HUPIk adimen artifiziala enpresa-erabakiak hartzera hurbiltzen du
HUPI 2014an sortutako enpresa teknologikoa da, adimen artifizialeko soluzioen garapenean eta industriarako sistema ziberfisikoen integrazioan espezializatua. Enpresak Bidarten eta Donostian ditu egoitzak, eta I+G aurreratuena benetako aplikazioetara eramateko lan egiten du, enpresei erabaki hobeak hartzen eta prozesuak optimizatzen laguntzeko.
“Adimen artifizialaren benetako balioa ez dago algoritmoetan bakarrik, baizik eta pertsonen egunerokotasunean integratzeko duen gaitasunean”, adierazi du Irati Rodriguez estrategia arduradunak. “Teknologiak erabiltzen dutenen zerbitzura egon behar du, eta onura ukigarri eta iraunkorra ekarri behar du”.
Hamalau laguneko lantaldea du HUPIk, eta lankidetza estuan aritzen da industria- eta zerbitzu-enpresekin, hala nola Safran, Fagor Arrasate, Arania eta Gestamp; hala, datu-bolumen handiak gomendio argi eta eraginkor bihurtzen dituzten irtenbideak garatzen ditu. Industria-inguruneen ezagutza sakona du oinarri bere lanak, bai eta planteamendu teoriko hutsen gainetik benetako erabilgarritasuna lehenesten duen metodologia ere.
Benetako industria-erronkei aplikatutako teknologia
HUPIren esperientziak energia, industria aurreratua, garraioa edo logistika bezalako sektoreak hartzen ditu. Energiaren alorrean, aktibo berriztagarrietan akatsak aurreikusteko iragarpen-ereduak garatzen ditu enpresak. Industrian, ikusmen artifiziala eta analitika aurreratua aplikatzen ditu kalitatea kontrolatzeko, ekoizpen-prozesuak optimizatzeko edo lantegiko langileei zuzeneko laguntza emateko. Garraioan eta logistikan, haren irtenbideek ibilbideak eta flotak optimizatzeko aukera ematen dute, eta zuzeneko eragina dute kostuetan eta emisioetan.
“Konponbide teknologiko bat proposatu aurretik arazoa ulertzea da gakoa”, dio Rodriguezek. “Askotan erronkarik handiena ez da teknikoa, hobetu nahi den erabakia behar bezala definitzea baizik”.
Konpainiaren ezaugarri bereizgarrietako bat pertsonengan zentratutako ikuspegia da. HUPIk erabiltzailea ardatz duten diseinu-metodologiekin egiten du lan. Metodologia horiek bermatzen dute soluzioak ekipoen lan egiteko modu errealera egokitzea eta ekoizpen-inguruneetan erabiltzea.
Enpresak aktiboki hartzen du parte berrikuntzaren euskal ekosisteman. Basque Artificial Intelligence Center-en (BAIC) parte da, eta SPRIk bultzatutako programetan parte hartu du, hala nola BIND 4.0, BIND 4.0 SME Connection eta BIND 4.0 GovTech. Esperientzia horiek funtsezkoak izan dira Euskadin finkatzeko eta enpresa handiekin eta ETEekin konektatzeko.
2025az geroztik, HUPIk, gainera, gobernantza kooperatiboaren eredu baten pean funtzionatzen du, euskal kooperatibismoaren printzipioetan inspiratuta, eta taldearen inplikazioa sendotzen du erabakiak hartzean eta epe luzeko enpresa-proiektuan.
Etorkizunari begira, konpainiak apustu egiten du bere eredu kooperatiboan sakontzeko, produktu propioen sorkuntzan aurrera egiteko, Europako proiektuetan duen presentzia indartzeko eta nazioarteko jarduera zabaltzeko. “Proiektuaren arima galdu gabe haztea da gure helburu nagusia, betiere teknologia pertsonen zerbitzura jarrita”, amaitu du arduradunak.
SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.
