Euskal enpresaren blog-a Zure enpresarentzat garrantzitsua den eguneroko informazioa
Elkarrizketak 23 maiatza, 2022 Digitalizazioa

“Onlineko erosketa batean konfiantza sortzea funtsezkoa da modu osasuntsu eta organikoan hazteko”

FitnessDigital-en sortzaileak, José Ignacio Rodríguezek, Europa hegoaldeko sektoreko marketplace garrantzitsuenetako bat bihurtu du euskal ETE hau
José Ignacio Rodríguez.

FitnessDigital  duela hamabost urte Gasteizen sortutako proiektu bat da, dagoeneko Europa hegoaldeko fitness sektoreko marketplace garrantzitsuenetako bat bilakatu dena. Garai hartan  hasiberria zen salerosketa elektronikoaren bidez hasi zen lanean, ozta-ozta 400 erreferentziako portfolio batekin; gaur egun 5.000tik gora aukera eskaintzen ditu katalogoan, direla muskulazio-makinak, direla bizikleta estatikoak edo korritzeko zintak… Bere zerbitzu, kalitate, logistika eta, batez ere, espezializazioagatik, José Ignacio Rodríguezek sortutako ETE arabar hau nazioarteko erreferentea da fitness-aren industrian,  urtean hamabost milioi euro inguruko fakturazioa dauka, 31 langile plantillan, presente dago 28 herrialdetan eta filial bat du Mexikon.

Karga-bolumena faktore erabakigarria al da eCommerce-an?

Esango nuke gaur egun dendako erreferentzia kopurua ez dela erabakigarria arrakasta izateko. Azken urteotan merkatua bi ildo nagusitan garatu da. Batetik, milaka erreferentzia dituzten marketplace handi bilakatutako dendak, eta bestetik, produktu eta zerbitzu askoz zainduagoa duten bertikalak, erreferentzia bakar bat izan dezaketenak. Bi aukerak izan daitezke bereizgarriak eta arrakastatsuak.

Dibertsifikazioa ote da hazten jarraitzeko hurrengo aukera?

Gure kasuan, argi dago kanalak dibertsifikatu ditugulako jarraitu ahal izan dugula hazten eta kategoria bakoitzean  sakontzen. Bestalde, 30 salmenta-puntu fisiko irekita izateak, merkatu-aukera berriak emateaz gain, bezeroen premien inguruko ikuspegi berriak eta ikaskuntza berriak ere ematen dizkigu.

Fitness-erako arropa saltzea aukera bat da zuentzat?
Oraingoz ez daukagu asmorik bide horri ekiteko. Batetik, badakigu gure bezeroak eta makinak erosten dituztenak bat direla eta, beraz, sinergia handiak aurki genitzakeela dudarik gabe, baina bestalde, kategoria bateko eta besteko prozesuak oso desberdinak dira. Gainera, gaur egun fitness-erako arropa marka handietan eta moda eta arropa dendetan saltzen da.

 Zenbat erabiltzailek erosten dute zuen web orrian?

Hamabost urteko ibilbide baten ostean (webgunea 2007ko maiatzaren 1ean ireki genuen), esan dezakegu 700.000tik gora bezerok jarri dutela euren konfiantza fitnessdigital atarian. Guretzat, horrexek ematen dio zentzua gure lan guztiari. Salmenten %65 atzerrian egiten dira.

Non?

Espainia da gure merkatu garrantzitsuena (salmenten %40), baina orobat saltzen dugu Frantzian, Belgikan, Italian, Portugalen, Holandan eta, gutxiago bada ere, Alemanian eta Ingalaterran.

Jakinik zein zaila den gauzak erostea haztatu gabe… Zure ustez zein da kontsumitzaileak kontuan hartzen duen ezaugarria onlineko erosketa bat egitean, webgunearekiko konfiantza ala produktuaren kalitatea?

Onlineko denda batek konfiantza transmititzeko duen gaitasuna funtsezkoa da modu osasuntsu eta organikoan hazteko. Baldin negozio-eredu baten oinarria bada une jakin batean zure lehiakideek ez dituzten produktuak edo prezioak eskaintzea, eredu horrek normalean “hanka laburragoak” izango ditu eta ez da arituko inbertitzen lehiakortasun-abantaila garrantzitsuak aurkitzeko eta bezeroaren esperientzia hobetzeko.

Zure ustez, hamabost urte hauetan zein izan da konpainiaren inflexio-puntua maila bat gorago igotzeko?

Espezializazioa izan da gure inflexio-puntua, baina, bitxia bada ere, galdera honi erantzutean bururatzen zaidan lehen erantzuna kontrakoa da. Alegia, enpresa honen inflexio-puntua izan da konfiantza izatea gogoeta estrategiko bat egin behar izan dugun bakoitzean eta prozesu horretatik irtetea pentsatuz gehiago espezializatu behar dugula mailaz igo ahal izateko.

 Zein izango da zuen bidea datozen urteetan?

Espezializazioa kategoria batzuetan, aholkularitza, nazioartekotzea eta kanalak dibertsifikatzea izango dira datozen urteetarako gure norabideak.

Denda fisiko gehiago esan nahi du horrek?
Seguru baietz. Erronka handi bat daukagu oraindik: gure denda fisikoen negoziazioa nazioartekotzea eta zabalik ditugunak hobetzea.

Erronkez ari garenez… Zure ustez zein da konpainiaren etorkizuneko erronka handiena?

Gu bezalako fitness arloko espezialista batek beti izango du toki bat merkatuan, horregatik gure erronka izango da merkatuarekin batera mugitzea eta, ahal bada, aurrea hartzea. Retail munduan dabiltzan kontsumo-ohituren aldaketa sakonen erritmoarekin, erronka berdin zaila da guretzat nahiz edozein industriatako merkataritza-zaleentzat.

Elkarrizketak 29 ekaina, 2022 Digitalizazioa
Laura Marrón (BAIC): “Adimen artifizialean oinarritutako industria lehiakorra eraikitzeko urratsak ematen ari gara Euskadin”
Irakurri gehiago
Elkarrizketak 24 ekaina, 2022 Digitalizazioa
Akuikulturako ingurumen-aztarna murriztea errazteko soluzio digitalak
Irakurri gehiago
Elkarrizketak 23 ekaina, 2022 Digitalizazioa
Salva Industrial, okindegi eta gozogintzarako labeen Europako 10 fabrikatzaile handienetako bat
Irakurri gehiago
Elkarrizketak 23 ekaina, 2022 Digitalizazioa
Basque Digital Innovation Hub-a teknologia digitalen Europako sare berrian sartu da
Irakurri gehiago
Elkarrizketak 22 ekaina, 2022 Digitalizazioa
Diversiusek Atlantis plataforma garatu du, ekoizpen prozesuak digitalizatzeko
Irakurri gehiago

Laguntza berriei buruzko azken orduko albisteak

ETEentzako, merkatuak dibertsifikatzeko, atzerriko bekak, nazioarteko lizitazioak, itzuli beharrik gabeko dirulaguntzak esportazioak sendotzeko, ezarpenak egiteko laguntzak edo nazioartekotzeko prestakuntza espezifikoa.

Interesgarria, ezta?
// Kanal espezializatuak

Jarrai iezaguzu. Kanal espezializatuak
eta eguneroko berriak