Zuchettik 35 urte daramatza enpresa-softwarea eskaintzen
Zuchetti enpresa Bizkaiko Parkean dago, Zamudioko campusean, eta 35 urte daramatza enpresa-softwarea eskaintzen. Fakturazioaren %15 baino gehiago I+Gra bideratzen du eta 4.000 bezero baino gehiago ditu Estatuan. SPRI Taldearen laguntza jaso du Hazitek programaren bidez. Programa horrek euskal enpresen ikerketa industriala eta garapen esperimentala babesten ditu.
Enpresak 35 urte baino gehiagoko ibilbidea du enpresa-softwarearen garapenean. Software arloko zortzi fabrikatzaile nazionalek bat egin izanaren emaitza da. Horri esker, enpresek beren gaitasunak eta esperientzia bateratu dituzte proiektu teknologiko sendoa eta sektore mailako espezializazio zabala duena indartzeko.
“Prozesu horrek mugarri garrantzitsua izan zuen 2016an, Solmicro enpresa Zucchetti Group taldean, Europako software-fabrikatzaile nagusietako batean, sartu zenean. Horrela hasi zen gure herrialdean Zucchetti Spainen ibilbidea!, adierazi du Jaime Rodríguez CEOak. Konpainiak lotura estua du Euskadirekin, “hemen baitaude bere jatorria eta egoitza nagusia. Hala, tokiko enpresa-sarearen ezagutza eta hurbiltasuna uztartzen ditu Group Zucchetti taldearen gaitasun teknologikoarekin, I+G+b arloko inbertsioarekin eta nazioarteko proiekzioarekin”.
Bere bilakaeraren ezaugarri nagusia hazkunde jarraitua izan da, bai teknologia aldetik bai antolakuntza aldetik, proiektura hainbat enpresa gehituz. “Estrategia horri esker, gure soluzioen katalogoa indartu eta zabaldu ahal izan dugu ERP, giza baliabideak, dokumentuen automatizazioa edo zibersegurtasuna bezalako arloetan, eta tamaina eta sektore guztietako enpresentzako bazkide teknologiko integral gisa sendotu gara”.
Enpresak tamaina eta sektore askotako bezeroekin lan egiten du, mikroETEetatik eta autonomoetatik hasi eta nazioarteko inguruneetan lan egiten duten korporazio handietaraino. “Espezializazio handia dugu industria, banaketa, elikadura edo upategietan sektoreetan, besteak beste, baita giza baliabideen kudeaketan, logistikan edo hornidura-katean bezalako arlo estrategikoetan ere”.
Bere katalogoa merkatuan handienetako bat da, eta honako arloetako soluzioak biltzen ditu: ERP, BI, MES, produkzioaren plangintza eta hornidura-katearen kudeaketa. Horrez gain, giza baliabideen kudeaketa, nominak, mugikortasuna, dokumentuen automatizazioa eta zibersegurtasuna lantzeko beste soluzio integral batzuk ere biltzen ditu. “Era berean, Adimen Artifizialeko gaitasunak txertatzen ari gara gure soluzioetan, automatizazioa, produktibitatea eta erabiltzailearen esperientzia hobetzeko. Horren adibide argia da Nominarako gure AA morroia, merkatuan lehena eta gaur egun bakarra dena. 2025ean merkaturatu genuen, eta aldaketa disruptiboa eragin du nominen kudeaketan”.
300 langile baino gehiago
Gaur egun, Zucchetti Spainek 300 langile baino gehiago eta Estatu osoan banatutako bazkideen sarea, 300 profesional ziurtatu inguruk osatua, ditu. “4.000 bezero baino gehiago ditugu Espainia osoan, eta presentzia handia mantentzen dugu Euskadin. Hain zuzen ere, bertan dago gure egoitza nagusia, Bizkaiko Teknologia Parkean. Gainera, Donostian, Ermuan, Madrilen, Logroñon eta Sevillan ditugu ordezkaritzak”. 2025ean 24,5 milioi euroko fakturazioa lortu zuen.
Berrikuntza da konpainiaren zutabe estrategikoetako bat, eta urteko fakturazioaren % 15 bideratzen du berrikuntzara eta soluzio berrien garapenera, bere tokiko I+G+b zentroetan. “Ikerketako eta garapeneko lantalde espezifikoak ditugu hainbat egoitzatan, produktuen bilakaera funtzionalean eta adimen artifizialari, automatizazioari eta enpresen digitalizazioari lotutako teknologietan lanean”.
SPRI Taldearen Hazitek programako bi proiekturen laguntzak ERP sistemak lengoaia naturalaren prozesatzeko ereduen bidez modu autonomoan pertsonalizatzeko tresnak garatzera eta ERP legacy sistemak modu eraginkorrean modernizatzera bideratu dira. “Azken kasu horretan, transpilazio automatikoko teknologiak erabili dira, mahaigaineko aplikazioak web-ingurune eskalagarri eta nabigatzailetik erabilgarri direnetara egokitzeko”.
Etorkizunera begira, erronketako bat da enpresen digitalizazio-prozesuetan erreferentziazko bazkide teknologiko gisa sendotzea. “Hazteko potentzial handiena duten arloak sustatzen ari gara bereziki, hala nola giza baliabideetako soluzioak, hornidura-katea eta adimen artifizialean oinarritutako teknologiak, gure ERP jarduera historikoa indartzen jarraitzea ahaztu gabe. Era berean, gure bazkide-sarea handitu eta hazten jarraitu nahi dugu, bai modu organikoan bai aukera estrategiko berrien bidez. Eta hori guztia berrikuntzaren, Euskaditik egiten den garapen teknologikoaren eta bezeroarekiko hurbiltasunaren aldeko apustuari eutsiz egin nahi dugu; izan ere, balio horiek gure konpainiaren ADNari atxikita daude sortu zenetik.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu
