Mikel Jauregi: “Bilboko Adierazpena automobilgintza-sektore europar eta jasangarriago baten aldeko konpromisoa da”

• ARAko 41 eskualdeek “Bilboko Adierazpena” onartu dute. Adierazpen horrek aldarrikatzen ditu eskualdeak protagonista izatea Europako industria-politikan; “Made in Europe” aldeko eta automobilgintzaren sektoreko tokiko edukiarekiko konpromisoa; eta, azkenik, emisioak murrizteko neutraltasun teknologikoa
• Jauregik Europako automobilgintza-industriarako tokiko edukia defendatu du, automobilgintzako osagaien IRABAZI industria-sektorea bultzatzeko. “Badakigu Txinako fabrikatzaileek automobilak fabrikatuko dituztela Europan, baina bertan fabrikatutako osagaiekin egin behar dute. Eta, gure kasuan, Euskadiko piezak dituzten auto txinatarrak”
• Sailburuak aldarrikatu du beharrezkoa dela “neutraltasun teknologikoa emisioak murrizteko, eta auto elektrikoa auto hibridoekin eta erregai berriztagarriak kontsumitzen dituzten autoekin konbinatzeko”.

Eusko Jaurlaritzako Industria, Trantsizio Energetiko eta Jasangarritasuneko sailburuak, Mikel Jauregik, balioetsi du “Europako industria-eskualdeek, horien artean Euskadik, duten indarra “Made in Europa” sendotzeko”. Jauregik Automotive Regions Alliance (ARA) sarearen osoko bilkura inauguratu du gaur AIC-Automotive Intelligence Centerren egoitzan, Zornotzan.

Jauregi sailburuak adierazi duenez, “automobilgintzaren sektoreko Europako eskualde nagusiok bi konpromiso ditugu: Europako oinarri industriala gara eta Europa ireki batean sinesten dugu. Ongi etorriak izango dira Europan finkatu nahi duten automobilgintzako fabrikatzaile atzerritarrak, baina joko-arau berberak aplikatuz: tokiko edukia eta neutraltasun teknologikoa. Bilboko Adierazpenak aldarrikatzen ditu eskualdeak protagonista izatea Europako industria-politikan; “Made in Europe” zigiluaren eta tokiko edukiaren aldeko konpromisoa automobilgintzaren sektorean; eta, azkenik, neutraltasun teknologikoa emisioak murrizteko. Automobilgintza-sektore europar eta jasangarriago baten aldeko konpromisoa da”.

Testuinguru horretan, Adierazpenak automobilgintzako eskualdeen industria- eta inbertsio-tresna europarren baterako diseinua eta ezarpena ere aldarrikatzen du. Gainera, talentuaren garrantzi estrategikoa azpimarratzen du, Kalitatezko Enpleguetarako Bide Orriaren eta kalitatezko enpleguen etorkizuneko legearen helburuak babestuz, bai eta genero-berdintasuna egiturazko irizpide gisa txertatzea ere sektoreko lan-politiketan.

Jauregik tokiko edukia defendatu du Europako automobilgintza-industriarentzat, Industria Plana-Euskadi 2030 planaren esparruan IRABAZI automobilgintzako osagaien industria-sektorea bultzatzeko. “Badakigu Txinako fabrikatzaileek autoak fabrikatuko dituztela Europan, baina bertan fabrikatutako osagaiekin egin behar dute. Eta, gure kasuan, Euskadiko piezak dituzten auto txinatarrak”. “Horrek lagunduko du benetan automobilgintzako osagaien industria bat defendatzen eta garatzen, Euskadin funtsezkoa baita, guretzat sektore estrategikoa baita, eta haren mende 40.000 lanpostu baitaude”, azpimarratu du.

Sailburuak aldarrikatu du beharrezkoa dela “neutraltasun teknologikoa emisioak murrizteko, eta auto elektrikoa auto hibridoekin eta erregai berriztagarriak kontsumitzen dituzten autoekin konbinatzeko”.

Gainera, Municheko Adierazpenean barne errekuntzako autoak fabrikatzeko 2035eko muga malgutzeko hartutako konpromisoa berretsi du. Neutraltasun teknologikoa defendatu du emisio gutxiagoko ibilgailuen erosketa sustatzeko orduan, eta automobilgintzaren sektorearen trantsizioak Europako ekoizpena, inbertsioa eta balio-kateak sendotuko dituela berma dadila.

“Deskarbonizazio adimendun hori sustatzeko pizgarri berriak behar ditugu –erantsi du Jauregik–, eta eskualdeok funtsezko zeregina dugu politika eta pizgarri berriekin esperimentatzean, bai eta jardunbide egokiak beste erakunde batzuetara, bereziki Europako Batzordera, zabaltzean ere”.

Joan den urteko irailean ARAk Munichen egin zuen topaketako hitzaldian adierazi zuen bezala, Industriako sailburuak gaur berretsi du Europako eskualdeek bete behar duten zeregin nagusia, “gure industrietatik gertu gaudelako, haien erronkak eta ahalmena ezagutzen ditugulako eta azkar eta eraginkortasunez jardun dezakegulako. Gu gaude sektore horretan lan egiten duten 30 milioi pertsonengandik gertuen”.

Bilboko Adierazpena

Automotive Regions Alliance (ARA) sareko 41 eskualdeek “Bilboko Adierazpena” onartu dute. Adierazpena sektorearen etorkizun hurbila definituko duten bi espedienteei buruzko jarrera politiko bateratua da: Industria Bizkortzeko Legea (Industrial Accelerator Act) eta Automotive Package estrategia. ARAren ustez, Industria Bizkortzeko Legea funtsezko tresna da Europako balio-kateak indartzeko, mendekotasun estrategikoak murrizteko eta EB osoan automobilgintzako ekosistemen epe luzerako lehiakortasuna babesteko.

Adierazpenak, funtsean, “Made in EU” baldintzak sartzea babesten du, baldin eta espezifikoak, proportzionatuak eta sendoak badira, segurtasun juridikoa eskaintzen badute, ETEentzat eta eskualdeetako hornidura-kateentzat bidegabeko kargak saihesten badituzte eta Europar Batasunaren nazioarteko konpromisoekin bateragarriak izaten jarraitzen badute. Aliantzako eskualdeek azpimarratzen dute Industria Bizkortzeko Legeak bere ahalmen guztia hedatuko duela soilik koherentea bada Automotive Package estrategiarekin, Automobilgintzarako Ekintza Planarekin eta araudi-esparru zabalagoarekin, eta Automotive Package estrategiaren ezarpenaren eta Industria Bizkortzeko Legearekin duen interakzioaren ebaluazio integrala eskatzen dute, esparru orokorrak bere helbururako egokia izaten jarraituko duela bermatzeko.

Trantsizioaren dimentsio teknologikoan, ARAk neutraltasun teknologikoaren printzipioa berresten du neurri arautzaileen irizpide gidari gisa. Aliantzak ibilgailu elektriko txiki eta merkeei buruzko Europako ekimena babesten du, zero emisioko mugikortasuna Europako herritar guztiengana hurbiltzeko tresna gisa.  Aldi berean, azpimarratzen du trantsiziorako laguntza ez dela ekimen honetan bakarrik oinarritu behar, fabrikatzaileek ibilgailu-zorro anitza eta eskaeraren araberakoa eskaintzeko duten gaitasuna mantenduz. Adierazpenak, halaber, 2035 baino lehen, erregai berriztagarri jasangarrien (bioerregaiak barne) egitekoa eta eraginkortasuna ebaluatzea eskatzen du, neutraltasun teknologikoaren printzipioarekin eta 2050erako klima-neutraltasunaren helburuarekin bat etorriz.

Automotive Regions Alliance (ARA)

Automotive Regions Alliance (ARA) Eskualdeetako Komitearen esparruan sustatutako sarea da, eta automobilgintzaren presentzia handia duten eskualdeak biltzen ditu.  Eskualdeen arteko lankidetza politikorako plataforma bat da, automobilgintzaren sektoreko Europako industria-politikara bideratua, eta solaskide gisa jardute du Batzordearen, estatu kideen eta beste erakunde eta aliantza industrial batzuen aurrean.

ARAren helburua da bermatzea Europako automobilgintza-sektorearen trantsizioak ez duela industria-ehuna ahulduko, lurralde-errealitateak kontuan hartuko dituela eta Europako hornidura-katea eta enpleguak babestuko dituela.  Azken batean, trantsizioa lehiakorra, bidezkoa eta eskualdeen artean orekatua izatea.

Gaur egun, EAEk du ARAren presidenteordetza eta Grand Est eskualdeak (Frantzia) presidentetza.

Irailean Valentzian egitekoa den urteko batzarra prestatzeko antolatutako Bilboko topaketak garrantzia hartu du; izan ere, argitaratu berriak dira European Automotive Package (abenduan) eta Industrial Accelerator Act. Bileran bi araudiak ebaluatu dira, eta “Bilboko Adierazpena” izeneko azken adierazpen bateratu bat egin da.

Osoko bilkuran Nafarroako lehendakaria izan da

Jauregiren hitzaldiaren ondoren, inaugurazioan hitza hartu dute Brigitte Torloting Grand Est-eko presidenteordeak, Andriana Sukova DG Employmenteko zuzendariorde nagusiak eta Emil Boc Cluj-Napocako (Errumania) alkate eta Europako Eskualdeetako Komiteko Coter Batzordeko presidenteak. Emil Boc Errumaniako lehen ministroa izan zen 2008 eta 2012 artean. Jarraian, Andriana Sukovak (Deputy Director-General of DG Employment) hitzaldi nagusia eman du.

Ondoren, eskualdeek IAAri buruz duten posizioari buruzko bloke bati eman zaio hasiera, eta hainbat lurraldek esku-hartze laburrak egin dituzte. Eztabaida instituzionalak agintari garrantzitsuen ekarpenekin jarraitu du, eta Christophe Grudler Europako Parlamentuko IAAri buruzko txostengileak eta María Chivite Nafarroako Foru Komunitateko Gobernuko lehendakariak industria politikari eta Europako automobilgintzaren sektoreari buruzko ikuspegiak jorratu dituzte.

Amaitzeko, panel tematiko bat egin da, klusterren ikuspegia jasotzeko. Ondoren, ondorioak atera dira eta topaketari amaiera eman zaio. Ekitaldia amaitzeko Automotive Intelligence Center, automobilgintzaren sektoreko garapen teknologikora, talentura eta mugikortasun jasangarrira bideratutako Europako berrikuntza irekiko zentroa, bisitatu dute.