ADI Revolutionek Egia sortu du, B2B influencer marketineko lehen plataforma
Influencerretan oinarritutako marketin-estrategiak aspalditik dira azken kontsumitzaileari zuzendutako marken eguneroko jardunaren parte. Hala ere, industria-arloan, non erosketa-erabakiak irizpide teknikoetan eta konfiantzazko harremanetan oinarritzen diren, eredu horrek ia ez zuen aplikazio espezifikorik izan. Hutsune hori betetzeko asmoz, industria-marketin digitalean espezializatutako ADI Revolution euskal enpresak Egia plataforma garatu du, influencer marketinaren kontzeptua B2B ingurura eramateko diseinatua.
Tresnak ohiko kanpainen aldean bestelako ikuspegia proposatzen du. Influencerrei eduki berria sortzeko eskatu beharrean, Egia plataformak LinkedIneko iragarleen argitalpenetan iruzkinak egitera eta “atsegin dut” ematera bultzatzen ditu, haien zabalkunde organikoa handitzeko. Lehenengo erabiltzaile erregistratuen artean Ingeteam, Nemak Spain, BRTA, Deusto Business School, Sariki edo Ona Electroerosión bezalako enpresa eta erakundeetako profesionalak daude.
Urko De La Torre Egiako sortzaileetako batek azaldu duenez, proiektua B2B merkatuetan oso ezaguna den errealitate batetik sortu da: “konfiantzak funtsezko zeregina izaten jarraitzen du edozein merkataritza-prozesutan”. “B2B inguruko merkataritza-harremanak betidanik egon dira gomendioari eta sinesgarritasunari lotuta. Gure helburua logika hori bera ingurune digitalera eramatea da”, adierazi du.
Ekimen hau enpresa askok gero eta informazioz beteago dauden kanal digitaletan nabarmentzeko formula berriak bilatzen dituzten une batean iritsi da. Eduki korporatiboaren hazkundeak eta publizitatearen lehiakortasun gero eta handiagoak markek beren publikoarekin konektatzeko duten gaitasuna murriztu dute. Horren erakusgarri da Edelmanek eta LinkedInek 2024an argitaratutako B2B Thought Leadership Impact Report txostena: B2B erosketa-erabakiak hartzen dituzten profesionalen %73k gehiago fidatzen da adituen edukiez marken komunikazio komertzialez baino.
Egoera horren aurrean, Egiak autoritate teknikoa eta sektoriala duten profesionalen alde egiten du. Ohiko influencer marketinaren aldean, non jarraitzaile kopurua izan ohi den adierazle nagusia, Egiak zuzendaritzako kideak, erdi-mailako arduradunak, teknikariak eta beren sektorean ibilbide aitortua duten adituak jartzen ditu erdigunean.
Sistemaren funtzionamendua erraza da. Enpresek LinkedIneko argitalpen bat aukeratzen dute, iritsi nahi duten publikoaren profila zehazten dute eta kanpainarako aurrekontua ezartzen dute. Hortik aurrera, plataformak kanpainarako profesional egokienak identifikatzen ditu, eta iruzkinen eta interakzioen bidez parte hartzeko aukera eskaintzen die. Gainera, profesional bakoitzaren profilaren eta kanpainarekiko afinitatearen arabera, “atsegin dut” edo iruzkin bakoitzaren ordainsaria automatikoki kalkulatzen du.
Egiaren sustatzaileen ustez, erronka nagusia enpresen arteko komunikazio digitalean konfiantza handiagoa sortzea da. “Marketin digitala funtsezko tresna izaten jarraitzen du negozio-aukerak sortzeko, baina gero eta saturatuago dagoen ingurune batean sinesgarritasunarekin osatu behar da. Hor dago gure ekarpena”, azaldu du Ian Blanco plataformaren sortzaileetako batek.
Ekimen honen bidez, ADI Revolutionek bide berri bat eskaini nahi die posizionamendu digitala hobetu nahi duten B2B erakundeei, enpresa-munduko aktiborik baliotsuenetako bati uko egin gabe: pertsonek sortzen duten konfiantzari. Erregistroa doakoa da, eta dagoeneko zabalik dago bai iragarleentzat bai influencer gisa parte hartu nahi duten profesionalentzat.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
