Eusko Jaurlaritzak ezkutu industriala aktibatu du 1.047 milioi eurorekin, Ekialde Ertaineko gatazkaren eraginari aurre egiteko
- Euskadiko industria ezkutuaren neurri-sorta hau lau ardatzen inguruan egituratzen da: Pertsonen eta enpleguaren babesa; ETEentzako finantza-laguntza; ETEen eraldaketa eta dibertsifikazioa; eta Autonomia energetikoa
- 105 milioi euro erabiliko dira pertsonak eta enplegua babesteko.
- 450 milioi euroko finantza laguntza programa indarrean jarriko da.
- ETEak eraldatzeko eta dibertsifikatzeko laguntzak % 51,4 igoko dira, 277 milioi euroraino.
- Eusko Jaurlaritzak 215 milioi euro bideratuko ditu autonomia energetikoan aurrera egiteko.
Iranen gerra hasi zenetik, Eusko Jaurlaritzak gaur iragarri du Euskadiko industria ezkutuaren lehen neurri sorta, 1.047 milioi eurokoa, enpresa txiki eta ertainak eraldatzeko eta dibertsifikatzeko laguntzen % 51,4ko igoerarekin.
Gobernu Kontseiluaren bileraren ostean, Mikel Torres Ekonomia, Lan eta Enplegu sailburuak, Noël d ‘Anjou Ogasun eta Finantzetako sailburuak eta Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak prentsaurrekoa eman dute gaur Maria Ubarretxena Eusko Jaurlaritzako bozeramailearekin batera, Eusko Jaurlaritzak Ekialde Ertainean gatazkak izango duen eraginaren aurrean abian jarriko dituen neurrien berri emateko.
Imanol Pradales Lehendakariak, Industriaren Defentsarako Taldearen azken bileran, Euskadiren industria-armarria aktibatuko zela iragarri zuen, Ekialde Ertaineko guerra gorakadaren aurrean eta horrek euskal industrian eta gizarte osoan izango zuen eraginaren aurrean. “Azken urteetako esperientziak – adierazi zuen Lehendakariak – gauza garrantzitsu bat erakutsi digu: ezin dugu munduko taula geopolitikoa kontrolatu, baina azkar erreakzionatu dezakegu gure industria eta ekonomia babesteko. Hori da gure helburua: aurrea hartzea, ahaleginak koordinatzea eta Euskadiren ezkutu industriala aktibatzea edozein agertokiren aurrean “.
Gaur Gobernu Kontseiluan aurkeztutako neurriek Ekialde Ertaineko gatazkaren ondorioei aurre egiteko euskal industriaren ordezkariek helarazitako behar nagusiei erantzutea dute helburu.
Euskadin industria, ekonomia eta enplegua babesteko industria-ezkutuaren neurri-sorta hori lau ardatzen inguruan egituratzen da:
- Pertsonak eta enplegua babestea.
- ETEentzako finantza laguntza.
- Enpresa txiki eta ertainak eraldatzea eta dibertsifikatzea.
- Autonomia energetikoa.
Prentaurrekoa_20260317 JAUREGI
- Lehenengo jarduera-ardatza pertsonak eta enplegua babestea da, eta, horretarako, 105 milioi euro bideratuko ditu Eusko Jaurlaritzak. Laguntza hori honela banatuko da:
- Kontratazioa sustatzeko programak, diskriminazio positiboarekin, langabezian dauden pertsonentzat eta/edo eragindako enpresentzat: 100 milioi euro.
- Langabezia-prestazioen osagarriak aldi baterako lan-erregulazioan dauden langileentzat, kalteberagoak eta soldata murritzagoak dituztenentzat: 2 milioi euro.
- ‘Aukera Berri’ Programa, eraginpeko sektoreetatik datozen pertsonak birkualifikatzeko eta birkokatzeko: 1,5 milioi euro.
- Gizarte-ekonomiarako laguntzak, zuzeneko galera ekonomikoak dituzten lan-sozietateei eta/edo kooperatibei aparteko neurriak ezartzeko: 1,5 milioi euro.
- Bigarren jarduaera-ardatza ETEentzako finantza laguntza:
- Eusko Jaurlaritzak 2026ra zabaldu du ETEei eta euskal industriari zuzendutako Finantza Laguntzarako Programa, nazioarteko muga-zergen markoak eta Ekialde Ertaineko gatazka belikoak eragindako ondorio ekonomikoek eraginda.
- Iaz martxan jarritako aparteko tresna bat berraktibatzea dakar, eta, ziurgabetasun globalek bere horretan jarraitzen dutenez, tresna hori funtsezkoa izan da Euskadiko industria-jarduerari eusteko. Programa horrek 450 milioi euroko gehieneko ahalmena mantentzen du maileguetan, zirkulatzailearen likidezia- eta finantzaketa-beharrak estaltzeko.
- Maileguak 100.000 eta 1.500.000 euro artekoak izango dira enpresa txiki eta ertainentzat eta enpresa handi hautagarrientzat, eta 30.000 eta 120.000 euro artekoak langile autonomo eta profesionalentzat.
- Hirugarren ardatza ETEen eraldaketa eta dibertsifikazioa da:
- ETEak dira euskal industriaren bizkarrezurra, eta, beraz, Eusko Jaurlaritzaren estrategia industrialak, bere jardueraren erdigunean enpresa txiki eta ertainei laguntzea jartzen du.
- Ziurgabetasunaren aurrean, Eusko Jaurlaritzak gure enpresa txiki eta ertainak defendatzen eta eraldatzen jarraitzen du. Honela, laguntza gehiago emango ditu I+Grako, ETEen digitalizaziorako eta deskarbonizaziorako.
- Ziurgabetasun geopolitiko eta komertzialaren aurrean, Eusko Jaurlaritzak gure enpresa txiki eta ertainei lagunduko die beren produktuak, zerbitzuak eta merkatuak dibertsifikatzen. Horren ondorioz, merkatu berrietan ezartzeko laguntza gehiago ematen dira, Euskadik esportatzaile izaten jarrai dezan. Halaber, laguntzak emango dira hazkunde handiko sektoreetarantz dibertsifikatzeko eta ekoizpen-gaitasun berrien aldeko apustua egiteko.
- 2026ko aurrekontu errekorrari 87 milioi gehiago gehituko zaizkio, gure enpresa txiki eta ertainak eraldatzeko eta dibertsifikatzeko.
- Guztira, Eusko Jaurlaritzak 277 milioi euro bideratuko ditu ETEentzako laguntzetara, hau da, % 51,4ko igoera 2025eko aurrekontuarekin alderatuta.
- ETEei programa horietan sartzen laguntzeko, SPRIk adimen artifizialean oinarritutako lehen elkarrizketa-laguntzailea jarri du abian, “industrIA” izenekoa. Zerbitzu honek programen eskaintza ETEen behar espezifikoetara pertsonalizatzen du.
- Eta laugarren ardatza Autonomia Energetikoa da:
- Euskadik kanpoko energia-iturriekiko menpekotasun handia du, eta Ekialde Ertaineko gatazkak energia-prezioak handitu ditu, gure industriari eragin negatiboa eginez.
- Euskadiren autonomia eta segurtasun energetikoa indartu nahi ditugu, gure industria ez dadin hain zaurgarria izan kanpoko shock energetikoekiko.
- Eusko Jaurlaritzak, Energiaren Euskal Erakundearen bidez, proiektu fotovoltaiko eta eoliko handietan batera inbertitzearen alde egingo du, 80 milioi euroko zuzkidurarekin 2030era arte.
- Iberiar penintsulatik datorren hidrogeno berdea bezalako energia berriztagarrien segurtasuna eta kontsumoa areagotzeko, Eusko Jaurlaritzak, EEEren bitartez, hidrogenoari eta CO2ari lotutako energia-azpiegituretan baterako inbertsioaren aldeko apustua egingo du.
- Bestalde, Lehendakariak iragarri zuen bezala, Eusko Jaurlaritzak faktura elektrikoa murrizteko neurrien dekalogo bat planteatu du. Beste ekimen batzuen artean, azpimarratzekoa da elektrizitatearen BEZa % 21etik % 5era murrizteko proposamena, etxeentzat, eta elektrizitatea sortzeko zerga kentzeko eta bidesari energetikoak murrizteko proposamena, enpresentzat.
- Ondorio gisa, Eusko Jaurlaritzak 215 milioi euro bideratuko ditu autonomia energetikora.
