Lehiakortasun industrialean emakumeek duten inpaktu positiboari buruzko emaitzak aurkeztu ditu SPRIk Milanen egin den World Manufacturing Forumen
Aste honetan World Manufacturing Foundationek (WMF) Milanen (Italia) antolatu duen World Manufacturing Forum foroaren baitan, Cristina Oyónek, SPRIko Teknologia, Berrikuntza eta Jasangarritasun arloko zuzendariak, lehiakortasun industrialean emakumeek duten inpaktuari eta industria emakumeentzat erakargarri bihurtzeko beharrari buruzko aurrerapenak aurkeztu ditu.
B·WOMENIN Industry
2020az geroztik, SPRIk Women in Manufacturing aditu-taldea gidatzen du Back to the Future proiektuaren barruan. Egoitza Milanen duen World Manufacturing Foundation erakundeak sustatzen duen ekimen horren helburua da mundu osoan kultura industriala zabaltzea. SPRIren baitan, ekimena B·WOMENIN Industry estrategiaren parte da.
2023an, ia 500 industria-enpresen eta horiei lotutako zerbitzuak eskaintzen dituzten enpresen datuekin egindako azterlanari esker, frogatu ahal izan zen genero-berdintasun handiagoa duten enpresak lehiakorragoak direla eta emaitza hobeak lortzen dituztela fakturazioa, enplegua, I+G+b jarduera eta nazioartekotzea handitzeari dagokionez. Hala, Sprik jardunbide egokiak identifikatzeko lana egin du azterlanean berdintasunari eta lehiakortasunari dagokienez goiko postuetan geratu ziren Euskadiko enpresen artean.
Cristina Oyónek, egindako aurkezpenean, honako enpresa hauen jardunbide egokiak azpimarratu nahi izan ditu: Arania, EIKA, Engranajes Juaristi, Fagor Automotion, Glual, P4Q, Sidenor eta SVE. Horien guztien helburua da emakumeek industrian duten presentzia, iraunkortasuna eta promozioa hobetzea eta, horretarako, era askotako ekimenak dituzte abian:
- Neskatilak STEM bokazioetan barneratzea (horretarako, ikastetxeetara, unibertsitate-zentroetara eta lanbide-heziketako zentroetara bisita-programak antolatzen dituzte) eta komunikazio korporatiboetan emakumeak bistaratzea.
- Emakumeen enplegagarritasuna handitzea, hautaketa-prozesuetan emakumeen hautagaitzei arreta berezia eskainiz eta enpresetako sailak orekatzeko helburu zehatzak ezarriz.
- Lan-ingurune ekitatiboa sustatzea, legez ezarritakoez haragoko kontziliazio-neurriak txertatuz eta ergonomia-proiektuak garatuz, emakumeek produkzio-lanpostuetara sarbidea izan dezaten.
- Genero-berdintasunerako planak abiaraztea. Plan horietan oinarrituta, Berdintasun Batzordea eratuko da, eta datuak eta joerak aztertzeko barne-ekimenak eta prestakuntza- eta kontzientziazio-programak garatuko dira.
- Emakumeek erabakiak hartzeko prozesuetan eta zuzendaritza-postuetan partaidetza izatea, enpresetako erabaki-organo gorenetan emakumeen gutxieneko atalaseak gehituz
Ondorio gisa, Cristina Oyónek ideia hau azpimarratu zuen: “gizonek eta gizonentzat diseinatutako industriaren kasuan, funtsezkoa da genero-berdintasunaren alde egiten duten enpresen eredu erreferenteak izatea. Eta ez soilik eskubide kontuagatik, enpresetan lehiakortasuna bermatzeko bidea ere izan beharko luke”.
Hurrengo asteotan, egindako lanen jarraipen gisa, SPRIk hainbat artikulu argitaratuko ditu, eta horietan xehetasun handiagoz jasoko dira elkarrizketa horietan jasotako esperientziak.
Foro honetan izandako partaidetza SPRIk WMFko Women in Facturing talde adituko lider gisa egiten duen lanari atxikita dago. Hainbat espezializazio taldetako 20 pertsonak osatzen dute aipatutako taldea (nazioarteko erakundeak, unibertsitateak, enpresa pribatuak eta administrazio publikoa), eta industriak emakumeen parte-hartzea, aitortza eta lidergoa handiagoak izan daitezen bermatzeko dituen erronka nagusiak aztertzen ditu.
Lotutako albisteak
Gueñeseko Bioekonomia Polo berria abian egongo da 2026aren hasieran, bioteknologian eta ekonomia zirkularrean oinarritutako trakzio-ekimenei harrera egiteko
Otsailean, erabilerarik ez duen 3.157 m²-ko espazio bat leheneratu eta berreraikitzeko lanei ekin die Sprilurrek, Enkarterriko etorkizuneko Bioekonomia Poloa izan dadin.
Argi berdea Smartlog Nest zentroaren eraikuntzari, automatizazio logistikoaren ikerkuntzaren eta prestakuntzaren arloko erreferente bihurtuko du Urretxu
Andoitz Korta Eusko Jaurlaritzako Industria Sustatzeko sailburuordeak eta Jon Luqui Urretxuko alkateak Smartlog zentroaren instalazioak bisitatu dituzte, konpainiaren berrikuntza-proiektuak eta berrikuntza- eta talentu-zentro berria eraikitzeko planak bertarik bertara ezagutze aldera.
Elkartek, industria adimendunean, energia berriztagarrietan eta osasun pertsonalizatuan oinarritutako ikerketa kolaboratiboa
Eusko Jaurlaritzak Elkartek programa ireki du. Horren bidez, 2030eko ZTBPko lehentasun estrategikoekin lotutako ZTBESeko eragileen ikerketa kolaboratiboa bultzatzeko 44 milioi euroko laguntzak bideratuko ditu. Eskaerak martxoaren 7a baino lehen aurkeztu beharko dira.
Eusko Jaurlaritzak eta Santurtziko udalak Santurtziko Etxe Uliko zabortegiaren berroneratzea azkartzeko akordioa sinatu dute
Eremuak dituen 100.000 metro karratu baino gehiago urbanizatu eta zerbitzu-azpiegiturez hornituko dira, ekonomia-jarduerak hartzeko prestatutako enpresa-eremua garatzeko
Argi berdea Sprilurren Pasaiako bulego-eraikinaren ingurua berrurbanizatzeko
Proiektuaren helburu nagusia kalitatezko hiri-espazio berri bat sortzea da, Sprilur Herrera Iparraldean eraikitzen ari den hirugarren sektoreko erabilerako eraikinaren inguruan