EXFAN proiektuak hegazkintzako propultsioaren eraginkortasuna hobetzen du
Egile Mechanics enpresa Mendaron kokatuta dago eta EXFANen parte da, Horizon Europe programaren bidez finantzatutako europar ekimena. Etorkizuneko abiazioa jasangarriagoa izateko teknologia berrien garapenean oinarritzen da proiektua, hidrogenozko erregai-piletan oinarritutako propultsio-sistemen elektrifikazioaren bidez.
Tamara Carballo konpainiako berrikuntza-arduradunak azaldu duenez, “EXFAN proiektuaren asmoa da erregai-pilatik beroa berreskuratu eta bultzada-energia bihurtzeko aukera emango duen sistema bat garatzea, propultsio-sistemaren eraginkortasuna optimizatuz”. Proiektuaren berrikuntza nagusia bero-trukagailu bat (HX) propultsatzailearen fluxuan integratzea da, geratzen den beroa berreskuratzeko eta Meredith efektuaren bidez bultzada gehigarri hori sortzeko.
Cidetec euskal zentro teknologikoa da ekimenaren koordinatzailea; Austriako Advanced Drivetrain Technologies GMbH (ADT) enpresak koordinatzaile tekniko gisa jarduten du; eta Technische Universität Wienek (TUWien) koordinatzaile zientifiko gisa dituen ezagutzak eta esperientzia gehitzen ditu. Egilerekin batera, partzuergoa osatzen dute Technical University of Munich, Fraunhofer IAPT, DLR – Institute of Propulsion Technology, Power I.D. GmbH, IRES – Innovation in Research & Engineering Solutions eta EASN – Technology Innovation Services.
Nazioarteko partzuergoaren barruan, Egilek makina elektrikoaren diseinuan eta garapenean duen esperientzia eskaintzen du, funtsezko osagaia baita sistema osoaren funtzionamendua baliozkotzeko. EXFANen parte hartzea beste aurrerapauso bat da enpresaren nazioarteratze teknologikoaren estrategian, azken urteotan areagotu egin baita aeronautika eta defentsarekin lotutako I+G programa europarretan duen presentzia. “Guretzat oso aukera ona da Europako programetan parte hartzeko eta nazioarteko ekimenetan posizionamendua hobetzeko”, adierazi du Carballok. Arduradunak azpimarratu duenez, horrelako ekimenek agerian uzten dute Egilek teknologia disruptiboaren garatzaile gisa duen ahalmena, eta, horri esker, Europako ekosistema bateko bazkide estrategiko gisa sendotu daiteke konpainia, non lankidetza teknologikoa erabakigarria izango baita datozen urteetan.
Programaren lan-egutegia 2027ko azarora arte luzatuko da, eta hasierako teknologia-heldutasuna lortzea du helburu, ondoren soluzioaren eboluzioarekin jarraitzeko. Azken xedea da plataforma aeronautiko berrietan edo aireko garraioaren ingurumen-inpaktua murriztera bideratutako Europako programen barruan (adibidez, Clean Aviation) sustatutako beste ekimen batzuetan integra daitekeen teknologia bat garatzea.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
