Euskal enpresaren blog-a Zure enpresarentzat garrantzitsua den eguneroko informazioa

14 iraila, 2020
3R3D Technology Materials: neurrira eginiko 3D inprimagailuak eta inprimatzeko material berriak

Enpresa gipuzkoarrak ekojasangarritasunaren aldeko apustua egin du fabrikazio gehigarriko material berriak garatzeko

 

3R3D Technology Materials erreferentziazko konpainia da Euskadin 3D inprimaketako material termoplastikoen garapen eta salmentan. Irungo enpresa horrek prestazio handiko material birziklatuak ikertzen ditu, eta duela aste batzuetatik aukera ematen die bere bezeroei 3D inprimagailuak neurrira egiteko eta, horrela, proiektu zehatzei erantzuteko. 3R3D Technology Materials enpresako zuzendari nagusi Josu Aseguinolazarekin hitz egin dugu fabrikazio gehigarriaz eta enpresetan duen inpaktuaz.

 

Zein da 3R3D Technology Materials enpresaren jarduera?

Fabrikazio gehigarrirako edo 3D inprimaketarako material termoplastikoen ikerketa, garapena, fabrikazioa eta salmenta. 3D inprimaketako zerbitzuak ere eskaintzen ditugu enpresa eta partikularrentzat, eta hainbat markatako 3D inprimagailuen banatzaileak gara. 2016tik -martxan jarri ginenetik- lan egin izan dugu automozio, bioteknologia eta, besteak beste, dekorazio sektoreetako enpresekin. Une honetan, prestazio handiko 3D inprimaketako materialak lantzen ari gara medikuntzaren sektorerako eta ekonomia zirkularrarekin zerikusia duen guztirako. Ekonomia zirkularraren kasuan, batik bat erreparatzen diogu ekojasangarritasunari, bio jatorria duten eta petrolioarekin zerikusirik ez duten material birziklatuak prozesatzeko, eta orobat plastikoa eraldatzeko prozesu desberdinei.

 

Zein da zuen ekarpena ekonomia zirkularraren eta jasangarritasunaren arloetan?

Material interesgarriak garatu ditugu, munduan aitzindariak direnak. 3D inprimaketako material berriak sortu ditugu portuetan botatzen dituzten arrantza-sareekin. Hondarribiko ikastola batean ikasleek urtebetez bildutako plastikozko tapak birziklatu ditugu. Produktu berriak sortu ditugu dentsitate handiko poliestirenoa edo polipropilenoa erabiliz. Filamentu bat sortu dugu ur botiletako eta opil erretiluetako PET materialarekin.

 

Beste fabrikazio-prozesu batzuetako hondakinak bildu ditugu (adibidez, aroztegietan eta altzarien fabrikazioan pinu, astigar edo kortxoarekin lan egitean sortzen den zerrautsa), eta zuntz organiko horiek materialari gehitu dizkiogu prestazio berriak lortzeko. Animalien hezurrekin ere lan egin dugu, izan ere, animalien hezur mikronizatuak aprobetxatu ditugu garezurren biomodeloak egiteko, hezkuntzan erabil ditzaten ikasleei erakusteko edo ebaketa aurre-kirurgikoetan entseatzeko, hau da, zirujauak ebakuntza egin dezan eta hezurrarekin lan egitean izango lukeen sentsazioa esperimentatu dezan. Argindar eroaleak diren filamentuak ere landu ditugu. Ez dute zirkuitu integratuak egiteko besteko eroankortasunik, baina hainbat aplikazio izan ditzakete, adibidez, LED argiekin.

 

Era berean, kontsumigarriak itzultzeko hainbat programa abiarazi ditugu, fabrikazio gehigarriko prozesuetan erabiltzen diren elementu desberdinak (adibidez bobinak) berriz birziklatzeko.

 

4.0 Industriaren arloko 3D inprimaketa metalezko fabrikazio gehigarriarekin lotu ohi da. Baina zuek prozesu berriak dauzkazue eskuartean, WAAM edo hauts geruzen fusioaz (PBF) harago, ezta?

Ez ditugu ondo ezagutzen metalezko 3D inprimaketan erabiltzen diren teknologia desberdinak, baina badago bat gero eta gehiago indartzen ari dena: eduki metaliko handiko filamentu termoplastiken erabilera. Plastikozko objektuak sortzeko erabiltzen dugun FDM teknologia (filamentu urtuzko geruzak ezarriz modelatzea) bera da, baina filamentuek eduki metaliko handia dute. % 80 edo % 90eko portzentajeetara irits daitezke. Pieza fabrikatu ostean, material aglomeratzailea lurrundu egiten da eta metalezko pieza bakarrik gelditzen da.

 

Nolako konponbideak eskatzen dizkizuete zuen bezeroek?

Enpresa industrialek materialak eskatzen dizkigute gehienbat, euren produkziorako tresnak inprimatzeko euren 3D inprimagailuetan (prototipoak, txantiloiak eta produkturen batean txertatzen diren amaierako piezak ere bai).

 

Enpresek 3D inprimaketako zerbitzuak eskatu dizkigute gure sorreratik, eta kontsultak egin dizkigute jakiteko zein den euren jarduera zehatzerako behar duten inprimagailua; horregatik hasi ginen inprimagailuak banatzen. Gaur egun, koronabirusaren arazoa dela eta, nola jaitsi egin den 3D inprimagailuen salerosketa, aukera ematen diegu baldintza desberdinen araberako inprimagailu pertsonalizatu bat fabrikatzeko (tamaina, bolumena, estrusioaren kalitatea, e.a.). Badaukagu gaitasuna horrelako inprimagailuak muntatzeko gure instalazioetan. Badakigu nola funtzionatzen duen 3D teknologiak, eta nonahi aurki daitezkeen elementuekin eraiki ditugu gailu horiek. Ez dugu marka bat sortu, baina nahiko inprimagailu handiak dira (1 eta 1,5 metro artekoak), eta proiektu zehatzak garatzeko balio dute bai enpresentzat, bai administrazioentzat eta bai bestelako antolakunde batzuentzat.

 

Zeintzuk dira fabrikazio gehigarriaren abantailak erauzketako beste fabrikazio metodo tradizional batzuekin alderatuta?

Fabrikazio gehigarria oso garrantzitsua da 4.0 Industrian. Oinarrizko tresna da fabrikazio aurreratuaren arloan, diseinu digitalak objektu fisiko bihurtzen dituelako. Gainera, gai da konplexutasun geometrikoa eta muturreko pertsonalizazioa bezalako erronkei aurre egiteko, eta beste fabrikazio-prozesu batzuk baino askoz merkeagoa da. Bestalde, aipatzekoak dira ingurumen jasangarritasunaren arloan dauzkan abantailak ere: material gutxiago erabiltzen da objektuak ekoizteko, aukera handiak ematen ditu berrerabiltzeko edo birziklatzeko, karbono aztarna  murrizten da, piezen pisua murrizten delako, eta aukera ematen du bestela sortu ezingo liratekeen geometriak sortzeko.

 

Zeintzuk dira zuen etorkizuneko erronkak?

Gipuzkoako Ganberarena bezalako nazioartekotze-programekin jarraituko dugu, nazioartean ikusgarritasuna lortzeko. Marketin digitaleko aurrekontu bat izan nahi dugu geure burua ezagutzera emateko eta ikusgarriago bihurtzeko. Halaber, aurrera jarraituko dugu inprimatze bolumen txiki-ertain eta handiko 3D inprimagailu pertsonalizagarriak sortzeko negozio-ildoarekin. Baina, batez ere, aliatu estrategikoak eta finantzaketa bilatu nahi ditugu hurrengo negozio-planari ekiteko, zeinetan langile gehiago hartuko ditugun. Badugu proiektu bat, beste enpresa batzuekin batera esleitu zaiguna, fabrikazio gehigarriaren bidez osasun zentroetarako bio material berriak ikertzeko (BIO3D proiektua Eusko Jaurlaritzako Hazitek programaren barruan) eta horixe da bi urte eta erdiko epean izango dugun proiektu garrantzitsuena.

 

Arantxa Tapia: “Aurrera egin behar dugu, ez da inbertsioak atzera botatzeko momentua”

Eragile guztiekin lanean ari gara etorkizuneko Industria Plana prestatze aldera. Industria...Leer más

Ceit lidera un proyecto internacional para reducir el riesgo de la industria aeronáutica
Basque Industry 4.0 17 iraila, 2020
Eusko Jaurlaritzak SPRI Taldeko zuzendari izendatu du Aitor Urzelai Inza

Ekintzailetza, Berrikuntza eta Informazio Gizarteko zuzendaria 2013tik, Alex Arriola ordezkatuko...Leer más

Alex Vea, Chief Strategy Officer de Smowltech
“Gure online-ikasleak identifikatzeko zerbitzuen eskaria % 500 handitu da 2020an”

Goi-mailako irakaskuntza demokratizatzea eta teknologia berrien bidez unibertsitateen edo...Leer más

Linkedin-a

Eguneroko informazioa, jarduera-sektoreka eta intereseko
hartzeko.

Laguntza berriei buruzko azken orduko albisteak

ETEentzako, merkatuak dibertsifikatzeko, atzerriko bekak, nazioarteko lizitazioak, itzuli beharrik gabeko dirulaguntzak esportazioak sendotzeko, ezarpenak egiteko laguntzak edo nazioartekotzeko prestakuntza espezifikoa.

Interesgarria, ezta?