Ikerlan-ek teknologia kuantikoa txertatu du industriaren zibersegurtasuna indartzeko
Ikerlan Euskal teknologia-zentroak Quside Kataluniako enpresarekin lankidetzan jardun du teknologia kuantikoa gako kriptografikoak kudeatzeko plataforma batean txertatzeko. Aurrerapen horri esker, sektore estrategikoetako komunikazio digitalen segurtasuna areagotu ahal izango da, hala nola industria, energia, telekomunikazioak, garraioa edo bankuak. Mota horretako soluzioek pertsona, erakunde eta konektatutako gailuek autentifikatzeko, informazioa modu seguruan trukatzeko eta datuak zifratze-sistemen bidez babesteko erabiltzen dituzten identitate digitalak sortu eta kudeatzeko aukera ematen dute.
Euskal teknologia-zentroaren ekarpen nagusia gaitasun berri hori plataforma batean txertatzea izan da, ingurune industrialetara eta azpiegitura kritikoetara bideratuta dagoena. Horri esker, tresnak gako kriptografikoak sor ditzake, fenomeno kuantikoetatik abiatuta lortutako benetan ausazkoak diren zenbakiak erabiliz. Gainera, ausazkotasun horren kalitatea egiaztatu dezake funtzionatzen ari den bitartean.
“Egunero erabiltzen ditugun sistema digital gehienak gako kriptografikoen mende daude, eta gako segururik gabe ez dago zibersegurtasunik”, azaldu du Haritz Saizek, Ikerlan-eko zibersegurtasuneko sistema digitalen taldeko ikertzaile eta proiektuaren koordinatzaileak. Nabarmendu duenez, teknologia kuantikoak ohiko sistemek baino ausazkotasun-kalitate askoz handiagoa eskaintzen du, eta horrek komunikazioak eta datuak babesten dituzten gakoen segurtasuna indartzea ahalbidetzen du.
Hobekuntzak eragin zuzena du segurtasun-akats batek ondorio garrantzitsuak izan ditzakeen sektoreetan. Sare elektriko adimendunak, garraio-sistemak, konektatutako industria-instalazioak, telekomunikazio-azpiegiturak edo finantza-plataformak mekanismo kriptografikoen mende daude, gailuak eta erabiltzaileak benetan diotenak direla bermatzeko eta informazioa zibereraso posibleen aurrean babestuta transmititzen dela ziurtatzeko.
Proiektu honen ondoren, Ikerlan-ek eta Quside-k lankidetza-akordio bat sinatu dute teknologia kuantikoak zibersegurtasuneko eta adimen artifizialeko soluzioekin uztartuko dituzten aplikazioen garapenean elkarlanean jarraitzeko. “Gaitasun kuantikoak zibersegurtasun-plataformetan txertatzeak berrikuntza mota horiek merkatura hurbiltzen ditu, eta enpresei eta erakundeei babes digitalaren erronka berrietarako prestatzeko aukera ematen die”, adierazi dute proiektutik.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
