IIndus3D fabrikazio aditiboan aritzen da, eta muturreko abenturetarako ibilgailuen proiektu berri bat garatzen ari da
Indus3D, fabrikazio gehigarri integrala egiten duen Gasteizko enpresa, I+G proiektu berri bat garatzen ari da: muturreko abenturetarako ibilgailuak eskaintzen ditu. Plata & Co du izena eta asmoa da 2026an merkatuan egotea. Enpresak SPRI Taldearen Ekintzaile programaren dirulaguntza jaso du. Programa horrek pertsona edo enpresa ekintzaileei laguntzen die BICen tutoretzapeko enpresa-proiektuak ontzen eta abian jartzen.
“Proiektuaren jatorria bazkideen grina eta bizi-filosofia bera da. 2021az geroztik ari gara 2026an merkaturatuko dugun ibilgailu prototipoa garatzen eta baliozkotzen. I+G arloko hainbat urtetako ibilbide horrek bultzada jaso zuen 2024an, SPRI Taldearen Ekintzaile programari esker”, azaldu du Adriana Cob konpainiako CCOk.
Helburua da material onenekin, adibidez, karbonoarekin, egindako espedizio-ibilgailuak eskaintzea nazioartean. “Gurpil gaineko benetako etxebizitza bat diseinatu dugu, muturreko abenturetarako eta edonon erabiltzeko modukoa. Alejandro Plata ingeniaritza mekanikoan graduatua eta Motorsporten espezializatua da, eta funtsezko ezagutza eskaintzen du ibilgailuaren garapenari aplikatutako teknologietan, materialetan eta prozesuetan, bai eta merkatuaren eta offroad munduaren ezagutza sakona ere”.
Proiektua 2021ean abiatu zen, Land Rover Defender modelotik, “zati gehienak aldatuz eta osagai bereziak diseinatuz, karbonozko kapota eta gurpil-arku zabalgarriak, albo-oin-euskarriak, ur-deposituak eta bestelako elementuak”.
Material konposatuak erabili dira beira-zuntzezko, karbono-zuntzezko edo kevlarrezko moldeak eta piezak fabrikatzeko. “Horretarako, tenperatura altuko labe bat garatu dugu, eta funtsezkoa izan da erresistentzia, arintasun eta iraunkortasun handia eskatzen duten ingeniaritza-proiektuetarako”.
Merkatuaren etengabeko ebaluazioak egin ondoren, “geuk erabat eraldatutako” ibilgailuen salmentan soilik zentratu dira, eta ez dute produktua banaka merkaturatzen, hau da, ez dute kapota, gurpil-arku zabalgarriak, albo-oin-euskarriak eta ur-deposituak bereizita saltzen. “Horrela, azken urteetako build integraletarako joerarekin lerrokatzen gara”.
Bezeroak oso zehaztuta daude: espedizio-espiritua duten abenturazaleak, adin ertain eta aurreratukoak eta Alemania, Finlandia, Ingalaterra eta Estatu Batuetakoak.
Proiektuaren hasierako fasea dela eta, ez dute formalki bereizitako I+G arlorik: “Baina baliabideen zati handi bat diseinura, ingeniaritzara eta ibilgailu prototipoa balioztatzera bideratu da 2021etik. Orain arte, kanpo-finantzaketarik gabe finantzatu da garapena. BIC Arabaren bidez ezagutu dugun Ekintzaile programan parte hartzea izan da proiektuaren kanpoko lehen laguntza”.
SPRI Taldetik jasotako laguntza marka birkokatzera bideratu da; hala, izena aldatu, rebranding osoa egin eta merkatu-nitxoa hobeto definitu dute. “Aldi berean, prototipoaren kanpoko estetika landu dugu, espedizioaren mundura gehiago bideratuta. Egiturazko soluzioak baliozkotu dira, non xehetasun bakoitza, diseinutik hasi eta koloreak aukeratu arte, kontu handiz aukeratu den, gure esentzia islatzeko asmoz.”
Etorkizuneko erronkei aurre egiteko, kontaktu-sare sendoa eraiki behar da, azoken, ekitaldien eta espedizio-ibilgailuekin izandako esperientzien bidez. “Urte batzuen buruan plantilla handitu eta gure instalazioak optimizatu nahiko genituzke, proiektu gehiago kudeatu ahal izateko”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
