Plásticos Lezo, plastikoaren industrian piezetarako hornitzaile estrategiko bihurtutako familia-tailerra
Plasticos Lezo Irungo enpresa bat da, ia 40 urte dituena, eta familia-tailerra izatetik, pieza plastikoen moldeen eta injekzioaren hornitzaile estrategiko izatera igaro da. Jasangarritasuneko bere politika dela eta nabarmentzen da: urtero kalkulatzen du karbono-aztarna eta produkziorako autokontsumoko energia fotovoltaikoa erabiltzen du. SPRI Taldearen zibersegurtasun industrialaren programako laguntza jaso du. Horren helburua da Euskadiko industria indartzea hornitzaile espezializatuen laguntzarekin informazio sentsiblearen lapurreten eta zibererasoen aurrean.
1989an sortu zen, bi ekintzaileren eskutik, plastikoaren industrian soluzioak garatzeko asmoz. “35 urtetik gorako esperientzia dugu moldeen fabrikazioan eta pieza plastikoen injekzioan, hasi piezaren diseinutik eta moldearen fabrikaziotik eta piezaren produkzioraino eta akaberaraino”, azaldu du Unai Sabatié zuzendari gerenteak.
Sortu zenetik, bezeroari soluzio integralak ematera bideratutako enpresa izan da. 1997an, ISO 9001 ziurtagiria eskuratu zuen eta 2003an gaur egun Irunen dituen instalazioetara lekualdatu ziren. 2021ean, MAGNIA Groupen sartu zen, eta, ordutik, kalitate- eta ingurumen-sistema integrala garatu du, hainbat ziurtagiritan eta karbono-aztarnaren lanarekiko bere inplikazioan oinarrituta. “Moldean hasi eta entregaraino trazagarria den produkzioa dugu, eta etengabeko hobekuntzarekiko eta jasangarritasunarekiko konpromisoa dugu”.
Hala, instalazioan datuak jasotzeko sistema garatu eta ezarri du. Horrek produkzioaren plangintza, kontrola eta kudeaketa errazten ditu, bere injekzio-makinen prozesuko datuak bilduz eta aztertuz, “0 akats eta 0 SCRAP helburuarekin”.
Duela hiru hamarkada sortu zen familia-tailer hura hornitzaile estrategiko bihurtu da hainbat sektoretarako, hala nola etxetresna elektrikoetarako, automobilgintzarako, sarbide-kontrolerako eta industria elektronikorako. “Gure esperientziari esker, edozein material tekniko injektatzeko gai gara, 1 g-tik beherako mikropiezetatik hasi eta 2,5 kg-rainoko bolumen handiko piezak fabrikatzeko”.
Enpresak 36 langile ditu eta, urtean, 5,5 milioi euro inguru fakturatzen ditu. Fakturazio horren % 7 I+G proiektuetara bideratzen da, “batez ere moldeak hobetzera, material berrietara eta automatizaziora”. Plásticos Lezok berrikuntzarekiko duen konpromisoa jasangarritasunarekin ere lotuta dago; izan ere, urtero kalkulatzen du bere karbono-aztarna, autokontsumorako energia fotovoltaikoa erabiltzen du produkziorako, eta EcoVadis plataformak aitortu du.
SPRI Taldearen zibersegurtasun industrialeko programatik jasotako laguntza injekzio-zelula automatizatuen eta kudeaketa-sistemaren arteko komunikazioak babestera bideratu da, “intrusio-arriskua minimizatuz eta eguneroko funtzionamendua ziurtatuz. Sarbideak indartu dira, sare kritikoak segmentatu dira eta teknikariak trebatu dira ziberresilientzia handiagoa izateko”.
Etorkizunera begira, Plásticos Lezoren helburuetako bat da gaitasun teknikoak handitzen jarraitzea, sektore industrial estrategikoetan hornitzaile integral gisa sendotzea eta prozesu jasangarri eta digitalizatuen integrazioan aurrera egitea. “Gure erronka betiko kalitate berberarekin, baina etorkizunak eskatzen dituen teknologiarekin eta segurtasunarekin fabrikatzen jarraitzea da”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
