzeko aukera ematen duena. Datu-bilketa arlo guztietako ikerketen osagaia da, eta, metodoak diziplinaren arabera aldatzen badira ere, denetan du garrantzia bilketa zehatz eta zintzoa bermatzeak. Datu-bilketa ororen helburua da kalitateko ebidentziak jasotzea, horrek bermatuko baitu datuak aztertzean ikerketaren hasieran planteatutako galderei lotutako erantzun sinesgarriak formulatzea.
