BIEMH 2026k industria modu aktiboan defendatzeko duen garrantzia azpimarratu du Kortak

Eusko Jaurlaritzako Ekonomia Sustapeneko sailburuordeak, Andoitz Kortak, Jaurlaritzak Euskadiko industriarekiko duen konpromiso “argia eta irmoa” berretsi du gaur BIEMH 2026 – Makina-Erremintaren Nazioarteko Biurtekoa aurkezteko egindako prentsaurrekoan. Ekimena martxoaren 2tik 6ra bitarte egingo da Bilbao Exhibition Centren. Sailburuordeaz gain, prentsaurrekoan izan dira honako hauek ere: José Ignacio Ortiz de Urbina, AIMHEko presidentea; José Pérez Berdud, AFM Clusterreko presidentea; M. Carmen Gorostiza, BIEMHeko Event Manager-a; Joseba Mariezkurrena, Bizkaiko Foru Adundiko Ekintzailetza, Talentuaren eta Enpresa Lehiakortasunaren zuzendaria; Xabier Basañez, Bilbao Exhibition Centreko zuzendari nagusia; eta Xabier Ortueta, AFM Clusterreko zuzendari nagusia.

BIEMH 2026ren inaugurazio ofiziala martxoaren 2an, astelehenean, izango da, eta Imanol Pradales lehendakaria izango da buru.

Nazioartekotzearen aldeko apustu estrategikoa

Bere hitzaldian, sailburuordeak nabarmendu du Eusko Jaurlaritzak BIEMHen eta BECek hartzen dituen industria-ekitaldi handien alde egiten duen apustuak estrategia argiari erantzuten diola: Euskadiko industriaren nazioartekotzea indartzea, Euskadi 2030 Industria Planak ezarritakoaren arabera.

“Eusko Jaurlaritzak ekitaldi honen eta egoitza honetan egiten diren gainerako egitasmo guztien alde egiten duen apustua argia da: Euskadiko industria nazioartekotzearen aldeko apustua da”, adierazi du.

BIEMH 2026k 34 herrialdetako 1.503 enpresa erakusketari eta 3.350 produktu berritzaile baino gehiago bilduko ditu, eta fabrikazio aurreratuarekin lotutako nazioarteko topaketa handietako bat izango da. Azokak esparruko sei pabilioiak hartuko ditu, eta martxan egongo diren makinak, automatizazioa, robotika eta digitalizazioko soluzioak erakutsiko ditu, produkzio-eredu eraginkorrago eta interkonektatuagoetaranzko bilakaeraren erakusgarri.

“Biurtekoak gure indar industrialaren ospakizun bihurtu behar du”.

Egungo testuinguru geopolitikoa “oso konplexua” dela eta Euskadiko industriak zenbait proiektu eta sektoretan zailtasunei aurre egin beharko diela onartu du Kortak.

Denok ezagutzen dugu gure industriak bizi duen egoera, eta Jaurlaritzan gertu-gertutik dakigu enpresa batzuk egoera zailean daudela. Errealitate hori existitzen da”, esan du.

Hala ere, Biurtekoa Euskadiko industriaren indar estrukturala goresteko aukera gisa interpretatu behar dela defendatu du. “Zenbaitentzat, harrigarria izan daiteke Biurtekoa industriarentzako ospakizun gisa katalogatzea”, –adierazi du– “baina Biurtekoak gure industriaren indarra ospatu eta goresteko aukera izan behar du. Ziurgabetasuna hor dago, baina martxoaren 2tik 6ra bitartean indartsuak garela egiaztatuko dugu”.

Sailburuordeak azpimarratu du BIEMHek argi uzten duela inbertsioa erakartzeari, inbertsio propioari eta nazioartekotzeari dagokionez Europa mailan erreferentzia izateko gai den industria duela Euskadik.

Eusko Jaurlaritza, industriatik gertu

Bere hitzaldiaren azken zatian, Kortak bi mezu argi helarazi nahi izan ditu.

Lehenengoa: Eusko Jaurlaritza industriatik gertu dago. “Oso argi dugu aurrerapenaren, aberastasunaren eta ongizatearen iturri dela.

Gogorarazi duenez, Jaurlaritza eraldaketa industrialaren alde ari da lanean, Euskadi 2030 Industria Planean jasotako proiektu estrategikoen bidez: industria bultzatzailea eta haren balio-katea bateratzen dituzten lankidetza publiko-pribatuko ekimenak, kalitatezko enplegua eta belaunaldi berrientzako aukerak sortzera zuzenduta daudenak.

Bigarren mezua Euskadiko industria-sarearen defentsa aktiboari buruzkoa izan da. Sailburuordearen hitzetan, Jaurlaritza “gaur egun zailtasunetan dauden proiektu guztietatik oso gertu” dago, eta industria-proiektu sendo eta bideragarriak babesteko lankidetza publiko-pribatuaren Euskadiko eredua defendatu du.

“Enpresaren etorkizuna bermatzen duten proiektuez ari gara, bazkide industrial sendoak, kudeatzeko gaitasuna dutenak eta industria-jarduera eta kalitatezko enplegua ziurtatzen dituen plana dutenak. Beti defendatuko ditugu Euskadin enplegu industriala eta bideragarriak eta sendoak diren enpresa industrialen etorkizuna”.

Industria gehiago, industria hobea, isuri gutxiago

Hitzaldia amaitzeko, Kortak Euskadiko industria-egituraren dinamismoa azpimarratu nahi izan du: “Euskadiko industria mugitu egiten da, berrikuntza bultzatzen du, inbertsioak egiten ditu, esportatu egiten du. Azken finean, aurrera egiten du”.

Azaldu duenez, datorren astean, BIEMHek Euskadi hurrengo mailara eramango duten eta etorkizun oparoa duten proiektuak erakutsiko ditu. “Hemen dago Euskadiko enpresa, industria bultzatzen. Horixe da, hain zuzen ere, Eusko Jaurlaritzaren helburua: industria gehiago, industria hobea, isuri gutxiago”.

BIEMH 2026

BIEMH 2026 – Makina Erremintaren Nazioarteko Biurtekoak inauguratuko du fabrikazio aurreratuaren nazioarteko azoken egutegia martxoaren 2tik 6ra bitarte Bilbao Exhibition Centren. 34 herrialdetako 1.503 enpresa erakusketari bildu eta 3.350 produktu berritzaile baino gehiago aurkeztuko ditu. 33 edizio egin dira orain arte, eta sei hamarkada baino gehiagoko ibilbidea du. Mundu mailan, sektoreko eragile garrantzitsuenen erreferentziazko topagunea izaten jarraitzen du topaketak, eta abangoardiako teknologiaren, soluzio osoen eta lankidetza- eta negozio-aukera berrien bila joango dira.

BIEMH 2026k Bilbao Exhibition Centreko sei pabiloiak hartuko ditu, eta industria arloko esparru nagusien ordezkaritza sektorizatu osoa eskainiko du: harroketako makineria, erremintak eta osagarriak, soldadura, metrologia, osagaiak, deformazio-makineria, xafla- eta hodi-mozketa, eta gainazalen tratamendurako soluzioak. Dinamismoa izango da egitasmoaren ezaugarri nagusietako bat, funtzionamenduan egongo den teknologiarekin. Horri esker, industria ekintza bete-betean ikusteko aukera egongo da. Automatizazioak, robotikak eta digitalizazioak, gainera, toki adierazgarria izango dute, produkzio-eredu eraginkorrago, malguago eta interkonektatuagoetara egindako bilakaeraren isla.

Erakusketa komertzialaz gain, BIEMH 2026k joerak aztertzera, ezagutza partekatzera eta goi mailako networkinga bultzatzera zuzendutako edukien agenda zabala eskainiko du, egungo erronkei aurre egiteko plataforma estrategiko gisa duen zeregina indartuz. “CARPE BIEMH” lelopean, hitzorduaren 33. edizioak enpresa erakusketariak, bisitariak eta erakundeak gonbidatuko ditu unea aprobetxatzera. Beste behin, edizioz edizio bertaratzen direnak harrituta utziko dituen zuzeneko ikuskizun industrial eta teknologikoa eskaintzeko duen gaitasuna agerian geratuko da.