Eguztek, etxerako eguzki-babeseko sistemen muntaketaren eta instalazioaren arrakasta
Eguztek Control y Protección Solar Gernikan kokatutako start-upa da, eta jardunean daramatzan hiru hilabeteetan arrakasta handia lortu du. Etxebizitzetarako eguzki-babeseko hainbat sistemaren muntaketan eta profesionalentzako banaketan egiten du lan: eltxo-sareak, barruko dekorazioa, pertsianak, toldoak eta pergolak, besteak beste.
Enpresa Juan (Pari) eta Pedro Pazos anaiek sortu zuten, eta eguzki-babesaren sektorean 30 urteko esperientzia dute, pertsiana eta estoreekin, toldo eta pergolekin eta abarrekin lotuta. “Jendeak energia aurreztea eta erosotasuna bilatzen ditu, eta guk izan ditzaketen arazoen aurrean irtenbideak eskaintzea dugu helburu”, azaldu du Juan Salvador Pazosek.
Eguztekek ezaugarri nagusietako bat sektoreko berrikuntza handienak eskaintzea da. “Marka eta kalitate onenekin egiten dugu lan, prezio lehiakorrean”.
Produktu-eskaintza zabala da: eltxo-sareak, barne-dekorazioa, pertsianak, toldoak, pergolak eta etxebizitzaren automatizaziorako sistema mota guztiak. Profesionalak dira haien bezeroak: “toldoak muntatzeko deitzen digute, adibidez. Produktu horiek saltzen dituzten dendek muntaketa-lanak egingo dizkieten profesionalak behar izaten dituzte”.
Haien indargune nagusia produktu horien muntaketa eta banaketa da, automatizazioarekin eta domotikarekin batera. “Horri esker, bezeroak bere pertsianen funtzionamendua mugikorraren bidez kontrolatu dezake”.
Fabrikazioan pilatutako esperientzia handiari esker, multinazional guztietako banatzaileekin harreman zuzena dute. “Hainbat markatan espezialistak diren enpresa gutxietako bat gara. Badira, esaterako, pertsiana mota batzuk guk bakarrik muntatzen ditugunak.
Pertsianetarako motorren arloan, hainbat markatako sail teknikoa ere kudeatzen dute. Eta pergola bioklimatikoen banaketaz ere arduratzen gara”. Jarduera nagusia Euskadin kokatzen da, “baina, eskariari erreparatzen badiogu, inguruko probintzietara ere joan gintezke. Hala ere, nahiago dugu hemen zentratu eta kalitatezko zerbitzua eskaini”.
Lehia handiko sektorea da. “Eguzki-babeseko sistemak instalatzen dituzten pertsona asko daude, baina profesionalentzat soilik instalazio-lanak egiten dituztenak oso gutxi dira”. Hiru hilabeteotan, dagoeneko 50 bezero profesional inguruko zorroa osatu dute. Modelo ezberdinetako 30 toldo, hiru pergola bioklimatiko; eta pertsianetarako 50-60 motor inguru muntatu ditugu. Horrez gain, 100 eltxo-sare baino gehiago instalatu ditugu. Gero eta eskari handiagoa duten produktuak dira”.
Etorkizunari begira, erronka nagusia jarduerari eustea da, “azken hiru hilabeteotan arrakasta handia lortu baitugu. Ez genituen datu hauek espero; lokala txiki geratu zaigu eta langile gehiago behar ditugu. Enpresa ugari ari zaizkigu haien instalatzaile izateko deika, baina momentuz ez gara guztira iristen.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
