Amaia Rebollo (Graphenea): “UltraSansek garaiz diagnostikatzen laguntzen du eta obesitatea eta sindrome metabolikoa kudeatzen du”
Grapheneak, 2010ean sortutako enpresa teknologikoa eta grafenoaren ekoizpenean mundu mailako liderra, Europako sei herrialdetako hamar entitatek osatutako UltraSense proiektu europarrean parte hartzen du. Sentsore anitzetan oinarritutako wearable plataforma berritzaile bat garatzea du helburu, teknologia aurreratuak konbinatzen dituena, hala nola ultrasoinuak, bioinpedantzia eta grafenozko biosentsoreak. Amaia Rebollok, Grapheneako proiektuen kudeatzaileak, azaldu duenez, irtenbide honek “osasunaren monitorizazio deszentralizatua ahalbidetuko du, gorputz konposizioari eta biomarkatzaileei buruzko informazio zehatza emanez etengabe eta ez inbaditzaileki”. Europar Batasunak finantzatzen du, Horizon Europe erakundearen bidez, eta zazpi milioi euro inguruko aurrekontua du.
Graphenea euskal enpresak UltraSense europar proiektuan parte hartzen du. Zer helburu du?
Proiektuaren helburua obesitatea eta sindrome metabolikoa saihesten eta kudeatzen laguntzeko diseinatutako gailu eramangarri bat (wearable) garatzea da, banda elastiko moduan. Horretarako, hiru teknologia konbinatzen ditu aparatu bakar batean: ultrasoinuak, bioinpedantzia (gorputzaren konposizioa neurtzeko) eta grafeno-sentsore berritzaile bat, Grapheneak izerdi-biomarkatzaileak aztertzeko garatua.
Grapheneak funtsezko zeregina betetzen du grafenoan oinarritutako biosentsoreen garapenean (G-FET), hau da, sistemaren hiru teknologia nagusietako batean.
Material berrietan dugun esperientzia eskaintzen dugu. Zehazki, kalitate handiko grafenoa fabrikatzen dugu, eta GFET gailua garatzen dugu biosentsore malgu gisa. Biosentsore malgu horrek izerdiaren bidez analizatzen ditu osasun-markatzaileak, azkar eta odol-analisirik egin gabe.
Zein fasetan dago proiektua?
Lau urteko ikerketa eta garapen proiektua da eta ekuatorea pasa berri dugu. Lehenengo zatian, materialen espezifikazioak eta sentsore-konpartimentuen diseinua landu ziren, eta, orain, sentsoreak fabrikatzeko eta baliozkotzeko prozesuetan jartzen da arreta.
Orain arte, zer emaitza lortu dira?
Momentuz, emaitzak espero bezala doaz. Sentsoreen konpartimentuak fabrikazio-fasean daude dagoeneko, eta lehenengo neurketak oso egokiak dira.
Zer eman dezake proiektuaren azken emaitzak?
Jauzi berritzaile handia da osasunari eskainitako gailu eramangarrietan. Jarraipena etengabe, deszentralizatuta eta modu ez-inbaditzailean egiteko gai den sistema ekarriko du. Edozein pertsonari ahalbidetuko dio bere egoera fisikoa zehaztasun medikoarekin monitorizatzea, bizimodu osasungarria sustatzea eta obesitateari eta sindrome metabolikoari lotutako gaixotasun larriak goiz detektatzea, etengabe ospitalera joan beharrik gabe.
Zer abantaila eskaintzen ditu plataforma berriak?
Bere abantailarik handiena punta-puntako hiru teknologiaz egituratutako banda elastiko eta eroso bakar batean integratzea da. Gaur egungo erloju adimendunek ez bezala, UltraSense-k ultrasoinuak, bioinpedantzia eta, berrikuntza handi gisa, grafenozko biosentsoreak (GFETak) konbinatzen ditu. Grafenozko sentsore hauek beren muturreko sentikortasunagatik nabarmentzen dira: izerdia denbora errealean aztertzeko eta biomarkatzaileak kantitate minuskuletan detektatzeko gai dira, datu azkar eta zehatzak lortuz giza gorputzera egokitzen den formatu malguan.
Zein negozio-hobirentzat zuzenduta dago?
Proiektuak bi aplikazio nagusi ditu: erabilera mediko bat (obesitatea edo sindrome metabolikoa izateko arriskua duten pazienteak kontrolatzeko) eta bizitza-estiloaren erabilera bat (pertsona sedentarioei osasuna eta forma fisikoa hobetzen laguntzera bideratua).
Zer plan edo helburu ezarri zaizkio enpresari proiektu honekin?
Graphenearentzat proiektu hau giltzarria da gure GFET sentsoreak osasun sektore zorrotzean probatzen eta finkatzen aurrera egiteko. Gailu eramangarrietarako (wearableak) kalitate handiko materialen hornitzaile gisa finkatu eta gure produktu-katalogoa zabaltzeko aukera emango digu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu. Gainera, laguntza- eta zerbitzu-programetara sar zaitezke.
