Euskadiko Parke Teknologikoa Illunbera zabalduko da Donostiako Udalaren eskutik, enpresa-proiektu estrategikoak posible eginez, hala nola Columbus Venture Partners-ek gidatutakoa
Operazio horri esker, eraikigarritasuna 28.500 m2 baino gehiagotan handitu ahal izango da Parke Teknologikorako, eta berehalako erantzuna eman ahal izango zaie enpresa-proiektu estrategikoei, hala nola Columbusen proiektuari. Horren inguruan, Industria biomedikoaren ikerketa eta garapenerako nazioarteko erreferentzia-puntu gisa Donostia bultzatzen jarraitzeko proposamena ere aurreratu dute gaur.
Euskadiko Parke Teknologikoak eta Donostiako Udalak gaur goizean sinatu dute Illunbeko esparruan b.20.1 partzela erosteko hitzarmena, Donostia Campusa hedatzeko urrats erabakigarria. Akordio horrek amaiera ematen die bi urte baino gehiagoko elkarrizketei. Bi erakundeek hirirako eszenatokirik onena lortzeko lan egin dute, hiri-kokapenaren, azpiegitura eta zerbitzu berrien sorkuntzaren eta ekonomia- eta enpresa-sarearen dinamizazioaren ikuspegitik.
Hitzarmena Eneko Goia alkateak eta Jaione Ganzarain Euskadiko Parke Teknologikoko presidenteak sinatu dute, Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik eta Gipuzkoako Diputatu Nagusi Eider Mendozak ere parte hartu duten ekitaldian. Guztiek adierazi dute akordio horrek “garrantzi handia” duela Donostiarentzat, Gipuzkoarentzat eta Euskal Autonomia Erkidego osoarentzat; izan ere, “proiektu estrategiko berriak erakarriko ditu, beste kokaleku batzuk aukeratu beharrean”.
Euskadiko Parke Teknologikoak erositako partzela Miramongo egungo instalazioen ondoan dago, eta, beraz, Campuseko bilbea modu naturalean zabaltzen lagunduko du. 11.413 m2-ko azalerarekin, partzela berriak 28.587 m2-ko eraikigarritasuna eskaintzen du hirugarren sektoreko erabilerarako eta beste 36.332 m2-ko eraikigarritasuna sestra azpian.
Era berean, Donostiako Campusa Illunbera zabaltzea funtsezkoa izango da egungo instalazioen gainean dagoen presioa arintzeko (gaur egun partzelen eta eraikinen okupazio-maila % 100 ingurukoa da) eta bertan instalatutako eta bertara mugitzeko interesa erakutsi duten enpresen hazkunde-beharrei erantzuteko.
Mikel Jauregi sailburuak azpimarratu duenez, “Parke Teknologikoa Illunbera hedatzeak 2023tik lantzen ari garen proiektu bat burutzea dakar, non erakunde ezberdinen arteko lana funtsezkoa izan den. Pertsonentzat pentsatutako hirigintza-jarduketa integralaz ari gara, eta etorkizuneko industriaren aldeko apustua ere bada. Gaur urrats garrantzitsua emango dugu Donostia biozientzien eta biomedikuntzaren arloko nazioarteko erreferente gisa finkatzeko. Alde horretatik, lankidetza publiko-pribatuaren eredu bat nabarmendu nahi dut, Gipuzkoara enpresa-inbertsioak —Columbusena adibidez— erakartzeko arrakastatsua dela erakutsi duena”.
Bestalde, Donostiako alkate Eneko Goiak adierazi duenez, merkataritza-gune zaharra Euskadiko Parke Teknologikoari saltzea “aspalditik lantzen ari ginen urratsa da”, eta “de facto Parke Teknologikoa handitzea eta enplegu egonkorra eta kalitatezkoa sortuko duten balio erantsi handiko jarduerak ezartzea ekarriko du”. “Illunbeko instalazioa Udalak aspalditik irtenbidea aurkitu nahi zion gaia da, eta orain irekitzen den aukerak abantaila asko eskaintzen ditu aldi berean: Parke Teknologikoari metro karratu asko gehitzen dizkio; horrekin, dagoen eskaera handiari erantzuten zaio, oso hondatuta dagoen eremu bat berriro urbanizatu eta birsortzen da, eta, gainera, bultzatu nahi dugun erabilera anitzeko pabiloiaren proiektuari lotzen zaio”, adierazi du alkateak. Goiaren arabera, “horrek guztiak hiriarentzat interes handiko gune bat sortzea ekarriko du, bertako hiri-bilbean eta eguneroko bizitzan hobeto integratuko dena, eta horrek aukera eta ilusiorako leiho bat irekiko du”.
Gaur egungo testuinguru globalean “beharrezkoa da industria defendatzeko eta lehiakortasuna sustatzeko ahaleginean sakontzea, berrikuntzan eta teknologian osagai handia duten proiektu berriak bultzatuz. Hortaz, Parke Teknologikoa Illunbera zabaltzea albiste bikaina da lurralde osoarentzat”, Gipuzkoako diputatu nagusi Eider Mendozak azpimarratu duenez. “Gure ekonomiaren lehiakortasunerako, beharrezkoa da oso ingurune erakargarri eta berritzaileetan kokatutako espazioak izatea. Gaurko akordioa lehen mailako mugarria izango da zeregin partekatu horretan; izan ere, proiektu berriak erakarriko ditu biozientzien, bioteknologiaren edo kuantikaren sektoreetan; Gipuzkoako Foru Aldundiak bultzatutako arlo horiek kalitatezko enplegua, ongizatea eta aukera berriak sortuko dituzte. Oso mugarri garrantzitsua izango da Gipuzkoa terapia aurreratuen garapenerako gune gisa sendotzeko bidean”, esan du Mendozak, eta Columbus Gipuzkoaren eta Euskal Autonomia Erkidegoaren alde egiten ari den apustua eskertu du.
Columbus Venture Partners-en proiektua
Ildo horretan, azken bi urteotan jorratutako operazioak Columbus Venture Partners-en proposamen berritzaileari ia berehala erantzuteko aukera eman du; konpainia horrek bioteknologian, biozientzietan eta teknologia berrietan erreferentzialtasuna areagotzeko Donostiaren alde apustua egiten jarrai dezan lagunduz.
Columbus Venture Partners-eko sortzaile eta presidente eta Viralgen-eko presidente Javier García Cogorro bera egon da gaur hitzarmena sinatzeko ekitaldian, eta bere proiektu berritzailearen ildo nagusiak aurreratu ditu, Illunbeko Donostiako Campusaren espazio berrian ezartzen denetik mugarri bat izan dadin.
Proiektuak 80 milioi euro inguruko inbertsioa izango du. Horri esker, enpresak ezarri eta hazi ahal izango dira bizitza-zientzien eta teknologia kuantikoen arloan, enpresa-garapenerako eta lankidetzarako ingurune ezin hobean. Proiektua joint venture gisa egingo da Quercus Investments-ekin —higiezinen inbertsioan eta kudeaketan espezializatutako kudeatzailea—, eta Gipuzkoa eta biozientzien sektorea ezagutzen duten inbertitzaile pribatuak izango ditu. Proiektuaren lehen fasea —bertan espazioaren % 40 erabili ahal izango da— 2026aren amaieran egongo da erabilgarri, eta proiektuaren amaiera 2027aren bukaerarako aurreikusten da.
Euskadiko Parke Teknologikoa Gipuzkoan
Illunbeko partzela erosteko hitzarmena Euskadiko Parke Teknologikoaren estrategia globalaren parte da, Gipuzkoan duen presentzia handitu, indartu eta finkatzeko. Izan ere, enpresetan eta proiektu berritzaileetan etengabe ari da hazten espazio-eskaria Gipuzkoan.
Alde horretatik, duela bi aste eskas egin zen Euskadiko Parke Teknologikoaren eraikin nagusiaren lehen harria jartzeko ekitaldia, Hernaniko Campusean, Galarretan. Eraikin berri hori 2026aren amaierarako egongo da bukatuta ziur aski, eta 10.000 m2-ko azalera izango du enpresa teknologikoen eskura. Horrez gain, Gipuzkoako Parke Teknologikoan dagoen okupazio eta eskaera handiari erantzuten lagunduko du.
