Euskadi funtsezkoa izango da etorkizuneko motor aeronautikoen belaunaldi berriaren garapenean, lehen proiektu eraldatzaile industrialari esker

• Imanol Pradales: “Euskadiko sektore aeronautikoa eta aeroespaziala funtsezko pieza da Euskadi 2030 Industria Planean. Etorkizunean trakzio-ahalmen handia duen sektorea da”.

Imanol Pradales Lehendakariak Euskadi 2030 Industria Planaren lehen industria-proiektu eraldatzailea aurkeztu du gaur goizean Zamudioko ITP Aero konpainiaren egoitzan: ‘Euskadiko abiazio jasangarri eta lehiakorrerako motor aeronautikoko arkitektura berriak’ proiektu eraldatzailea. Euskadik, trantsizio energetiko eta digitalean oinarrituta, etorkizuneko motor aeronautikoen belaunaldi berrien arloan munduan rol garrantzitsua izateko asmoarekin sortu da.

Lehendakariarekin batera izan dira Eva Azoulay Grupo ITP Aero konpainiako CEOa, Carlos Alzola ITP Aero konpainiako kontseilari ordezkaria, Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburua eta Zientzia, Teknologia eta Berrikuntzaren Euskal Sareko (ZTBES) eta HEGAN aeronautika eta espazioko klusterreko enpresa, zentro teknologiko eta eragile nagusietako arduradun nagusiak.

Imanol Pradales Lehendakariak nabarmendu duenez, “euskal sektore aeronautikoa eta aeroespaziala funtsezko pieza da Euskadi 2030 Industria Planean. Etorkizunean trakzio-ahalmen handia izango duen sektorea da, eta helburu argia izango du: funtsezko elementua izatea euskal industria-sarea eraldatzeko eta hazteko. EBn putz egin dezaketen haize-boladak aprobetxatuz, eragile ekonomiko global gisa gure autonomia estrategikoa lortzeko erabaki egokiak hartzen baditugu”. Hala, azpimarratu duenez, “Industria Planaren lehen proiektu eraldatzaile honek erronka teknologiko handi bati heltzen dio: etorkizuneko abiazio bihurtuko diren motorreko arkitektura berrien garapena eta industrializazioa”.

Lehen Proiektu Eraldatzaile hau lidergo pribatukoa da, babes publikoa duen arren, eta Euskadi 2030 Industria Planaren barruan sartzen da. ITP Aero konpainia da trakzio-enpresa; izatez, aire-propultsioaren arloan munduko liderra den Euskal Autonomia Erkidegoko konpainia honek teknologia propioa du, eta trakzio-indar handia Euskadiko beste enpresa batzuen balio-katearen barruan.

Proiektuak aukera berriak garatzen ditu sektore aeronautikoan, HAZI sektore estrategikoan, etorkizunean izan dezakeen trakzio-ahalmenagatik.

Errotzea indartzea

12 enpresa baino gehiago trakzionatuko ditu —erdiak enpresa ertainak eta txikiak izango dira—, eta HEGAN aeronautika eta espazioko klusterraren laguntza izango du. Motor aeronautikoaren teknologia berrien garapenak, bestalde, Zientzia, Teknologia eta Berrikuntzaren Euskal Sareko (ZTBES) 6 zentro teknologiko eta eragileak inplikatuko ditu Euskadin.

Proiektu Eraldatzaileak hurrengo hiru urteetarako 110 milioi eurotik gorako inbertsioa izango du, eta horietatik 60 milioi euro baino gehiago I+Garen eta teknologia-garapenaren arlokoak izango dira.

Proiektuak 800 lanpostu sortzea ekarriko du —zuzeneko 200 lanpostu eta zeharkako 600 lanpostu—, eta esportazio teknologikoen hazkunde handia eragingo du, lehiakortasunean egindako jauziari esker.

Proiektuak, beraz, ITP Aero konpainiaren proiektu industriala eta teknologikoa Euskadin errotzea indartuko du, eta balio-katearekin eta zentro teknologikoekin dituen loturak estutu.

Proiektu Eraldatzaile horrek Euskadi nazioarteko erreferente bihurtuko du oso esportagarriak diren balio erantsi handiko aeronautika-produktuen eta -zerbitzuen garapenean.

Beste urrats bat da Euskadiko industria aeronautikoaren garapenean. Abiazio komertzialeko motorren hurrengo belaunaldirako funtsezko teknologien garapena ahalbidetuko du, eta hurrengo mailara eramango du osagai kritikoen fabrikazio aurreratua eta adimen artifiziala integratua duten fabrika konektatuen garapena.

Proiektu Eraldatzailea, Euskal Autonomia Erkidegoko industrian trakzio-ahalmen handia duen sektore batean

Proiektua sartzen da Eusko Jaurlaritzak Euskadi 2030 Industria Planaren bidez garatzen ari den industria-eraldaketarako estrategiaren barruan. Plana Euskadiko industriaren balio-katearen barruan lehiakortasuna, berrikuntza eta lankidetza bultzatzeko sortu da.

Proiektu Eraldatzaileak dira Industria Planaren ardatza, eta lehen mailako bultzada emango diote Herriaren industria-eraldaketari, betiere Eusko Jaurlaritzaren hiru jarduketa-ardatzen inguruan egituratuta: industria gehiago, industria hobea eta emisio txikiagoa.

Proiektu Eraldatzaileak jauzi kualitatiboa izango dira Euskadiko lider industrialen, bertako hornitzaile-katearen eta zentro teknologikoen arteko elkarlanean, eta, horrela, Herriak teknologian, desberdintzean eta, beraz, lehiakortasunean irabaziko du.

Horretarako, Eusko Jaurlaritzak zenbait laguntza-neurri jarriko ditu Proiektu Eraldatzaileen eskura, egungo eta etorkizuneko programa eta tresnen artean.

Hartara, bultzada irmoa ematen die Euskadi 2030 Industria Planean lehenetsitako sektoreei: IRABAZI —automozioko osagaiak, energia, fabrikazio aurreratua, metalurgia eta mugikortasun jasangarria— eta HAZI —aeronautikoa/aeroespaziala, biosanitarioa, soluzio digital aurreratuak, sare adimendunak eta biltegiratzea, eta erregai berriztagarriak—.

Datozen asteetan Proiektu Eraldatzaile gehiago aurkeztuko dira.

Motorren hurrengo belaunaldietarako eta fabrikazio aurreraturako teknologia garatzea, lehiakortasuna nabarmen hobetuko duena

Munduko abiazioa eraldaketa sakonean murgilduta dago, emisioak murrizteko, erregai jasangarriak integratzeko eta prozesuak digitalizatzeko beharrak bultzatuta, baita industria-paradigma berrietara egokitutako hornikuntza-kate sendoak indartzeko beharrak bultzatuta ere.

ITP Aero konpainia buru duen Euskal Autonomia Erkidegoko sektore aeronautikoak industria jasangarriago, digitalizatuago eta erresilienteagorako trantsizioa bizkortzeko erronkari aurre egin behar dio, deskarbonizazioko, autonomia teknologikoko eta enplegu kualifikatua sortzeko Europako helburuen ildotik.

ITP Aero konpainiak Zamudion du egoitza, eta aireko propultsioaren arloan munduan aitzindaria den enpresetako bat da. Konpainia anbizio handiko hazkunde- eta inbertsio-plana garatzen ari da, eta azken 3 urteetan 200 milioi euro baino gehiago inbertitu ditu eta, aldi horretan, zuzeneko 550 lanpostu sortu ditu Euskadin. ITPk teknologian eta industria-garapenean inbertsio handiak egiten jarraitzeko asmoa du. Gainera, iaz ADMIRE Aerospace Advanced Manufacturing Centre zentroa inauguratu zuen, 24 milioi eurotik gorako inbertsioarekin.

ITP Aero buru duen Proiektu Eraldatzailearen moduko proiektu bat abian jartzearekin, Euskadik aeronautikaren sektorean munduko erreferente gisa duen posizioa indartzen da, eta gure Herria lider-posizioan kokatzen du, bai aukera berriak erakartzeko, bai berrikuntza bultzatzeko, baita inbertsioaren itzulkin soziala eta ekonomikoa maximizatzeko, industria-merkatu dinamiko eta lehiakor horretan.

Proiektu eraldatzaile horri esker, Euskadik motor aeronautiko efizienteagoen eta jasangarriagoen hurrengo belaunaldietarako beharrezkoak diren teknologiak garatu ahal izango ditu, eta sektorea berrikuntza teknologikoaren eta jasangarritasunaren arloko nazioarteko erreferente izango da.

Teknologia disruptiboen integrazioari esker —hala nola industria-digitalizazioa, adimen artifiziala, material aurreratuak eta prozesu automatizatuak—, Euskal Autonomia Erkidegoko enpresek fabrikazio aurreratuan sakonduko dute eta eskaintza teknologiko diferentziala sortu, eta, hala, lehiakortasuna handitu ahal izango dute eta nazioarteko merkatu-nitxo berrietan sartu.

Gainera, tokiko balio-kate sendoa eta teknologikoki puntakoa finkatzeak erraztuko du nazioarteko bezero berriak erakartzea eta Europako programa eta programa global handietan parte hartzea, Euskadik industria aeronautikoan bikaintasun-polo gisa duen irudia indartuta