EEusko jaurlaritzak, Ekarpenekin eta Velorarekin batera, etapa berri bat bultzatuko du Vicinayrentzat, offshore eolikoaren aldeko apustu estrategiko batekin
- Vicinay Velorak lideratutako proiektu industrialean sartzeko eragiketa inbertsio berriak aurreikusten dituen hazkunde-estrategia baten lehen eragiketa da.
Eusko Jaurlaritzak, Ekarpenekin batera, Vicinay Velorak lideratutako proiektuan sartzeko eragiketan parte hartuko du. Dámaso Quintana buru duen enpresa taldearen helburua da euskal industriako konpainia enblematikoenetako baten etorkizuna ziurtatzea eta Euskadik offshore eolikoaren sektorean duen posizionamendua indartzea.
Inbertsio publikoa ECN All Wind dibisioaren bidez gauzatuko da. Dibisio hori Velorak sortu zuen, eta itsas eolikan eta elektrizitatearen transmisio- eta banaketa-sareetan espezializatuta dago. Vicinay erostea izango da inbertsio berriak aurreikusten dituen hazkunde-estrategia baten lehen eragiketa. ECN All Wind Europako energia trantsizioan zeregin estrategikoa izango duen sektore bati lotutako ekoizpen eta teknologia gaitasun berriak bultzatzeko pentsatuta dago.
Eragiketa hori zehazteko, Eusko Jaurlaritzak sortu berria den Ezten II Arrisku Kapitaleko Funtsa finantza-tresna erabiliko du, 7,5 milioi euroko inbertsioarekin, Vicnayren % 100 izango duen ECN All Winden % 7,8 eskuratzeko. Erakundeak sartzeak inbertitzaile industrialari konpainiaren ekoizpen-jarduera bermatzera, bere erabaki-zentroa mantentzera eta bere fabrikazio-zentro nagusiari Euskadin eustera bideratutako proiektu batean laguntzeko aukera emango du.
Bi mende baino gehiagoko ibilbidearekin, Vicinay erreferentea da munduan tamaina handiko kate eta konektoreen fabrikazioan, eta aplikazioak ditu oil & gas bezalako sektoreetan, eta, gero eta gehiago, itsas energia eolikoko instalazioetan. Sestaon duen planta lehen mailako aktibo industriala da, eta 200 pertsona ingururi ematen die lana Euskadin.
Konpainiaren merkatu-aurreikuspenak hobetzeko testuinguru batean iritsi da eragiketa. Energia eta offshore sektoreetan gauzatuko duen jardueraren hazkundeari esker, datozen urteetan ekoizpena % 25 inguru handituko dela aurreikusten da.
Eragiketa hau 2030 Euskadi Industria Planak zehaztutako estrategiaren barruan kokatzen da. Alde horretatik, Eusko Jaurlaritzak beti irizpide bera ezartzen edu edozein inbertitzaile industriali ematen dion laguntza ebaluatzeko orduan: industria-proiektu sendoa eta etorkizuna duena izan behar du; ibilbide aitortua izan behar du; kalitatezko enplegua sustatu behar du; eta bertako hornitzaile-katearen jarduera sustatu behar du.
Eusko Jaurlaritzak azpimarratu du, gainera, ez dela Vicinayren kudeaketan zuzenean sartzea, ezta jarduketa isolatu bat ere, baizik eta euskal industriarako esparru estrategiko batean hazteko bokazioa duen industria-ekimen bati laguntzea, eta parte-hartze publikoa beti egingo da inbertitzaile industrialarekiko posizio minoritario eta osagarritik.
Plataforma industriala
Alde horretatik, ECN All Wind itsas eolikaren balio-kateari lotutako enpresak eta gaitasunak integratzeko gai izango den plataforma industrial bat eraikitzeko helburuarekin sortu zen. Vicinay sartzeak aukera emango du kate horri funtsezko katebegi bat gehitzeko, bere ezagutza teknologikoa, ekoizpen-ahalmena eta ainguratze eta amarratze-sistemetan nazioartean duen lidergoa aprobetxatuz, funtsezko osagaiak baitira parke eoliko flotatzaileak garatzeko.
Eragiketaren helburua da, halaber, euskal industria-sarea indartzea, enpresa hornitzaileen, zentro teknologikoen eta fabrikatzaile espezializatuen artean sinergia berriak sortuz. Velorak eta erakundeek uste dute esperientzia industrialaren, gaitasun finantzarioaren eta epe luzeko ikuspegiaren konbinazioak aukera ematen duela Euskadin energia-trantsizioari lotutako balio erantsi handiko jarduerak sendotzeko.
Horrelako ekimenetan, Eusko Jaurlaritzaren zeregina ekonomia osorako trakzio-gaitasuna duten proiektuei laguntzea da, erabakiguneen iraunkortasuna, kalitatezko enpleguaren sustapena eta industria-aukera berrien garapena bultzatuz. Premisa horretan oinarrituta, lankidetza publiko-pribatua hazteko ahalmena eta nazioarteko proiekzioa duten sektoreak indartzeko tresna gisa planteatzen da.
Eragiketa horrekin, Vicinayk etapa berri bati ekin dio offshore eolikoaren aukerak aprobetxatzera bideratutako industria proiektu zabalago baten barruan. Veloraren eta Eusko Jaurlaritzaren babesaren helburua da konpainiari egonkortasun finantzarioa, inbertitzeko gaitasuna eta merkatu berrietarako sarbidea ematea, eta, aldi berean, Euskadin industria-ondarearen parte den enpresa historiko baten sustraitzea ziurtatzea.
ECN All Winden sartzeak, gainera, indartu egiten du Euskadi itsas energiari lotutako teknologietan erreferente bihurtzeko apustua, industria, berrikuntza eta jasangarritasuna uztartuz datorren hamarkadarako hazkunde-motor gisa.
