Eusko Jaurlaritzak HAZITEK programaren bidez 505 milioi euro mobilizatu ditu aurten industria arloko I+G proiektuetan, duela bi urte baino bi aldiz gehiago

• Aurrekontu-igoera horri esker, enpresetako I+Gko 695 proiektu babestu dira, eta horietan ETEen parte-hartzea % 70 ingurukoa izan da.

• Euskadiko industriak konpromiso handia erakusten du garapen teknologikoarekin; izan ere, aurkeztutako proiektuen kopurua % 17 handitu da, eta proiektuak tamaina handiagokoak dira (aurkeztutako aurrekontu osoari dagokionez, % 41 gehiagorekin)

• Edizio honen berritasun nagusia Proiektu Eraldatzaileak txertatu izana da; proiektu horiek gutxienez 20 milioi euroko I+G inbertsioa izan behar dute.

Eusko Jaurlaritzako Industria, Trantsizio Energetiko eta Jasangarritasun Sailak prestatutako Euskadi 2030 Industria Planaren “Industria Hobea” ardatz estrategikoari esker, 2026an HAZITEK programak 505 milioi euro mobilizatuko ditu I+G arloko enpresen proiektuetan; hau da, duela bi urte baino % 92 gehiago. Hain zuzen ere, programa horren aurrekontua handitu egin da 169 milioi eurora arte, eta horren zati bat Euskadiko ETEak eraldatzeko eta dibertsifikatzeko helburuari lotuta dago.

Aste honetan HAZITEK programaren 2026ko lehen deialdia ebatzi ondoren, dagoeneko enpresen I+G arloko 695 proiektu babestu dira, eta laster 26 milioi euro gehigarriko deialdi berria jarriko da abian. Horri esker, enpresen I+Gari zuzendutako laguntza publikoaren zenbatekoa 169 milioi eurora iritsiko da (zifra historikoa da).

Lehen deialdi honetan, 1.050 eskaera jaso dira guztira, eta aurkeztutako aurrekontuen bolumena 783 milioi eurotik gorakoa izan da. Beste nolabait esanda, datu horiek orain bi urtekoekin alderatuta, % 41 handiagoak izan dira eta industria-sareak I+G arloarekin duen konpromiso eta eskari handia baieztatzen ditu.

Lerro eraldatzaile berria eta inpaktua indartzea

Aurtengo edizioaren berritasun nagusia Proiektu Eraldatzaileak izeneko lerro berria da. Lerro hori inpaktu handiko lankidetza-ekimenetara bideratuta dago, eta Euskadi 2030 Industria Planaren tresna estrategikotzat jotzen da. Horiek guztiek inbertsio publiko-pribatua mobilizatzen dute, enplegu kualifikatua eta lehiakortasuna sortzen dituzte, eta herrialdearen gaitasun industrial eta teknologikoak indartzen dituzte. Lerro berri horri esker, 3 proiektu babestu dira, guztira 61,5 M€-ko I+G jarduera mobilizatuz.

Proiektu horietan 24 enpresak parte hartzen dute, eta gaitasun industrial estrategikoak sortzeko eta produkzio-sarearen eraldaketa bizkortzeko diseinatuta daude, honako sektore estrategiko hauetan: Fabrikazio Aurreratua, Aeroespaziala eta Erregai Berriztagarriak.

Lerro berri horrek bigarren deialdi bat izango du. Horren berri ekainean edo uztailean emango da, eta beste 26 M€-ko zenbatekoa izango du.

Proiektu estrategikoak sendotzea

Proiektu estrategikoen lerroak 70 M€-ko zenbatekoa izan du (hau da, 2024ko oinarrizko urtearekin alderatuta, % 43 gehiago —urte hartan ez zen aurrekontuan igoerarik izan—). Oraindik ere, intentsitate teknologiko handieneko eta inbertsio-hazkunderik handieneko eremua izaten jarraitzen du, eta sektore estrategikoetara argi eta garbi bideratuta dago. Lerro horri esker, Euskadiko 187 enpresari lagundu ahal izan zaie, jasotako 53 eskaeretatik hautatutako 38 proiektutan (+% 23), eta guztira 198,3 M€-ko I+G jarduera mobilizatu da (+% 64).

Laguntza jaso duten 38 proiektuek soluzio teknologiko aurreratuak ikertzen eta garatzen dituzte Industria Planeko HAZI sektore estrategikoetarako eta IRABAZI sektoreetarako.

Lehen sektore horiek intentsitate teknologiko handia eta gaitasun zientifiko-teknologiko handia dutenak izateaz gain, datozen hamarkadetan merkatu globaletan hazteko potentzial handia izango dute, hala nola Soluzio Digitalak, Aeroespaziala, Erregai berriztagarriak eta Bio-sanitarioa. IRABAZI sektoreak, aldiz, Euskadiko Balio Erantsi Gordinari eta Enpleguari egiten dioten ekarpen handiagatik, enpleguan kalitate handia eskaintzen dutelako eta intentsitate teknologiko ertain-handia dutelako gaur egun industria arloko sektore bultzatzaileak dira, eta horien artean daude honako hauek: Mugikortasun jasangarria, Automobilgintzako osagaiak, Fabrikazio aurreratua eta Energia.

Jauregiren hitzetan, “ziurgabetasuna nagusi den garai hauetan, Euskadik berrikuntzaren azeleragailua zapaltzearen aldeko apustua egin du datu hauetan ikus daitekeen moduan. Gure lehiakideek baino bizkorrago joan behar dugu, eta, berrikuntzari esker, hobeak eta bizkorragoak gara. Berrikuntzara bideratutako inbertsio-maila horri esker, gure industriak bere produktuak eta zerbitzuak bereizi ditzake, eta horrek erresilienteago bihurtzen ditu kanpoko gorabeheren aurrean, Trumpen muga-zergekin ikusi dugun bezala”.

Proiektu lehiakorren oinarri zabala

Proiektu lehiakorren lerroa da, oraindik ere, enpresek I+Gra sarbidea izateko duten tresna nagusia: 1.000 enpresa baino gehiagok parte hartu dute, eta 755 enpresak laguntza jaso dute.

Lerro honen bidez, 994 eskaera jaso dira, eta horietatik 654 proiektuk jaso dute laguntza (+% 5). Aurkeztutako aurrekontuaren bolumenak nabarmen egin du gora, eta 367,5 M€-ra arte iritsi da (+% 36). Horrek agerian uzten du enpresek I+Garen alde egindako ahalegina. Azkenik, 47 M€-ko aurrekontua izan da lerro horretarako (+% 12), eta enpresen arloko I+Gko 175 M€ mobilizatu dira (+% 22).

Proiektu lehiakorrek, batez ere garapen esperimentalekoek, aurrera jarraitu dute IRABAZI eta HAZI sektore estrategikoetarako produktu eta prozesuen garapenean. Babestutako proiektuen kopuruari dagokionez, bereziki nabarmendu beharrekoak dira sektore hauek: Fabrikazio aurreratua, Bio-sanitarioa, eta Energia eta soluzio digitalak. Hain zuzen ere, lerro horren baitan, beren merkatuan lidergoa izateko potentziala duten beste sektore industrial batzuetako enpresen laguntza ere jaso dute, hala nola Eraikuntzarena eta Ingurumenarena.

Lerro horretan, ETEek partaidetza handiagoa izan dute. Hala, enpresa onuradunen % 71 izan dira ETEak eta, guztizko dirulaguntzaren % 54 jaso dute.

Amaitzeko, honako hau nabarmendu du Jauregik: “Jarduera horrek guztiak erakusten du Euskadiko industriak konpromiso handia duela I+Garen alde, garapen lehiakorraren eragile gisa; hala, maila teknologikoa handitu eta gure industria Industria Hobe bihurtu du”.