Eyher, industriako karga astunak mugitzen espezializatutako ETEa
Eyher industriako karga astunen mugimenduetan espezializatuta dagoen Donostiako ETEa da. SPRI Taldearen Zabaldu programatik jasotako laguntzari esker, nazioartekotzea indartu ahal izan du Frantzian, Mexikon eta Estatu Batuetan estanpazioko trokelak biltegiratzeko patentatutako garapenarekin.
Enpresa 1974an sortu zen, “giltza eskura” zerbitzuak eskaintzeko manutentzio industrialerako, hala nola industria- edo fabrikazio-ingurune bateko kargak mugitzeko, biltegiratzeko eta kontrolatzeko jarduerak eta prozesuak. “Enpresaren sortzailea, Ignacio Rotaeche, Tolosana paper-fabrikako industrian lan egiten zuen ingeniari bizkaitarra zen eta, bere esperientziaren arabera, katalogo produktuarekin bete ezin ziren manutentzioko beharrak zeudela identifikatu zuen”, azaldu du César Trocaola zuzendari komertzialak
Hasiera batean, diseinu guztiak paperean egiten zituzten, marrazketa-mahaietan, “eta Eyher izan zen makinak Autocadean diseinatzeko lizentzia eskuratu zuen Gipuzkoako lehen enpresa. Mugarri horrek agerian uzten du enpresaren pentsamolde berritzailea eta industria-bezeroen beharrak azken teknologiak erabiliz konpontzeko zuen ikuspegia, bai diseinuari, bai eragingailuei, motorizazioari eta kontrolari dagokienez”.
Lehenengo proiektu garrantzitsuak azukre-industriatik iritsi ziren, baina jauzi teknologiko handiena aeronautikarekin gertatu zen. Hain zuzen ere, “harekin konprometituta jarraitzen dugu, eta gure egungo urteko fakturazioaren % 30 hartzen du. Karga astunen mugimenduaz gain, gure bigarren jarduketa eremua osatzen duten proiektuak ekarri ditu horrek: altuerako lanak, alegia, horiek ere industria- edo fabrikazio-inguruneetan”.
Prozesu horretan guztian, kalitate- eta adostasun-ziurtagiriak lortu ditu. “Azken baldintza hori beharrezkoa da altuerako lanetarako neurrira egindako soluzioak diseinatu eta fabrikatzeko, eta alor horretan erreferentzia gara Estatu mailan. Azkenik, azken mugarri gisa aipatuko nuke nola egokitu ditugun gure soluzioak 4.0 industriara, konektibitateari eta urruneko datuen kudeaketari dagokienez”.
Eyher sektore anitzeko enpresa da; izan ere, ia industria-sektore guztietan daude karga astunak mugitzeko eta manipulatzeko beharrak, baita lanean erabiltzen ari diren elementuen neurrira egokitutako altuerako lanak egiteko beharrak ere. “Lan horietarako espazioa mugatuta egoten da lehendik dauden instalazioetan edo lay-out berria planteatu behar den instalazio berrietan. Uneoro aztertu behar da zer manipulazio mota eta nola egin behar den, eta altueran lanak nola egin behar diren eta finkatutako lana osatzeko zer elementu erabili behar diren.
Aeronautika, trengintza, energia, automobilgintza eta siderurgia dira bere lanaren sektore nagusiak, “gure plataforma jasotzaileak, iraultzeko makinak, skip iraultzaileak, plataforma birakariak eta orgatxo motordunak kasu bakoitzean oso espezifikoak diren premia eta ingurune industrialetara egokituz”.
20 eta 25 langile artean ditu, eta horietatik % 40 goi mailako lizentziatuak dira. “Galdaragintzako prozesu batzuk azpikontratatzen ditugu, eta mekanizazioko, pinturako eta instalazio elektrikoko lan guztiak. Hala, gure makinen probetako, diseinuko eta muntaketako lanen % 100 mantentzen dugu”. Iazko fakturazioa bost milioi eurokoa izan zen.
Enpresaren jarduera, neurrira egindako soluzioak zehazten eta diseinatzen dituen ingeniaritza-enpresa denez, I+G da zehazki. “Gure makina asko prototipoak dira, edo soluzio berrien garapena eskatzen dute. Dena den, bezeroaren kontsulta espezifikoa egin aurretik garapena eskatzen duten beharrak identifikatzen saiatzen gara, dagoeneko erabilgarri dauden edo garatzen ari diren teknologia berriak aprobetxatzeaz gain”.
SPRI Taldearen Zabaldu programako laguntzak nazioartekotzea sustatzeko balio izan du, merkataritza-prospekzioko bidaien bidez eta Frantzian, Mexikon eta AEBn estanpazio-trokelak biltegiratzeko patentatutako garapena aurkeztuz. “Laguntzaren zati bat erabili dugu trokelak biltegiratzeko eta berreskuratzeko aipatutako sistema automatikoko marka eta patenteen erregistroa indartzeko eta web-posizionamenduko gure SEO/SEM estrategia Alemaniako merkatura egokitzeko”.
Etorkizuneko erronkak dira aurten instalazio berri batzuetara lekuz aldatzea, “produktibitate handiagoa emango baitigute, eta hobeto egokitzen baitira gure egungo garapenetara eta azken joera eta eskaeretara, giza baliabideen ikuspegitik”. Horrez gain, enpresaren helburua da urteko fakturazioa 6 edo 7 milioi euro inguruan egonkortzea, “eta talentua erakartzea eta mantentzea, teknologia berriak eta adimen artifizialeko azken aurrerapenak aprobetxatzen jarraitzeko”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
