Industrias Mail defentsaren eta aeronautikaren sektorean murgildu da, hainbat kalibreetarako brotxekin
Industrias Mail-ek ia 70 urte daramatza automobilgintzarako, aeronautikarako edo sarrailagintzarako tresna bereziak fabrikatzen. “Gaur egun, defentsa-sektorerako produktu berriak fabrikatzen ari gara”, aitortu du Miguel Ángel Arenas Industrias Mail-eko zuzendari gerenteak. Ildo horretan, hari bidezko ebaketa-elektrohigadurako makina berriak erosteko inbertitu du, “hainbat kalibreetarako brotxak fabrikatzeko defentsa-sektorean dugun posizionamendua indartzeko”, adierazi du.
Gipuzkoako enpresa aplikazioen tresnak neurrira egiteagatik nabarmentzen da. “Gai gara 300 aleko serieak egiteko, baita ia tresna bakarra egiteko ere”, dio konpainiako ordezkariak.
Brotxak eta ildaskatzeko fresak ere egiten ditu sarrailagintzarako, edo ebakitzeko hortzak eta ebaketa-fresa bereziak. Eta titaniozko osagaiak mekanizatzeko tresna berezien lerro berri bat merkaturatu du, “bai motorren pieza kritiko birakarientzat, bai aeronautikaren sektorean aplika daitezkeen egituren osagai estatikoentzat”, aurreratu du zuzendari gerenteak.
Bere produktuen erabilgarritasunen artean daude sarrailen bonbinak edo etxeko eta industriako sukaldeetan gasa eroateko elementuak egitea, baita errekuntza-motorretako injektore-sistemen osagaiak ere.
Nazioartean presentzia nabarmena
Konpainiaren urteko fakturazioa 3 milioi euro ingurukoa da. “2027rako 3,5 milioi euro gainditzeko aurreikuspena dugu”, aurreratu du. Alde horretatik, fakturazioaren % 65 merkatu nazionaleko salmentetatik dator, eta gainerako % 35a Italia, Frantzia, Txekia, Alemania, Mexiko edo Estatu Batuetara esportatzetik.
Euskal enpresak SPRI Taldearen hainbat programatan parte hartu du. “Dinamizatzaile nabarmena da giza baliabideekin eta baliabide ekonomikoekin laguntzeko, eta lehiakortasun, errotze eta etorkizuneko hazkunde mailari eusteko aukera ematen du”, azpimarratu du Miguel Ángel Arenasek.
Datozen bost urteetara begira, Gipuzkoako konpainiak “asmo handiko hazkunde-helburua du, 4 milioi euroko fakturazioa lortzeko eta hazten ari diren sektore berrietara bideratzeko produktua, hala nola aeronautikara edo defentsara”, adierazi du zuzendari gerenteak, “negozioaren funtsezko sektoreak sustatzen jarraitzeko aukera baztertu gabe, hala nola sarrailagintza, automobilgintza eta balbulagintza”.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
