Eusko Jaurlaritzak Zabaldu+ programaren bidez enpresa txiki eta ertainak nazioartekotzeko ematen duen laguntza irailaren 15era arte zabalik egongo da
Eusko Jaurlaritzako Industria, Trantsizio Energetiko eta Jasangarritasun Sailak irailaren 15era arte izango du zabalik ZABALDU+ programa, enpresa txiki eta ertainei nazioarteko merkatu berriak bilatzen laguntzeko. Eusko Jaurlaritzak 13,6 milioi eurorainoko babesa eman dio ekimen honi; % 40tik gorako igoera da aurreko edizioarekin alderatuta.
Programaren helburua Euskadiko ETEen hazkundea eta nazioarteko lehiakortasuna bultzatzea da, eta nazioartekotze-prozesuaren fase guztietan laguntzen die: merkatu berrietarako sarbidetik hasi, eta finkatzera eta dibertsifikatzera iritsi arte. Euskadiko industria-politikako tresna garrantzitsua da, eta bat egiten du Euskadi 2030 Industria Planarekin, inpaktu ekonomikoa, industriala eta lurraldekoa maximizatzeko helburua baitu.
Neurri hori Pradales lehendakariak deitutako Industria Babesteko Taldeak egindako bileraren ondoren hartu da. Horren bidez, Industria Sailak Euskadiko ETEak dibertsifikatu eta eraldatu nahi ditu, munduko ekonomiarentzat une zaila baita, eta Jaurlaritza dagoeneko hasia da neurri zehatzak aurreratzen.
Hala, 2026ko errekorreko aurrekontuari beste 87 milioi euro gehituko zaizkio orain, gure ETEak eraldatzera eta dibertsifikatzera bideratuta. Guztira, Eusko Jaurlaritzak 277 milioi euro bideratuko ditu ETEentzako laguntzetara; hau da, 2025eko aurrekontuarekin alderatuta, % 51,4 gehiago.
ZABALDU+ programak nazioarteko testuinguru gero eta konplexuagoari egin behar dio aurre, arrisku gero eta ugariagoak, protekzionismoa eta balio-kate globaletako tentsioak direla eta. Hori horrela, programak “leihatila bakarra” eskaintzen du, indartsuagoa, sinpleagoa eta eraginkorragoa, aurreko laguntza publikoko tresnak ordezkatu eta hobetu baititu.
Ikuspegi berriak jauzi kualitatiboa egin du nazioartekotzearekiko babes instituzionalean, bost ardatz nagusitan oinarrituta: dirulaguntzen intentsitate handiagoa, sinplifikazio administratiboa, espezializazioa, merkatuak dibertsifikatzeko bultzada eta enpresen lankidetza sustatzea ingurune konplexuetan.
Programak ETE industrialak eta teknologikoak jartzen ditu estrategiaren erdigunean, eta Euskadiko lehiakortasunerako eta errotzerako motor gisa duten rola indartzen du. Horrez gain, ebaluazio-irizpideak egokitzen ditu balio estrategikorik handiena duten proiektuak lehenesteko; tartean, startupak eta lehentasunezko sektoreak. Eta, era berean, dirulaguntzek enpresa-ehunduran duten inpaktu errealaren neurketa hobetzen du.
Berritasunen artean, ZABALDU+ programak lankidetza-proiektuak sustatuko ditu, nazioarteko merkatu zorrotzagoetara iristeko, eta aldi baterako eta emaitzetara bideratutako ekimen pilotuak sustatuko ditu, egitura iraunkorrak ekidinez.
Inpaktuari dagokionez, programak 390 proiektu baino gehiagori laguntzea eta nazioartekotzearen arloan 34 milioi euro inguru mugitzea espero du. Horrez gain, proiektu bakoitzeko batez besteko dirulaguntza nabarmen handitu da eta irismenik eta arriskurik handiena duten ekimenentzako finantzazioa indartu da, batez ere merkatu konplexuetako ekimenentzat.
Gainera, datuek erakusten dute lagundutako proiektuen % 98k inpaktu positiboa sortzen duela Euskadin, eta jasangarritasunarekin eta konpromiso sozialarekin lotutako ekimenek gero eta pisu handiagoa dutela. Hortaz industriako eta teknologiako ETEen gaineko trakzio-efektua finkatzen du programak.
