KSB ITUR, ponpen eta balbulen fabrikazioaren arloko nazioarteko erreferente zarauztarra
KSB ITUR Zarauzko enpresa da eta Alemaniako KSB multinazionalaren parte da. Industriako hainbat aplikaziotarako ponpak eta balbulak fabrikatzen ditu. Zarauzko ekoizpen-fabrika taldeak Espainian duen fabrika nagusia da, eta erreferentea da multinazionalaren nazioarteko industria-sarearentzat. Enpresak SPRI Taldearen dirulaguntzak jaso ditu bere eraldaketa digitala sustatzeko.
1920an sortu zen Getarian, Bombas ITUR gisa. Ponpa hidraulikoen fabrikazioan espezializatutako enpresa izan zen. “Hamarkada bat geroago, Zarautzera lekualdatu zen fabrikaren jarduera, eta bertan mantentzen dugu oraindik ere gure ekoizpen-zentro nagusia. Hamarkadetan zehar, konpainia handituz eta erreferente gisa finkatuz joan da industriako hainbat merkatutan, batez ere ontzigintza-sektorean”, azaldu du Matthias Guterlek, KSB ITUR Spainen zuzendari nagusiak.
2003an Alemaniako KSB taldearen barruan integratu zen, ponpen, balbulen eta zerbitzuen arloko munduko liderretako baten barruan hain zuzen ere. “Enpresaren gaitasun industrialak eta tokiko errotzea mantenduz integratu zen taldearen barruan, Euskadiko tradizio industriala eta KSBren nazioarteko dimentsioa konbinatuz”.
Enpresaren eboluzioa etengabeko berrikuntzan, nazioartekotzean eta talentuaren garapenean oinarritu da. “Gure azken mugarrien artean daude hirurogeita hamarreko hamarkadan zehar ontzigintza-sektoreko lidergoa finkatu izana, estatu osoan hedatu izana komertzialki, gure Zarautzeko ekoizpen-instalazioak eraiki eta handitu izana eta Espainiako kalitate-ziurtagiri aitzindariak lortu izana”.
2003an KSB Taldean integratu izanak jauzi estrategikoa ekarri zuen, eta ezagutzaren, teknologiaren eta merkatuen sare globalean integratzeko aukera eman zien. “Inbertsio handiak sustatu ditugu berriki automatizazioaren, digitalizazioaren, azken belaunaldiko entsegu-bankuen eta prestakuntza-zentroen arloan, eta Zarauzko fabrika erreferente bihurtu dugu KSBren nazioarteko industria-sarearen barruan”.
Ponpa autoxurgatzaileak
KSBk hainbat sektore estrategikorentzako ponpen, balbulen eta zerbitzuen soluzioak garatzen ditu. “Hainbat aplikaziotarako ponpa autoxurgatzaileak eta ponpa bertikalak, ontzigintza-aplikazioetarako ekipo espezializatuak eta suteen aurkako babesak fabrikatzen ditugu Euskadin mundu osorako”. Industria, ura, energia, petrokimika eta kimika, eraikuntza eta meatzaritza dira bere merkatu nagusiak.
KSB Spainek 251 profesional ditu plantillan eta 2025eko ekitaldian 70 milioi euro inguruko fakturazioa izan zuen. Zarautzen dago bere zentro industrial nagusia, eta 21.000 metro karratuko instalazioak ditu nazioarteko eta estatuko merkatuentzako ponpa-sistemak fabrikatzeko, probatzeko eta garatzeko.
2025ean, 800.000 euro inguru inbertitu zituzten I+Gn, hau da, Zarauzko fabrikaren fakturazioaren % 3,6 inguru.
SPRI Taldeak emandako azken laguntza Zarauzko proba hidraulikoen bankua digitalizatzeko erabili dute. “Proiektuari esker, azpiegitura kritiko hori KSB Taldearen cloud arkitekturan integratu dugu, neurketa-sistema modernizatuz, eta datuen bilketa, urruneko ikuskapena eta informazioaren kudeaketa zentralizatua hobetuz. Hartara, gure eraldaketa digitalaren eta 4.0 industriaren estrategia indartu dugu”.
Erronka nagusiak hiru ardatz hauetan oinarritzen dira: pertsonak, digitalizazioa eta jasangarritasuna. “Gure lantaldeen parte-hartzean eta garapen profesionalean oinarritutako antolaketa-eredua sustatzen jarraituko dugu, uste baitugu talentua dela lehiakortasunaren motor nagusia. Era berean, gure prozesuen, produktuen eta zerbitzuen digitalizazioa azkartu nahi dugu, azkarrago erantzuteko gure bezeroen beharrei”.
Hirugarren helburu handia jasangarritasunean aurrerapausoak ematea da, “energiaren eta uraren kudeaketa efizienteagoa egiteko soluzioak garatzeko, eta, aldi berean, hazkunde errentagarria eta arduratsua bermatzeko. Hori guztia Euskadirekin dugun konpromisoa mantenduz, gure gaitasun industriala indartuz eta Zarautz KSBren sare globalaren barruko erreferentziazko zentro gisa finkatuz”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
