Sabelec: berrikuntza biomedikoa zauri konplexuen erronkari aurre egiteko
Zauri konplexuek 12 milioi pertsona baino gehiago kaltetzen dituzte Europan, eta haien tratamendua hilabetez luzatu daiteke, eragin handia izanik bai gaixoen bizi kalitatean bai osasun kostuetan. Alternatiba eraginkorragoa eskaintzeko asmoz, Sabelec enpresa donostiarra bioelektrizitatea emulatzeko teknologia garatzen ari da, orbaintzea elektroestimulazio moldagarriaren bidez bizkortzeko.
María Herrerok sustatutako barne-ekintzailetzako proiektu gisa sortu zen konpainia, Herrekor Taldearen barruan, eta, 2023az geroztik, enpresa independente gisa dihardu. “Nire amonek zauri konplexuen ondorioz jasandako mina eta oztopoak beste pertsona batzuei saihesteko desiratik sortu zen ideia. Ikusi genuen benetako beharra zegoela eta aukera zegoela bioelektrizitatea patologia horien tratamenduan aplikatzeko”, azaldu du María Herrerok, Sabeleceko CEOak.
Enpresak garatutako soluzioak organismoko estimulu bioelektriko naturalak erreproduzitzen ditu ehunen birsorkuntza errazteko. Gainera, tratamendua zauri bakoitzaren bilakaerara egokitzeko gai diren algoritmoak ditu. Teknologia hori garatzeko, Sabelec Tecnalia eta Tekniker zentroekin lankidetzan aritu da, eta elektroestimulazioan eta medikuntza birsortzailean espezializatutako nazioarteko aholkulari zientifikoen laguntza izan du.
Enpresaren aurreikuspenen arabera, teknologia horrek %50eraino murriztu lezake zauri konplexuak sendatzeko tartea, eta mina, hantura eta infekzio-arriskua gutxitu. Gailu eramangarria denez, tratamenduaren parte bat pazientearen etxetik egin ahal izatea ere ahalbidetuko du, ohiko sendaketak osatuz. Ikuspegi horrek, gainera, osasun-sistemaren kostuak % 30 inguru murriztea eragin lezake, anbulatorioetako bisitak murrizten direlako eta errekuperazioa azkarragoa delako.
Gaur egun, Sabelec zaurien tratamenduan espezializatutako banatzaileei zuzendutako negozio-eredu batekin ari da lanean, ospitale, zentro soziosanitario eta aseguru-etxeetara iristeko helburuarekin. Aldi berean, saiakuntza klinikoak eta CE markaketa lortzeko prozesua prestatzen ditu, Osakidetza, BioGipuzkoa eta EHU bezalako erakundeekin eta osasun-erregulazioan espezializatutako enpresekin batera, eta, aldi berean, hurbileko industria-hornitzaileekin lan egiten du gailuaren osagai elektroniko eta mekanikoak Sabelec diseinupean ekoizteko.
Enpresak, hasieratik, SPRI Taldeak bultzatutako berrikuntzari laguntzeko programetan parte hartu du, besteak beste, Barnekintzaile, Hazitek, DBIH Konexio, Fast Track Innobideak eta Zibersegurtasuna programetan. Herrerok bereziki nabarmendu du proiektuaren lehen faseetan jasotako babesa: “SPRIren programak funtsezkoak izan dira enpresaren sorreratik garapen teknologikoraino aurrera egiteko. Berrikuntza merkatura hurbiltzen eta I+Gren aldeko apustua egiten dugun enpresa txiki eta ertainentzako likidezia bezalako alderdi garrantzitsuak errazten lagundu digute”, nabarmendu du CEOak.
Lau langilek osatzen dute taldea, eta aholkulari zientifiko eta klinikoen sare handi bat du. Orain, Sabelec-ek etapa berri bat du: bere teknologiaren baliozkotze klinikoa eta adimen artifiziala ezartzea, tratamenduak pertsonalizatzeko eta zaurien bilakaera monitorizatzeko SaaSW (Service As A SW) plataforma baten bidez. Azken helburua da zauri konplexuak dituzten pazienteen arreta hobetzen eta medikuntza pertsonalizatuago bat lortzen lagunduko duen irtenbide bat merkaturatzea.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
