Jon Ansoleaga Ugarte, SPRIko zuzendari nagusi berria
- Cristina Oyon, Teknologia, Berrikuntza eta Iraunkortasuneko egungo zuzendaria, izango da zuzendari laguntzaile berria.
Gobernu Kontseiluak Jon Ansoleaga Ugarte izendatu du gaur Enpresen Garapenerako Euskal Agentziako (SPRI) zuzendari, Aitor Urzelai Inzaren ordez. Aitor Urzelai 2020. urteaz geroztik izan da kargu horretan, eta Gobernu Kontseiluak eskerrak eman dizkio egindako lan onagatik eta emandako zerbitzuengatik.
Jon Ansoleaga Ugarte Euskadiko Eraikuntza Industriako Klusterreko (BUILD:INN) zuzendari nagusia izan da azken zazpi urteetan. Ansoleaga Enpresen Administrazio eta Zuzendaritzan lizentziaduna da Deustuko Unibertsitatean, Lehiakortasunaren Mikroekonomian espezializatuta dago unibertsitate horretan bertan, Harvardekin lankidetzan, eta ESIC Business & Marketing School-en MBA bat ere badu. Bere ibilbide profesionalean, Klusterraren barruan eta kanpoan, I+G+B eta garapen teknologikoko proiektuetan, enpresentzako negozio-aukeren bilaketan, nazioartekotzean edo energia-efizientzia eta deskarbonizazioa errazteko eta bizkortzeko hainbat herrialdetako enpresen arteko lankidetzan egindako ekimenak nabarmentzen dira.
Ansoleagak Cristina Oyon Echeverriaren babesa izango du zuzendari laguntzaile berri gisa. Oyon Teknologia, Berrikuntza eta Jasangarritasun zuzendaria da gaur egun Sprin. SPRIn ekimen estrategikoen arduraduna ere izan da, eta bi urtez Europako Batzordeak “Industry 2030” Europako politiken eraikuntzan aholkuak emateko 20 adituetako bat izendatu zuen. Gaur egun, industrian genero-berdintasuna bultzatzeko Women In Industry ekimenaren buru da.
Haren izendapenarekin, Industria, Trantsizio Energetiko eta Jasangarritasuneko sailburu Mikel Jauregik berretsi egin du Eusko Jaurlaritzak industriaren alde egindako apustua. Izan ere, industria Euskadiko motor ekonomikoa da, eta Euskadi prest dago ekonomia berria definitzen duten bi erronkei aurre egiteko, hots, trantsizio energetikoari eta zentzuzko deskarbonizazioari, eta jarduera ekonomikoaren eraldaketa digitalari.
Enpresen Garapenerako Euskal Agentziaren (SPRI) eginkizuna da euskal enpresen lehiakortasunaren hobekuntza babestea, bultzatzea eta horretan laguntzea, horren bidez Euskadin aberastasuna sortzen eta herritarren ongizatea hobetzen laguntzeko, betiere giza garapen jasangarriaren bidez, Eusko Jaurlaritzak ekonomia sustatzeko garatutako politikaren esparruan.
Eusko Jaurlaritzako Industria, Trantsizio Energetiko eta Jasangarritasun Sailaren erakunde hori lanean ari da euskal enpresei abiaraztea, finantzatzea, digitalizatzea, negozioa beste herrialde batzuetara zabaltzea edo espazio fisikoak, pabiloiak edo bulegoak bilatzea ahalbidetuko dieten mekanismoak eskaintzeko.
