Lemu Group, papera manipulatzeko erreferente baten anbizioa
Duela 60 urtetik Ibarran (Gipuzkoa) dago Lemu Groupen egoitza. Enpresak papera manipulatzeko eta eraldatzeko birbobinatzeko makinak egiten ditu, besteak beste, hauetarako: etiketak, biniloak, paper-poltsak, gutun-azalak edo laberatzeko papera. Enpresa-esparru horretan, Estatuan liderra izateaz gain, sektoreko nazioarteko ekoizle nagusietako bat ere bada. Gaur egun, hiru fabrikazio-zentro ditu Euskadin (Ibarra, Hernani, Gasteiz), eta bat Katalunian (Mataró). Bestalde, Mexikon eta Estatu Batuetan ere filialak ditu; hala adierazi du Iñaki Larrea CEOak Made in Basque Country programan.
Sei hamarkadako ibilbideari buruzko zer balantze egiten duzu?
1963an familia-proiektu gisa hasi zenetik, enpresak etengabeko bilakaera- eta egokitzapen-prozesua izan du hainbat garaitan, baina betiere, definitzen gaituen izaera familiarra eta apala mantenduz. Badakigu paperaren sektorean industria-tradizio aberatsa duen eskualde batean gaudela, baina munduko toki txiki eta periferiko batean, eta horrek gogor lan egitera bultzatzen gaitu nabarmentzeko eta aintzatetsiak izateko.
Zer testuingurutan sortu zen Lemu Group?
Demetrio Larreak abiarazi zuen enpresa-proiektua, Tolosako 40m2-ko tailer batean enkarguzko piezak mekanizatzeko helburuarekin. Demetriok ilusio, lan egiteko gogo eta anbizio handiz ekin zion proiektuari, eta belaunaldiz belaunaldi transmititu da hori. Gaur egun, erantzukizuna hirugarren belaunaldiarena da, eta egungo Taldea espiritu berarekin ari da enpresa gidatzen.
Enpresaren jarduera beti egon al da paperaren manipulazioarekin lotuta?
70eko hamarkadan jarduerak hazkunde nabarmena izan zuen, eta papera manipulatzeko makineria propioa diseinatzen eta fabrikatzen hasi ziren. Hasieran, jarduera garai hartako batuketak egiteko makinetarako eta kalkulagailuetarako paper-biribilkien ekoizpenean oinarritzen zen. Jarduerak handitzen jarraitu zuen eta enpresak dibertsifikazioari eta merkatu berrietara zabaltzeari ekin zion. Gaur egun, hasieran esan bezala, zazpi dibisio eta lau lantegiz osatutako talde bat ditugu, hiru Euskadin eta bat Katalunian. Gainera, Mexikon eta Estatu Batuetan ditugun filialek laguntza teknikoa eta komertziala ematen dute Amerikan.
Zein enpresek osatzen dute Taldea une honetan?
Hauek dira Euskadin ditugun instalazioak: Mida Gasteizen, Robolan Hernanin eta Ibarrako (Lemu) gure egoitza nagusia dira. Katalunian, berriz, Mataroko Conveq dago. Erosketa horiek estrategia espezifiko batekin daude lerrokatuta. Guztiek, Robolanek izan ezik, papera manipulatu eta eraldatzen dute. Bestalde, Robolan ingeniaritza robotikoan dago espezializatuta. Lau fabrikak ezin hobeto uztartzen dira, bakoitza eremu jakin batean espezializatzen baita, guztiek zazpi dibisioetarako makineria fabrikatzen laguntzen duten arren.
Hitz egiguzu espezialitate horiei buruz…
Mida, adibidez, etiketetan zentratzen da. Aurrez inprimatutako etiketak balio erantsi handiko produktu bihurtzen ditu diseinu digitalen bidez, hala nola estanpatuak eta erliebe serigrafikoak eginez, eta, ondorioz, aurrez inprimatutako etiketen bobina soilak premium etiketa bihurtzen ditu zenbait merkatutarako, esaterako, ardogintzaren edo edertasunaren merkaturako. Mataroko Conveq enpresan, bestalde, gure makinak hainbat materialetako bobina handiak mozteko eta diametro txikiagoko biribilki bihurtzeko diseinatuta daude, eta, horrela, produkzio-premia desberdinetara egokitzen dira. Eta Ibarrako gure lantegian birbobinatzeko makinetan espezializatuta gaude aplikazio sorta zabal bati erantzuteko, esate baterako, datafono eta loteriarako biribilki termikoetatik hasi eta labeko paperera arte, baita balantzetarako eta logistikarako etiketak, plotter eta binilo-biribilkiak, eta paperezko poltsak eta gutun-azalak ere. Funtzio nagusia aplikazio industrial desberdinetarako paper-oinarria duten hainbat material moztea eta birbobinatzea da. Garrantzitsua da azpimarratzea lantegi horiek jatorri familiarra dutela, gurea bezala, eta balio berberak dituztela.
Zer funtzio betetzen du birbobinatzeko makina batek?
Gure makinek azken produktuen aukera zabala fabrikatzen dute, dibisioen arabera. Esate baterako, logistikarako etiketez ari gara, produktuen pisua eta kostua adierazten duten balantzetarako etiketez, edo premium etiketez, atxikitzen zaizkion produktuari balioa ematen dioten ardo-botilen etiketak esaterako. Halaber, balioa ematen diegu saltokietatik eta loteriatik eratorritako produktuei (datafonoetarako paper-biribilkiak eta supermerkatuetako erosketa-tiketak, baita loteria-biribilkiak ere), plotter eta biniloei, gutun-azalei eta paperezko poltsei (eskaeretarako edo eramateko janarietarako banaketa), enbalaje malguari (elikagaiekin kontaktuan jartzen diren materialak, hala nola aurrez prestatutako janari-erretiluetarako estalkiak, isuriak saihesteko diseinatuta), edo bihurketari oro har (bobina handiak moztu eta birbobinatzea, bezeroaren beharren arabera, hala nola erretzeko papera edo paperezko lastotxoak).
Papera plastikoaren soluzio antagoniko gisa…
Papera gero eta garrantzitsuagoa da eguneroko bizitzan. Paperak plastikoak ez duen jasangarritasuneko oinarria eta kontzeptua ditu. Gizartea kontzientziatuago dago produktuen jasangarritasunaren eta birziklagarritasunaren inguruan, eta guk, gure makinekin, plastikoa paperarekin ordezkatzen laguntzen dugu; beraz, etorkizun oso positiboa ikusten dugu. Nitxo askotan papera da aukerarik gogokoena, hala nola paperezko poltsak plastikoaren ordez eta labeko papera aluminioaren ordez.
Oraingoz, erregulazioek mesede egiten digute, baina adi gaude etorkizunean sor daitekeen edozein aldaketaren aurrean.
Zer aurreikuspen ditu Lemu Groupek 2024rako?
Salmentei eta hazkundeari dagokienez, oso urte positiboa izango da. Gure egungo helburua taldea egituratzea eta etorkizuneko ekintzetarako norabide argi eta bateratua ezartzea da.
Lotutako albisteak
MEPRO Medical Reproductive Solutions, gizarte-helburu teknologia: ugalkortasun maskulinoa berritzen
Gure helburua osasun-profesionalei eta bikoteei antzutasunaren erronkei aurre egiteko tresna berritzaile, seguru eta eraginkorrak eskaintzea da
Aloka, profesionalen artean ikus-entzunezko materiala alokatzeko plataforma
Gipuzkoako startup-ak hainbat ekipo eskaintzen ditu, hala nola kamerak, grabagailuak, mikrofonoak, droneak. Mobile World Congress-eko 4YFN biltzarrean parte hartu zuen, SPRI Taldeak kudeatutako stand batekin, webgunea inbertsore eta bezero potentzialei aurkezteko.
Metagra, mende erdiko berrikuntza automobilgintzarako hotzeko estanpazioan
Bergarako enpresa pieza konplexuen fabrikazioan sendotu da, jasangarritasunaren eta berrikuntzaren alde eginez.
Jon Ander Egaña: “BASQUE FOOD CLUSTERrek elikadura euskal industriaren sektore estrategiko gisa kokatzea lortu du”
Elikatze-katearen euskal elkartea 150 enpresa eta erakunde baino gehiagoren lehiakortasuna hobetzeko lanean ari da, berrikuntzaren garapenarekin, lankidetza-proiektuekin eta teknologien integrazioarekin.
Siteco, 30 urte automatikoki ordaintzeko makinak ekoizten
Arabako enpresak administrazio publikoarekin eta ostalaritza sektorearekin egiten du lan, eta urteak daramatza nazioarteko merkatuan.
Mecanizados Patro enpresak “fidagarritasuna, segurtasuna eta eraginkortasuna” eskaintzen ditu trenbide-sektorean
Serie laburretarako eta luzeetarako pieza espezifikoak fabrikatzen ditu enpresa arabarrak, doitasun handiko lan-tresna eta makinekin.
Icónica, errotulua artelan bihurtzen denean
Arabako enpresa da kartelak fabrikatzen dituen Euskadiko azken enpresetako bat. Hain zuzen ere, bost hamarkada daramatza lanean eta teknika eta artisautza uztartzen ditu bere produkzioak
Lorra, lau hamarkada inguru Bizkaiko nekazaritzako elikagaien kooperatibismoaren funtsezko zutabe gisa
Gaur egun, erakundearen lehentasuna zahartutako sektore honetako erretiroak ordezkatzea da, belaunaldi-erreleboaren bidez.
Utilmaik tresna industrial aurreratuak diseinatzen ditu ekoizpen industriala optimizatzeko
Bizkaiko enpresak berrikuntza eta ezagutza teknikoa uztartzen ditu funtsezko sektoreetan mekanizazio-prozesuak hobetzeko, hala nola garraioan, makineria astunean eta aeronautikan.
AVVI laguntzaile birtualak etxebizitzen salmenta eraberritu du, etxeak eraiki aurretik bisitatzeko aukera ematen baitu
Trivima enpresa donostiarrak soluzio berritzaile bat garatu du, salmenta epeak murriztu eta transformazioa areagotzen duen esperientzia interaktiboa ahalbidetzen duena.