Kutxa Fundazioak, Eusko Jaurlaritzak eta Espainiako Gobernuak Oncomatryx biofarmazeutiko bihurtzea bultzatzen dute
- Espainiako Gobernuak 24,3 milioi euro jarriko ditu Zientzia, Berrikuntza eta Unibertsitate Ministerioaren bidez, osasunerako berrikuntza teknologikoarekin duen konpromisoa indartukoaz.
- Terapia onkologiko berriak garatzea eta potentzia handiko botiketan espezializatutako Fill & Finish fabrikazio-instalazio bat martxan jartzea ahalbidetuko du neurri honek.
ONCOMATRYX BIOPHARMA SA euskal biotech-ak arrakastaz burutu du indarrean zuen kapital-zabalkuntza, 58 milioi euro ingurukoa, startup biotech izatetik biofarmazeutika integratura eboluzionatzeko azken helburuarekin, haren garapen klinikoa eta industria-gaitasunak indartuz.
Operazioak Zientzia, Berrikuntza eta Unibertsitate Ministerioaren babesa du, Innvierte arrisku-kapitaleko sozietate publikoaren bidez. Era berean, Kutxa Fundazioaren, Eusko Jaurlaritzaren, Ekarpen, BBK eta konpainiaren beste inbertitzaile pribatu historiko batzuen babesa ere lortu du.
Aurreikusitako ekimen estrategikoen artean, potentzia handiko medikamentu onkologikoetan espezializatutako Fill & Finish fabrikazio-instalazio bat garatzea dago. Azpiegitura horrek Europak sendagai biologiko aurreratuak fabrikatzeko duen industria-ahalmena sendotzen eta farmazia-sektorearen autonomia teknologikoa indartzen lagunduko du.
Zientzia, Berrikuntza eta Unibertsitate Ministerioak, CDTIren INNVIERTE arrisku-kapitaleko sozietate publikoaren bitartez (Berrikuntzarako Estatu Agentzia), 24,3 milioi jarriko ditu enpresa estrategikoetako baterako inbertsioen lerrotik. Eragiketa hau Espainiako Gobernuak osasunerako berrikuntza teknologikoaren esparrua bereziki bultzatzeko duen konpromisoaren barruan kokatzen da. Berrikuntza horren inpaktuak balio erantsia ematen du eta herritarren bizi-kalitatea hobetzen du.
Kutxa Fundazioak Oncomatryxek merkaturatutako 58 milioi euro inguruko guztizkotik 15 milioi euro bideratuko ditu, konpainiaren akziodunen artean duen presentzia nabarmen handituz, % 1,7tik % 7,4ra igaroz. Erabaki horrekin, erakundeak berretsi egiten du bere eginkizun estrategikoa: gizarte-ongizateari laguntzea, enpresa-garapena eta Gipuzkoan industria-inpaktua bultzatuz.
“Inbertsio horrek bete-betean erantzuten die berrikuntza eta lehiakortasuna sustatzeko ditugun helburuei, eta gure ekosisteman benetako eragina sortzen duten proiektu eraldatzaileekiko dugun konpromisoa sendotzen du”, adierazi du Eluska Sukiak, Kutxa Fundazioko Inbertsioen zuzendariak.
Eusko Jaurlaritzak, Ekarpen erakundearekin lankidetzan, 10,4 milioi euro jarriko ditu finantziazio-txanda berri honetan. Industria, Trantsizio Energetiko eta Jasangarritasuneko sailburu Mikel Jauregiren hitzetan, “horri esker, konpainian ditugun akzioen % 17,96ri eutsiko diogu. Operazio horrekin, erakundeok espezializazio handiko sektore bioteknologiko bat garatzeko dugun konpromisoa indartzen dugu, euskal industria-sarearen lehiakortasunerako eta dibertsifikaziorako estrategikoa izanik”.
Gainera, sailburuak esan duenez, “inbertsio honek Gipuzkoan biozientzien eta teknologia aurreratuen berrikuntza-gune bat sendotzen laguntzen du, balio erantsi handiko gaitasun zientifiko-teknologikoak sustatuz eta gure seme-alabek lortu nahi duten enplegu kualifikatu berria bultzatuz”.
Zientzia, Berrikuntza eta Unibertsitate ministro Diana Morantek ziurtatu duenez, “eragiketa hau Espainiako Gobernuak gure zientzia eta berrikuntza sistema indartzeko bultzatzen duen lankidetza publiko-pribatuaren ereduaren adibide bat da. Oncomatryxen aldeko apustua egitea terapia onkologiko aurreratuagoen alde egitea da, biomedikuntzako industria-gaitasunaren alde egitea eta gure herrialdea bioteknologiaren abangoardian jartzea, osasunaren eta herritarren bizi-kalitatearen zerbitzura“.
Eragin zientifiko, ekonomiko eta soziala
Laureano Simónentzat, Oncomatryxen sortzailearentzat, “kapital-handitze hau finantza-eragiketa bat baino askoz gehiago da. Oncomatryx ikerketa konpainia izatetik biofarmazeutika integratura jauzia egiteko prest dagoenaren baieztapena da. Inbertitzaile instituzionalek eta pribatuek urteak daramatzate proiektu honen alde egiten. Horri esker, aurrera egin dezakegu industria azpiegitura propio baten eraikuntzan, Europak etorkizuneko sendagai onkologikoak fabrikatzeko duen gaitasuna indartuko duena”.
Oncomatryxek ohiko ikuspegia ez den beste ikuspegi batetik heltzen dio minbiziari, tumorearen hazkundean eta erresistentzian funtsezkoa den mikrogiroari eraso eginez. Ikuspegi aitzindari horrek tratamenduen eraginkortasuna hobetzeko bide terapeutiko berriak irekitzen ditu.
Izan ere, OMTX705 izeneko farmakoa pertsonekin egindako saiakuntza klinikoko 1B-2A fasean dago, Espainiako eta Ameriketako Estatu Batuetako erreferentziazko ospitaleetan 100 paziente tratatu diren lehen fasea amaitu ondoren, eta emaitza itxaropentsuak eta ikusmin handia eragin ditu arlo klinikoan zein zientifikoan.
Oncomatryxek nazioarteko lizentzia-akordioak ditu bere plataforma teknologikoa globalki baliozkotzen duten Asiako konpainia bioteknologikoekin, eta Europar Batasunak proiektu estrategikotzat jo du EIC Accelerator programaren bidez, 12,5 milioi eurorekin haren garapena babestuaz.
Posizionamendu zientifiko horren ondorioz, Oncomatryx posizio berezian dago terapia onkologiko berrien garapenean.
Inbertsioari esker, gainera, Euskadi gune garrantzitsuagoa bilakatuko da terapia onkologiko aurreratuen esparruan, enplegu kualifikatua sortuz eta balio erantsi handiko industria jarduera erakarriz.
