Watercut enpresak digitalizazioa, automatizazioa eta optimizazioa bultzatzen ditu enbalaje industrialaren ekoizpenean
Ahalik eta babes handiena bermatzea kostu logistiko minimoan, bezero bakoitzari egokitutako soluzio baten bidez. Hori da Watercut enpresaren helburu nagusia. Watercutek bi hamarkadako esperientzia du neurrira egindako bilgarri industrialen soluzioen diseinuan eta fabrikazioan, produktuak biltegiratzean, manipulatzean eta garraiatzean babesteko. “Batez ere, polietilenozko apar teknikoekin egiten dugu lan, inpaktuak bereganatzeko, kalteak saihesteko eta eremu logistikoa optimizatzeko”, nabarmendu du María Uriartek, Watercuteko zuzendari-ondokoak.
Gaur egun, enpresa bizkaitarra bere kudeaketa eraldatzeko proiektu bat garatzen ari da, “prozesu produktibo eta dokumentalen digitalizazioa, automatizazioa eta optimizazioa indartzera” bideratuta dagoena, adierazi du konpainiako ordezkariak. Ezarritako helburua da “kudeaketa eraginkorrago eta jasangarriago baterantz aurrera egitea, gure industria-bezeroen beharrei erantzuteko gaitasuna hobetuz”, aitortzen du. “Lehiakortasuna eta kudeaketa aurreratua hobetzeko gure etengabeko ahaleginaren” parte da proiektu hori, argitu du Uriartek.
Berrikuntzaren aldeko apustu sendoa egin du euskal enpresak. “Gure enpresa-estrategiaren parte da”, adierazi du zuzendari-ondokoak., eta “bai produktuen diseinuan, bai barne-prozesuen hobekuntzan, digitalizazioan eta jasangarritasunean” erabili du. Epe laburrean, “gure prozesuen digitalizazioan eta automatizazioan aurrera egitea eta gure jardueraren jasangarritasuna indartzea” du ardatz.
Talken aurkako babesa
Haien bilgarriek kate logistiko osoan balio handiko produktuak babestea dute helburu. Produktuari kalteak saihesteaz gain, “erabilgarri dagoen espazioa optimizatzea, barne-antolaketa hobetzea eta garraio-kostuak murriztea ahalbidetzen dute”, azpimarratu du. Gainera, azken urteotan, osagai industrial, elektroniko eta ekipo teknikoetarako soluzioak garatu ditu, non “espazioa murrizteak, inpaktuetatik babesteak eta enbalajea berrerabiltzeak eragin ekonomiko oso garrantzitsua baitute bezeroentzat”, María Uriarteren esanetan.
Watercutek hainbat industria-sektoretarako egiten du lan, hala nola elektronika, automobilgintza, ekipo-ondasunak, makina-erreminta edo manufaktura-industria, besteak beste, “200 bat bezero aktibo ditugu eta urtean 2,5 milioi euro inguruko fakturazioa dugu”. Enpresa bizkaitarrak dozena bat langile ditu, eta, batez ere, Iberiar Penintsulako, Frantziako eta Alemaniako merkatuetan aritzen da.
20 urte hauetan, konpainiak SPRI Taldearen hainbat programatan parte hartu du, hala nola Hazitek, Hobeki Digitala edo Renove. “Oso positiboa izan da, ETE industrialei laguntzen baitzaie kudeaketa, berrikuntza, jasangarritasuna eta merkatu gero eta zailagoetan lehiatzeko gaitasuna hobetzen dituzten proiektuak lantzen”, adierazi du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
