AutoTrust proiektuak AAren funtzionamendu segurua bermatu nahi du mugikortasunean

Abian da AutoTrust, SPRI Taldearen Elkartek programak babestutako proiektua. Adimen artifizialeko (AA) metodologia praktikoak ikertzea eta proposatzea du helburu, AAko sistemei fidagarritasuna, gardentasuna eta segurtasuna emateko. Vicomtechek koordinatuta, beste zazpi euskal erakundek lankidetzan dihardute proiektu honetan: CEIT, Ikerlan, Tecnalia, Euskal Herriko Unibertsitatea (UPV/EHU), Automotive Intelligence Center (AIC), Basque Center for Applied Mathematics (BCAM) eta Mondragon Unibertsitatea. 

Ikerketak mugikortasun kooperatibo, konektatu eta automatizatuaren (CCAM) eremura bideratuta daude, eta hiru industria-sektore handitan aplika daitezkeen emaitza teknologikoak eskaintzea du helburu: automobilgintzan, trenbidean eta industrian. Partzuergo berak Elkartek programaren barruan 2018tik 2022ra egindako Autolib eta Autoev proiektuen jarraipena da. 

“Bi proiektu horiek mugikortasunaren sektorea bultzatzen jarraitzeko oinarriak ezarri dituzte. Kalitate-irizpideak, tresnak eta metodoak ezartzeko balio izan dute, baita automatizazio multibehikularra egiaztatzeko eta baliozkotzeko agertokiak eta egoerak ezartzeko ere. Orain, AutoTrustekin, fidagarritasunari heltzen diogu, gidatze autonomoaren zutabeetako bat baita“, azaldu dute proiektuaren koordinazio taldetik. 

Ildo horretan, Vicomtechek joan den otsailean aurkeztu ditu VISAPP 2024 biltzarrean proiektu berri honen esparruan zabalduko duen bere lehen ikerketetako baten emaitzak. Ikerketa horrek datu errealen eta datu simulatuen arteko arrakala aztertzen du, 3D objektuen detekzioaren testuinguruan. Izan ere, “simulagailuak funtsezkoak dira sistema fidagarrien garapenean”, ziurtatu dute. “Datu-bolumen handiak modu eraginkorrean sortzeko aukera ematen dute, baita, hainbat eszenatan, egoera beraren aurrean funtzionalitate bat behin eta berriz ebaluatzeko aukera ere, haien portaera aztertzeko. Proba horien emaitzak adierazgarriak izan daitezen, beharrezkoa da sistemak berdin edo antzera jokatzea datu errealen eta simulatuen aurrean, eta datuen arteko balizko arrakala aztertzea”, azaldu dute. 

Horrela, bada, zentro teknologikoak ondorioztatu du arrakala hori existitzen dela eta hainbat eratako arkitekturei eragiten diela. Orain, AutoTrusten barruan, ikerketa-ildo horri jarraituko dio, arrakala murrizteko eta datu simulatuen erabilera hobetzeko, horrela, gidatze-sistema autonomo fidagarrien ebaluazioa eta garapena bermatuz. 

Aldi berean, partzuergoko beste erakunde batzuek hainbat ikerketa-ildotan lan egiten dute. UPV/EHU, adibidez, Tecnaliarekin eta Automotive Intelligence Centerrekin (AIC) elkarlanean ari da giza eta makinen arteko komunikazioa erraztuko duten mezu edo ikono multzo bat definitzeko, sistema automatizatuak hartzen dituen abisuak eta ekintzak beti gidariarentzat ulertzeko, aurreikusteko eta, beraz, azaltzeko modukoak izan daitezen. Era berean, Tecnalia irtenbide bat garatzen ari da, inguruneko informazioa erabiliz, aparkatzeko maniobrarako ibilbide bideragarri bat sor dezan.  

SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu. 

Lotutako albisteak

14 maiatza, 2024 Berrikuntza

Sustatu berrikuntza-proiektuak zure enpresan Fast Track Innobideak ekimenarekin

Irakurri gehiago

10 maiatza, 2024 I+G

Azkartu proiektuak etorkizuneko industriaren konektibitatean aurrera egitea du helburu

Irakurri gehiago

9 maiatza, 2024 I+G

CIC nanoGUNEk deialdi berri bat jarri du martxan: Ikertzaileak industriarekin lankidetzan

Irakurri gehiago

25 apirila, 2024 I+G

3R teknologia tren arinagoak eta iraunkorragoak eraikitzeko

Irakurri gehiago

23 apirila, 2024 Ekintzailetza

Emen4sport, kirol-arrakazta edonoren eskura I+G+b baten bidez

Irakurri gehiago

Joan blog-era