Eusko Jaurlaritzak ikerketa industrialerako aurrekontua handitu izana lagungarria da muga-zergek gehien kaltetutako sektoreentzat

Eusko Jaurlaritzak 27 milioi euro gehiago jarri ditu Hazitek programaren bidez enpresa euskaldunentzat ikerketa industrialari laguntzera bideratutako aurrekontuan, eta horrek aurkeztutako proiektuen % 77 sostengatzea ahalbidetu du; hau da, aurkeztutako 984 proiektuetatik 762. Horrela, Imanol Pradales lehendakariak sustatutako Industria Defendatzeko Taldean hartutako konpromisoetako bat bete du Eusko Jaurlaritzak. Zehazki, hasierako 93 milioi euroetatik 120 milioira pasatu da programa honen aurrekontua.

Muga-zergen errealitate berriak gehien kaltetutako sektoreak —esaterako, automobilgintza, makina-erreminta, energia, aeronautika eta siderurgia— bereziki lagundu ditu aurrekontu-igoerak, programaren ia % 50 diruz lagundu baita. Horrela, sektore energetikoan ardaztutako ikerketa industrialeko eta garapen esperimentaleko proiektuek 21 milioi euroko dirulaguntza dute, makina-erreminta edo fabrikazio aurreratukoek 18 milioi euro, 11,5 milioi euro bideratu dira automobilgintzara, 6 milioi euro aeronautikara eta 3,3 milioi euro siderurgiara.

HAZITEK programaren bidez, Industria Adimendunaren, Energia Garbien eta Osasun pertsonalizatuaren arloko ezaugarri lehiakorrak eta estrategikoak dituzten Industria-ikerketarako edo Garapen Esperimentalerako proiektuak gauzatzea babesten da. Bi kasuetan, garrantzi handiagoa emango zaio jasangarritasunari.

Proiektu estrategikoen lerroan aurrekontua % 22 handitu izanak aukera eman du jasotako 48 proposamenetatik 35i laguntza emateko —193 enpresak hartu dute parte—. Estrategikoen deialdiak aurreko edizioak baino 4 proiektu estrategiko gehiago finantzatzen ditu eta finantzatutako proiektuen aurrekontuen laguntza areagotu du; izan ere, finantzatutako proiektuek onartutako aurrekontuaren ratioa % 79 da, 2024ko deialdian baino % 9 gehiago.

Proiektu lehiakorren lerroan aurrekontua % 37 areagotu izanak aukera eman du jasotako 936 proposamenetatik 727 babesteko —770 enpresak hartu dute parte—. Lerro horrek aurreko edizioak baino 104 proiektu lehiakor gehiago finantzatzen ditu, eta finantzatutako proiektuek onartutako aurrekontuaren ratioak ere gora egin du. Hain zuzen ere, ehuneko 10 puntu 2024ko edizioarekin alderatuta.

27 milioi horietatik, 11,45 aurten bertan egikarituko dira, eta gainerakoa hurrengo hiru urteetan; beraz, Jaurlaritzak dagokion konpromiso-kreditua onartu du.

Programaren azken helburua enpresen I+G jardueraren bidez Euskadiko industria sendotzea da, Euskadiko produkzio-sarearen lehiakortasunean ekarpena eraginkortasunez eginda eta eragin ekonomiko nabarmena duten emaitzak lortuta, Euskadirentzat estrategikoak diren espezializazio-eremuen babesaren bidez, eta merkatutik hurbilen dauden I+G arloaren faseetan.

Ohikoa den bezala, programak bereizitako bi babes-lerro biltzen ditu: ezaugarri lehiakorra duten I+G proiektuak eta ezaugarri estrategikoa duten I+G proiektuen garapena.

2024ko deialdian, Hazitek programak 654 proiektu finantzatu zituen, eta guztira 91,2 milioi euro eman dirulaguntzatan. Horrek 265 milioi euroko inbertsio pribatua mobilizatu zuen Euskadiko 759 enpresatan Ikerketa Industrialeko eta Garapen Esperimentaleko jardueretan. Izaera lehiakorreko ildoan 623 proiektu lagundu ziren eta 666 enpresak parte hartu zuten; izaera estrategikoko ildoan 31 proiektu lagundu ziren eta 184 enpresak parte hartu zuten.