Hepyc Manufacturing, hariztaketa-tresnetan liderra

Hepyc Manufacturing Hernaniko enpresa liderra da hariztaketa-tresnetan, eta bere fakturazioaren % 4 bideratzen du I+Gra. Salmenten % 35 atzerrira bideratzen du. Enpresak SPRI Taldearen Konpetentzia Digital Profesionalen programaren dirulaguntza jaso du, Euskadiko enpresak osatzen dituzten pertsonen ezagutzak garatzen eta indartzen laguntzeko.

Hepyc Manufacturing 1947an sortu zen Hernanin hariztaketa-tresnak fabrikatzeko. Hasieran, tokiko enpresa bat izan zen, eta sektoreko beste enpresa baten filial gisa jarduten zuen maila nazionalean. Herramientas Castillo zen enpresa hori.  Gaur egun, euskal familiena da eta guztiz independentea da. Pertsona bakarreko sozietate anonimo gisa jarduten du. “1996an, enpresaren egungo zuzendaritza sartu zenean, modernizazio-prozesua hasi zen, instalazio berriekin eta hobetutako prozesuekin. Horren ondorioz, 2001ean ISO 9001:2000 kalitate-zigilua lortu genuen”, azaldu du Marcos Tejada zuzendari komertzialak.

2004an, nazioartean zabaltzen hasi ginen eta gertuko merkatuetan sartu ginen, hala nola Frantzian eta Portugalen.  2009an, hariztatzeko ardatzak fabrikatzen dituen Kataluniako Mecánica Fenix enpresa erosi zuen, «eta 2017an fabrika berria eraikitzen hasi ginen Hernanin, 4.0 kontzeptuan oinarrituta, makina berriekin eta ekoizpeneko langile berriekin».

Hepyc Manufacturingek ebaketa-erremintak fabrikatzen eta merkaturatzen ditu, hala nola barautsak, hariztatzeko ardatzak eta fresak. “30.000 erreferentziaz osatutako katalogoko tresna normalizatuak, zein planoaren araberako tresna bereziak fabrikatzen ditugu”. Ekoizpenaren industriarekin eta MROrekin (mantentze-lanak, konponketak eta operazioak) egiten du lan.

Ia 30 langile ditu eta urteko fakturazioa 7 milioi eurotik gorakoa da. Negozioaren % 35 atzerrian dago.  “Gure tresnak 40 herrialde baino gehiagotan daude gure banaketa-sareari esker. Eta nazioarteko merkatuan liderrak gara hariztaketa-tresnetan”.

I+G+b sail espezifikoa du eta azken teknologia du neurtzeko ekipoetan, diseinuan eta kalitatearen kontrolean. “Ekipo horien artean Zoller Genius Thread Check nabarmendu behar da argi eta garbi, distortsiorik gabeko neurketak egiteko aukera ematen baitigu”. I+Gko ekipoa lanaldi osoko 3 langilek osatzen dute eta enpresaren fakturazioaren % 4 bideratzen da ikerketara eta garapenera.

SPRI Taldearen Konpetentzia Digital Profesionalen programako dirulaguntzaren xedea enpresako langileen konpetentzia digitalak hobetzea izan da, eta langileen diagnostiko indibidualizatua eta hobetzeko plan pertsonalizatua egin dira.  “Horri esker, erantzuteko gaitasun handiagoarekin egingo diegu aurre etorkizuneko erronkei, eta egun bizi dugun eta etorkizunean jarraituko duen eboluzio digital iraunkorrera egokituko gara”.

Etorkizuneko erronka da erreferentziazko enpresa bihurtzea maila nazionalean, eta nazioartean zabaltzen jarraitzea. “Horrez gain, ekoizpenari begira, industriarako produktu berriak garatzea izango da gure helburua, betiere ebaketa-erreminten arloan. Logistikok, SGAn (biltegien kudeaketa-sistema) oinarritutako biltegiratzearen automatizazio-prozesuan murgilduta gaude, armairu bertikalekin”.

SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.