Ormola, kanpoko argiteriarako injekzio-moldeen fabrikatzaile europar handiena
Ormola Azpeitiko enpresa bat da, automobilgintzarako injekzio-moldeak, energia berriztagarriak eta argiteria fabrikatzen espezializatua. Europan kanpoko argiteriarako dagoen moldista handiena da. Enpresaren arrakastaren erakusgarri da eskaera-zorroa beteta dutela eta aurten fakturazioa % 15 handitzea aurreikusten dutela. Enpresak Eusko Jaurlaritzaren zibersegurtasun industrialaren programaren laguntza jaso du. Programa horrek zibersegurtasuna sustatzen du Euskadiko enpresetan, gai horri buruzko egitura ekonomikoa sortuz, SPRIk antolatuta.
Enpresa 1965ean sortu zen Azkoitian, lau bazkideren ekimenez, espartinak bulkanizatzeko tailer gisa. 1978an hasi zen injekzio-moldeak egiten.
“Mugarri nagusietako bat 2009an izan zen, enpresa oso egoera zailean baitzegoen sektoreko krisiarekin. Batez ere bezero batentzat egiten zuen lan eta hura joan egin zen. Orduan gerentzian errelebo bat egon zen eta pertsonen parte-hartze handiagoa izateko lan egin zen”, azaldu du Gorka Sudupe Ormolako gerenteak.
Horrela, plantillaren % 100 bazkide gisa osatu zen lan-sozietate anonimo batean. “Talde-lan gehiago egin zen, eta berrikuntza teknologikoaren aldeko apustua egin zen. Erreferenteak izan gara 2020an, inork ezagutzen ez zuenean, adimen artifiziala sartzean”.
Ormolak enpresei soluzioak eskaintzearen aldeko apustua egin zuen, “lehiakideek egiten ez zuten moduan, eta marka handia egin genuen. Enpresa erabat aldatu zen”. Ordura arte fakturazioa ez zen bi milioira iristen, eta orain bost milioitik gorakoa da, “plantilla handitu gabe”.
2018an, egungo kokapenera eraman zuten, Azpeitira. “Instalazioak laukoiztu eta antolaketa aldatu genuen, txandakako lana ezarrita”. Konpainiak eguzki-plakak instalatzen ditu eta adimen artifiziala aplikatzen die CAM sistemei.
Ormolak automobilgintzarako injekzio-moldeak egiten ditu, nahiz eta 2018tik bere ekoizpena beste sektore batzuetara dibertsifikatu duen, hala nola energia berriztagarrietara eta argiteriara. Karter-piezetarako, atzerako ispiluetarako, motor-euskarrietarako edo kanpoko LED argiteriarako moldeak dira. “Europan kanpoko argiteriarako moldista handiena gara, eta eguzki-energiaren bidez kablerik gabeko lehen argiztapen-produktua egin genuen”. Enpresak Europako futbol-zelaien eta 1 Formulako zirkuituen argiztapenerako moldeak ere egin ditu.
- urtearen amaieran, grafitorako mekanizazio-zentro berri bat sartu dute, partikula kaltegarriak ezabatzeko sistema esklusibo batekin, PERTE baten laguntzari esker. “Adimen artifizialaren bidez mekanizazio-programak are gehiago nola automatizatu ere ikertzen ari gara, mekanizazio-denborak, CAMak egiteko denborak eta erroreak murrizteko”.
40 langilek osatzen dute plantilla, eta I+G funtsezkoa da produktu berriak garatzeko. Urte honetarako fakturazioa % 15 inguru handitzea aurreikusten dute.
Zibersegurtasun industrialeko programaren SPRI Taldearen laguntza phishing-eko barne-kanpainetara eta egon daitezkeen akatsak detektatzera bideratu da. “Eta eraso posible bati erantzuteko barne-protokoloak ditugu. Zortzi orduren buruan normaltasuna berreskuratuko genuke”.
Orain enpresa-egoera ezin hobean daude. “Eskaerak topera ditugu, produktuen dibertsifikazioari esker”. Erronkei aurre egiteko, antolaketa-aldaketa bat egin behar da, eta aldaketa hori garapen betean dago, “pertsonak erakundearen erdigune izan daitezen”. Gainera, molde handi eta konplexuen fabrikazioa sendotu nahi dute. “Iaz 700.000 euroko proiektua egin genuen Eslovakiarako autoen karter batzuetarako”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
