Urs Spain, azkartasunari eta teknologiari esker kudeaketa-sistemen ziurtagiri-emaile handiekin lehiatzen ari den enpresa
Urs Spain Derion dago, eta kudeaketa-sistemen ziurtagiriak eskaintzen dituen URS Holdings multinazionalaren Espainiako delegazioa da. Zazpi urteko ibilbidea du eta azkartasuna da bere bereizgarria, sektore horretan prozesuak motelak izaten baitira. Nazioarteko araudiei eta estandarrei buruzko prestakuntza-linea bat jarri berri du martxan.
Enpresa 2018an sortu zen, Bilboko erdiguneko bulego txiki batean. Hiru pertsonako lantaldearekin, URS Holdings taldearen Espainiako delegazioa bihurtu zen. Enpresa horrek 30 urtetik gorako esperientzia du ziurtagirien eta ISO araudien sektorean, eta 60 herrialdetan dago presente.
“Erronka iruditu zitzaidan, beti gustatu baitzait ekintzailetza. Aukera askoko sektorea izan zitekeela uste genuen”, azaldu du Nora Arbués Fernándezek, Urs Spaineko CEOak. Proiektua hasi berritan pandemia iritsi zen, “eta negatiboa izango zela uste genuen arren, guztiz kontrakoa izan zen. Egokitzeko gaitasun azkarrik izan ez zuten enpresa handien aurka lehiatzeko aukera izan genuen. Urte nahiko positiboa izan zen konpetentzia handia eduki arren”.
Enpresaren hazkundea zela eta –100 auditore ditu Espainian-, Deriora mugitu ziren 2021ean.
Urs Spain kudeaketa-sistemen ziurtagiri-emailea da. “Mota guztietako ISO araudiak egiten ditugu hainbat sektorerentzat; auditoretzaz arduratzen gara eta ziurtagiriak igortzen ditugu. ISO ziurtagiriak ateak zabaltzen ditu, konfiantza sortzen die bezeroei eta hornitzaileei, lizitazio publikoetara aurkezteko aukera ematen du eta, batez ere, barne mailan ordenatzera eta prozesuak ondo definituta eta kontrolatuta izatera behartzen ditu erakundeak. Funtzionamendu segurua baimentzen du”.
Mota guztietako sektoreak ditu bezero; automobilgintza, aeroespaziala, turismokoa, zerbitzuak, administrazio publikoa, garraioa eta logistika eta eraikuntza.
Hazkunde jarraitua
14 langile ditu plantillan, “baina kopurua handitzen ari da, praktiketako ikasleak izaten baititugu urtero, prestakuntza eskaintzeko eta haien ibilbidean proiekzioa izaten laguntzeko”. Urtean bi milioi euro inguruko fakturazioa du, eta hazkunde jarraitua izan du urtetik urtera: 2024ko ustiapenaren emaitza aurreko ekitaldikoaren bikoitza izan zen ia. Horrek erakusten du diru-sarrera gero eta altuagoak izateaz gain, eraginkortasun operatiboa ere orduan eta handiagoa dela.
Kasu horretan, I+G azkartasunarekin dago lotuta. “Sektore honetan hamarkadak daramatzate egitura astunekin eta prozesu motelekin lanean, eta guk guztiz kontrako apustua egin dugu. 24 ordutan ematen diegu aurrekontua, egunak behar ditugu auditoretzak planifikatzeko eta ez asteak, eta ziurtagiria ere egun batzuetan igortzen diegu. Azkartasuna izan da arrakasta lortzeko eta konpetentziatik bereizteko gakoa”.
Konpainiak adimen artifizialaren barne-programak ditu prozesuak kontrolatzeko. “Aginduak ematen dizkigu. Eta gure lantaldea benetan baliagarria den horretan zentratu daiteke: bezeroarekiko harremanean eta auditoretzen kalitate teknikoan. Prozesu bakoitza pertsonalizatzen saiatzen gara, egokituen dagoen auditorea aukeratuz, plangintza errazagoa izan dadin eta jarraipen erreala egon dadin”.
Erronkak dira Urs markaren ikusgarritasuna handitzea, eta “dagoeneko indartsu gauden merkatuetan egonkortzea eta potentzial gehien dugun lekuetara iristea. Enpresen elkarteetara, ikastetxetara, klusterretara eta foroetara iritsi nahi dugu. Finkatu ostean, hedapen-puntuan gaude”.
Gainera, Iso Training Center Spain izeneko prestakuntza-linea bat sortu du Urs Spainek, “araudiei eta nazioarteko estandarrei buruzko prestakuntza teknikoan eta profesionalean espezializatuta, behar hori ikusten dugulako araudi berrietan. Esaterako, adimen artifizialaren araudia atera da baina jendeak ez daki. Online prestakuntzarako plataforma sortu dugu, hainbat ad hoc modalitaterekin. Ikusi genuen gure bezeroek, aholkulariek eta auditoreek prestakuntza tekniko eguneratua behar zutela, eta erabaki genuen guk geuk eskaintzea prestakuntza hori”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
