TEN4CARE proiektu europarrak inplante adimenduna garatzen du tendinopatietako ehunen birsorkuntza bizkortzeko
Gihar-hezurretako lesioak gaur egungo osasun-erronka handienetako bat dira. Urtero 33 milioi kasu inguru agertzen dira, horietako asko tendoiekin eta lotailuekin erlazionatuta, eta horientzat oraindik ez dago soluzio orokorrik.
Arlo horretan sakontzeko, TEN4CARE proiektu europarrak (2025-2029) biomaterial aurreratuen erabileran oinarritutako gailu mediko adimendunen belaunaldi berri baten ikerketa abiarazi du. Horizon Europak finantzatzen du ekimena, eta Biokeralty Research Institute euskal enpresak hartzen du parte, 16 bazkidek osatutako nazioarteko partzuergo baten barruan.
Proiektuaren helburua gailu inplantagarri bat garatzea da, kaltetutako ehuna birsortzen laguntzeko eta lesioetan (adibidez, Akilesen tendoiaren hausturan) errekuperazio-prozesuak hobetzeko.
Biomaterial adimendunak medikuntza pertsonalizatua lortzeko
TEN4CAREren berrikuntza nagusia hidrogel nanokonposatuzko aldamio batean (scaffold) oinarritzen da, eta kirurgia txiki baten bidez aplika daiteke. Materialak oroimen-gaitasuna du eta, hala, gorputz-tenperaturara iristean, egitura tridimentsionala berreskuratzen du eta kaltetutako ehunari babesa ematen dio.
Gainera, gailuak nanopartikula magnetikoak integratzen ditu, eta horiek kanpo-estimuluak (eremu elektromagnetikoak) aplikatzea ahalbidetzen dute, ehunaren birsorkuntza bultzatzeko. Material aurreratuak, gainera, hainbat funtzio ahalbidetzen ditu, hala nola infekzioen prebentzioa edo tratamendu antiinflamatorioen jario kontrolatua.
4.0 Industriako teknologiak ere txertatu dira proiektuan, hala nola adimen artifiziala, fabrikazio aurreratua eta biki digitalak, irudi medikoen bidez inplante pertsonalizatuak diseinatzeko eta fabrikazio-prozesuak optimizatzeko. “Proiektuaren erronketako bat da teknologia horrek ikerketatik etorkizuneko aplikazio kliniko eta industriala lortu arte aurrera egin ahal izatea”, adierazi dute proiektuko lantaldetik.
Proiektua, gainera, gizarte-ikuspegian oinarritzen da, eta arreta berezia jartzen du soluzioen baterako garapenean, pazienteen eta osasun-profesionalen parte-hartzearekin.
Partzuergoaren barruan, Biokeraltyk proiektuaren koordinazioan eta bideratzean parte hartzen du, Paviako Unibertsitatearekin batera, bai eta pazienteek eta profesional klinikoek parte hartzeko jardueretan eta emaitzen ikerketan ere. Gainera, gailuaren partikula magnetikoak garatzen laguntzen du. Proiektuak Europako 16 bazkide ditu, eta teknologia hori ikerketa-fasetik etorkizuneko aplikazio kliniko eta industrialera hurbiltzea du helburu.
TEN4CARE bezalako proiektuek islatzen dutenez, Europako lankidetzak aukera ematen du osasunaren arloko irtenbide berritzaileak garatzeko. SPRI Taldeak, Basque Enterprise Europe Network-en (EEN Basque) bitartez, Europar Batasunean aholkularitza eta lankidetzarako aukerak eskaintzen dizkie euskal enpresa eta entitateei, nazioarteko ingurunean bazkideak bilatzen eta I+G+Bko proiektuak garatzen lagunduz.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
