Eusko Jaurlaritzak BINDen 11. deialdia jarri du abian, azken hamarkadan euskal enpresen eta startupen arteko kontratuetan lortutako 10 milioi euroko balantzearekin

Eusko Jaurlaritzako Industria, Trantsizio Energetiko eta Jasangarritasun Sailaren eta SPRIren BIND ekimenak mundu osoko startupei zuzendutako 11. deialdia ireki du, industria adimendunaren, antolamendu efizientearen, merkaturatzearen, energiaren eta jasangarritasunaren esparruetan teknologia disruptiboak dituzten berrikuntza-proiektuak garatzeko helburuarekin. Deialdia irailaren 4ra arte egongo da zabalik, startupek eskaerak aurkezteko eta BINDen edizio honetan parte hartzen duten 100 enpresa partner baino gehiagorekin batera berrikuntza irekiko proiektu errealak garatzeko aukera izan dezaten.

11. edizio honen irekiera BIND Demo Day 2026 ekitaldian iragarri da. Plataformaren urteroko topaketa hori gaur goizean egin da, eta programaren hamargarren edizioan garatutako 30 proiektuak aurkeztu dira bertan. Ekitaldian, berrikuntzaren eta ekintzailetzaren ekosistemako startupak, korporazioak, ETEak, sozietate publikoak, inbertitzaileak eta eragileak bildu dira, eta erreferentziazko ekitaldi gisa finkatu da euskal produkzio-sarean jada aplikatutako soluzio teknologikoak ezagutzeko.

Ekitaldiaren inaugurazioan Industria Sustatzeko sailburuorde Andoitz Kortak nabarmendu duenez, ekimenaren 10 urteetan Eusko Jaurlaritzak “euskal trakzio-enpresekin, mentoreekin eta inbertitzaileekin konektatu diren 275 startup baino gehiagoren 400 proiektu baino gehiago bultzatu ditu, eta, garrantzitsuena dena, inpaktu erreala izan dute: BINDek 10 milioi euro baino gehiago mobilizatu ditu euskal enpresen eta startupen arteko kontratazioan. Hau da, proiektu zehatzez, ezarritako soluzioez eta industria-prozesuen benetako eraldaketaz ari gara”.

Berrikuntza irekiko azken proiektuak 

BIND Demo Day 2026 ekitaldian, startupek eta Euskadiko erreferentziazko enpresa eta sozietate publikoek lankidetzan garatutako azken 30 soluzio teknologikoak aurkeztu dira. Soluzio horiek zuzeneko aplikazioak dituzte hainbat esparrutan, hala nola energian, jasangarritasunean, adimen artifizialean, material berrietan, industria-automatizazioan eta azpiegitura kritikoen ikuskapenean.

Proiektu nabarmenen artean, Frantziako Alhomna Systems startupak garatutakoa dago. Startup horrek Repsol-Petronorrekin lan egin du lohiak eguzki-energiaren bidezko lurrunketarekin tratatzeko soluzio batean. Haren SolarDry sistema modularrari esker, hondakin hezeen bolumena hondakin horiek sortzen diren lekuan bertan murriztu daiteke zuzenean, eta garraio-beharrak, tratamendu-kostuak eta CO2 gasaren emisioak txikiagotzen dira.

Eraikuntzan aplikatutako material berrietan, Euskadiko Photokrete startupak, Eika enpresarekin batera, teknologia fotonikoan eta material zeramiko mikroporotsuetan oinarritutako proiektu bat aurkeztu du, eraikinetan ultraisolamendu termikoa lortzeko helburua duena. Konpainiak egunez erradiazio bidezko hozte autonomorako ahalmena duten materialak garatzen ditu, gainazaleko tenperatura murriztera eta bero-boladek hiri-inguruneetan duten inpaktua arintzera bideratuak.

Era berean, Euskadiko We Are Clickers startupak adimen artifizialeko proiektuak aurkeztu ditu Xardexka ETEarekin eta Eustat sozietate publikoarekin batera. Kalitate handiko plater prestatuak egiten eta banatzen dituen Xardexka enpresarekin egindako proiektuan, adimen artifiziala aplikatu dute hornidura-katerako menu pertsonalizatu berriak sortzeko. Eta Eustatekin lankidetzan, indizeak automatikoki sortzeko proiektu batean lan egin du startupak.

Enpresa berriak eta programa integratua

11. edizio honetan, BINDek lau enpresa berri sartu ditu bere partnerren sarean: Exolum, garraioaren deskarbonizazioa bultzatzeko azpiegitura logistikoen garapenean espezializatua; Esergui, erregaien inportazioan, biltegiratzean eta banaketan diharduena; i+MED, ingeniaritza biomedikoan, nanomedikuntzan eta osasunean aplikatutako teknologien garapenean espezializatutako kooperatiba; eta ABB, elektrifikazioan, automatizazioan, robotikan eta industria-digitalizazioan erreferentziazkoa den konpainia teknologiko globala.

Entitate horiek bat egin dute 100 enpresak, ETEk eta sozietate publikok baino gehiagok osatutako sare batekin. Haien artean, Mercedes-Benz, ITP Aero, Iberdrola, Bellota, Talgo, Arteche, Tubos Reunidos, Eroski, Erreka eta GH Cranes daude. Erreferentziazko enpresa horiek prozesuak optimizatzeko, lehiakortasuna areagotzeko, jasangarritasunean aurrera egiteko eta sektore estrategikoen eraldaketa bizkortzeko gai diren teknologiak identifikatzeko parte hartzen dute plataforman.

Aurtengo edizioko berritasun nagusi gisa, BINDek ekimen bakar batean integratu ditu bere SME eta Corporate ekimenak, korporazio handien, ETEen eta startupen arteko sinergiak aprobetxatzeko, inpaktu handiagoko proiektuen sorkuntza errazteko eta euskal enpresa-sarearen behar teknologikoen eta mundu osoko startupek garatutako soluzioen arteko lotura indartzeko.

Zabalik mundu osoko startupetarako 11. deialdia

11. deialdian, BINDek produktu eta zerbitzu teknologiko disruptiboak dituzten bost kontinenteetako startupak bilatzen ditu, merkatuan edo garapen-fase aurreratu batean daudenak eta korporazioek eta ETEek planteatutako erabilera-kasuei balioa emateko ahalmena dutenak. Hautatutako startupek aukera izango dute erreferentziazko bezeroekin proiektu errealak garatzeko, merkatu-aukerak baliatzeko, beren soluzioak industria-inguruneetan balidatzeko eta nazioarteko proiekzioa duen berrikuntza irekiko ekosistema baten parte izateko.

Proiektuek industria efizienteago, lehiakorrago eta jasangarriago baterantz aurrera egiten lagundu beharko dute hainbat teknologiaren bidez. Teknologia horien artean, honako hauek aipa daitezke: adimen artifiziala, IoT-a, robotika, material berriak, automatizazioa, analitika aurreratua, droneak, energia garbiak edo industria-prozesuetan aplikatutako soluzio digitalak. Eta, horretarako, industria adimendunaren, antolamendu efizientearen, merkaturatzearen eta energiaren eta jasangarritasunaren arloetako 11 gai-multzoetako bati erantzun beharko diote, gutxienez. 

• Industria-instalazioen eta biltegien automatizazioa eta robotizazioa, eskuzko esku-hartzea murrizteko 
• Industria-aktiboen monitorizazioa, simulazioa eta mantentzea, akatsak aurreratzeko eta prozesuaren eta produktuaren kalitatea bermatzeko
• Industria-produktuaren bizi-zikloaren diseinua, fabrikazioa eta azterketa
• Floten kudeaketa, banaketa-logistika eta industria-mugikortasunaren elektrifikazioa
• Zibersegurtasuna, segurtasun fisikoa, langilearen osasuna eta arauak betetzea
• Barne-prozesuen digitalizazioa, ezagutzaren eta talentuaren kudeaketa erakundean
• Energia-efizientzia, kontsumoaren trazabilitatea eta ingurumen-inpaktuaren neurketa
• Ingurumen-inpaktuaren murrizketa eta kudeaketa: CO2 gasa, ura eta industria-hondakinak
• Energia berriztagarriak sortzea, biltegiratzea eta industria-inguruneetan integratzea
• Eskariaren iragarpena, hornidura-katearen kudeaketa eta merkataritza-adimena
• Bezeroarekiko harremana eta negozio-eredu berrien garapena

BINDen 11. edizioan parte hartzeko interesa duten startupek gaurtik, uztailak 2, irailaren 4ra arte aurkeztu ahal izango dituzte beren hautagaitzak, bind.spri.eus webgunean.

BIND 

BIND industria adimendunaren berrikuntza irekiko plataforma publiko-pribatu bat da, Eusko Jaurlaritzako Industria, Trantsizio Energetiko eta Jasangarritasun Sailak SPRI Taldearen bitartez sortua. Gaur egun, Euskal Autonomia Erkidegoan egoitza duten sektoreko 100 ETE, sozietate publiko eta erreferentziazko enpresa nagusirekin baino gehiagorekin lankidetzan dihardu. Ekimena helburu hirukoitzarekin sortu zen: euskal industria-ekosisteman startupen garapena bizkortzea, enpresen lehiakortasuna, efizientzia eta jasangarritasuna sustatzea, eta Euskadiko ekosistema industria-ekintzailetza aurreratuko hub gisa kokatzea. 2016. urteaz geroztik, 300 startup baino gehiago bultzatu eta 400 proiektu garatu dituzten 2 ekimen ditu BINDek. Informazio gehiago