Barna, duela 60 urtetik ekonomia zirkularra erabiltzen duen Bermeoko enpresa
Barna Bermeoko enpresa da, eta aitzindaria da bai Euskadin, bai estatuan ekonomia zirkularra ezartzen, duela jada 60 urtetik. Konpainiak arrainaren soberakinak berrerabiltzen ditu irinak eta olioak ekoizteko, eta animalientzako pentsua fabrikatzen da horiekin. I+G jardueraren aldeko apustuak giza kontsumorako produktu berri bat asmatzera eraman du, haren ikerketa bukatuta du jada, eta ekoizteke dago.
Enpresa Bermeon sortu zen 1961ean, eremuko industria kontserbagileko enpresarien talde baten ekimenez, «arrainaren azpiproduktuak kudeatzeko beharra dela-eta», azaldu du Iñaki Aramburuk, Barnako I+G arloaren arduradunak.
Hasieran aprobetxatzen zituzten arrainen artean zeuden atuna, hegaluzea, sardinak eta berdela. Baina arrantza-sektorearen beherakadarekin batera, lehengaiak gutxitzen doaz eta beste merkatu batzuk bilatu behar dituzte. Haien lehengaiak hemen lortzen dituzte orain: kontserbagileak, arrain ketuak xerratzen dituzten enpresak, saltoki handiak, supermerkatuak eta arrandegiak. Mundaka eta Cadizeko bi instalazioen artean, urtean 60.000 tona kudeatzen dituzte.
Gainera, Barnak duela sei urte «Harinas de Andalucía» enpresa eskuratu zuen, Tahivillan (Cádiz) jarduera hedatzeko. Azken mugarri garrantzitsua urte honetan bertan izan da, ETSA taldeak Barnaren % 100 erosi baitu. Horrela, arrain-irinen negozia zabaldu egin da haragi-irinen sektorera, horretan baitago espezializatua ETSA.
60 urte hauetan mantendu den ekonomia zirkularreko prozesu jasangarria da, eta ahalik eta hondakin gutxien izatea du helburu. «Ez ditugu baliabideak kontsumitzen, lehengaiak berrerabiltzen ditugu eta azpiproduktua kudeatzen dugu».
Animalien elikadura, akuikultura eta pet food dira bere bezero diren sektore nagusiak. 120 langile dira guztira eta urteko fakturazioa 35 milioi euro ingurukoa da. Salmentak batez ere estatuan egiten dira.
I+G funtsezkoa da Barnarentzat, eta duela 11 urtetik dago ezarria, jarduketa bakoitzean 500.000 euroko batez besteko inbertsioa eginda. «Lehengaien kantitatea egonkorra da, eta, gero eta lehiakortasun gehiago dagoenez, ezagutza sortzearen aldeko apustu estrategikoa egin genuen. Cadizeko instalazioa erosi genuen proteina hidrolizatuaren linea bat duen bakarra delako. Proteina hori digerigarriena da, eta animaliek energia gutxiago xahutzen dute metabolizatzeko. Eta badakigu immunitate-sistema hobetzen duela, mikroorganismo patogenoen aurkako defentsaren bidez». Apustu horrekin, haien produktuaren balioa lau aldiz handitzea lortu dute.
Horrez gain, Barna giza kontsumorako produktu berri bat ekoiztear dago. Produktu horrek askotariko fabrikak eta ekipoak behar ditu, baita kontrol askoz ere sakonagoak ere.
Enpresak eskertzen ditu SPRI Taldeak eta Aldundiak berrikuntza-ikerketarako emandako laguntzen programak, eta orain, haren erronka da integrazio ona lortzea jabe berriekin, «penintsulako azpiproduktu guztiak kudeatzea eta ahalik eta lehengai gehien lortzea». Gainera, haren politikari jarraituko dio, «% 100 tokiko» enplegua izateko, baita inguruko ekintza kulturalak eta sozialak sustatzeko ere, Urdaibaiko arraun-klubari emandako babesarekin burutuak, Bermeoko edo Behargintzako frontoian.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
