Eusko Jaurlaritzak ETEak hazkunde handiko sektoreetara dibertsifikatzeko programa berri bat ireki du 54 milioi eurorekin

• Programak arreta berezia eskaintzen dio ETEak Euskadi 2030 Industria Planeko HAZI sektoreetara —hots, etorkizunera begira trakzio-ahalmena duten sektoreetara— dibertsifikatzeari, hala nola sektore aeroespazialera, biosanitariora, soluzio digital aurreratuen sektorera (AA, quantuma, zibersegurtasuna), sare adimendunen eta biltegiratzearen sektorera eta erregai berriztagarrienera.

• Programaren helburua da ETEen produktibitatearen eta lehiakortasunaren hazkundea eta hobekuntza bultzatzea. Eusko Jaurlaritzak ETEak negozio-lerro, produktu, zerbitzu eta merkatu berrietara dibertsifikatzera bideratutako produkzio-inbertsioak babesten ditu. 

• Dibertsifika programa Industriaren Defentsarako Taldeak ETEen eraldaketa eta dibertsifikazioa bultzatzeko iragarri zituen laguntzen barruan kokatzen da, 277 milioi eurorekin, hots, 2025erako aurrekontuan baino % 51,4 gehiagorekin. 

• Eusko Jaurlaritzak industriarekin egindako bileretan, ETEek beren dibertsifikazioa bultzatzeko beharra helarazi dute. Interes horren erakusgarri, 350 ETEk baino gehiagok egin dute programarako aurreeskaera. 

• Mikel Jauregi sailburuak iragarri du programa ireki dela, Gasteizko Zayer enpresara egindako bisitan. Industria-arloko ETE horrek nagusiki energiaren sektorera eta sektore aeroespazialera bideratutako ahalmen handiko makina-gama berri bat muntatzeko dibertsifikazio-proiektua aurkeztu du programan.

Eusko Jaurlaritzak ETEak hazkunde handiko sektoreetara dibertsifikatzeko programa berri bat ireki du 54 milioi eurorekin.

Programaren helburua da ETEen produktibitatearen eta lehiakortasunaren hazkundea eta hobekuntza bultzatzea. Dibertsifika programaren bitartez, enpresaren jarduera negozio-lerro, produktu, zerbitzu eta merkatu berrietara dibertsifikatzera bideratutako produkzio-inbertsioak babesten dira.

Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik iragarri du programa ireki dela, Gasteizko Zayer enpresara egindako bisitaren esparruan. Sailburuari eta Industria Sustatzeko sailburuorde Andoitz Kortari Zayer enpresako kontseilari eta area manager Maite Ercillak eta konpainiako kontseilari Iñigo Perezek egin diete harrera.

Programa Industriaren Defentsarako Taldeak ETEen eraldaketa eta dibertsifikazioa bultzatzeko iragarri zituen laguntzen barruan kokatzen da. Guztira, Eusko Jaurlaritzak ETEak eraldatzeko eta dibertsifikatzeko 2026an abian jarritako laguntzek % 51,4ko igoera izan dute, eta 277 milioi eurora iritsi dira.

Eusko Jaurlaritzak industriarekin egindako bileretan, ETEek beren dibertsifikazioa bultzatzeko beharra helarazi dute. Interes horren erakusgarri, 350 ETEk baino gehiagok egin dute programarako aurreeskaera.

ETEak euskal industriaren bizkarrezurra dira, eta, beraz, Eusko Jaurlaritzaren industria-estrategiak bere jardueraren erdigunean kokatzen du ETEei laguntzea.

Ziurgabetasun geopolitiko eta komertzialaren aurrean, Eusko Jaurlaritzak beren produktuak, zerbitzuak eta merkatuak dibertsifikatzen laguntzen die EAEko ETEei, eta hazkunde handiko sektoreetara dibertsifikatzeko laguntzak ematen ditu.

Programak arreta berezia eskaintzen dio ETEak Euskadi 2030 Industria Planeko HAZI sektoreetara dibertsifikatzeari. Sektore horiek trakzio-ahalmena dute etorkizunera begira, hala nola sektore aeroespaziala, biosanitarioa, soluzio digital aurreratuen sektorea (AA, quantuma, zibersegurtasuna), sare adimendunen eta biltegiratzearen sektorea eta erregai berriztagarriena.

Mikel Jauregi sailburuak adierazi duenez, “egungo ziurgabetasunaren aurrean, Eusko Jaurlaritzak programa berri bat sortu du gure ETEek dibertsifikazioan inberti dezaten eta, horren bidez, erresilientzia handiagoa izan dezaten. Dibertsifikazio hori hazkunde handiko sektoreetara bideratuta egongo da, negozio-aukera berriak irekitzeko eta hazkunde txikiagoa duten sektoreen gehiegizko mendekotasuna murrizteko”. 

Zayer enpresak 18 milioi euroko inbertsioa egingo du energiaren sektorera eta sektore aeroespazialera dibertsifikatzeko proiektu batean 

Hain zuzen ere, Zayer enpresa Dibertsifika programan sartzeko industria-arloko euskal ETEen dibertsifikazio-proiektuen ereduaren erreferente argia da.

Zayer enpresak programaren barruan aurkeztutako proiektuak 18 milioi euro inguruko inbertsioa aurreikusten du, datozen hiru urteetan garatzeko.

Industria-ahalmena handitzea planteatzen du, 6.000 m² inguruko lursail bat eskuratzearen bidez. Bertan, pabiloi berri bat eraikiko da. Espazio handiago horri esker, nagusiki energiaren sektorera eta sektore aeroespazialera bideratutako ahalmen handiko makina-gama berri bat muntatu ahal izango du Zayer enpresak. Horren bidez, balio erantsi handiko merkatuetan duen posizioa indartuko du enpresak, eta nazioarteko eskariaren hazkundeari erantzungo dio.

Bestalde, Zayer enpresak bere instalazioak modernizatzea planteatzen du. Horretarako, bigarren zamalanetarako kaia eraikiko du eta fatxada nagusia birmoldatuko du, fluxu logistikoak eta efizientzia operatiboa hobetzeko eta enpresaren irudi korporatiboa bateratzeko.

Halaber, jasangarritasunaren eta berrikuntzaren esparruan, produkzio-parkea berrituko du makineria efizienteagoaren, lehendik dauden ekipoen retrofittingaren eta eraikinaren energia-efizientziaren hobekuntzaren bidez.

Dibertsifika programako laguntzak eskuratzeko baldintzak 

Laguntzak eskuratu ahal izateko, ETEek produktu-prozesu industrialari lotutako zerbitzuak ematen dituzten industria-enpresak izan beharko dute, zerbitzu logistikokoak barnean hartuta eta garraiokoak kanpo utzita. Beharrezkoa izango da ETEek beren inbertsioak Euskadin egitea.

Enpresa handiek Bizkaiko Ezkerralde Zabalduan egin beharko dituzte beren inbertsioak. Hau da, honako hauetan: Abanto Zierbena; Alonsotegi; Artzentales; Balmaseda; Erandio; Galdames, Gueñes; Karrantza Harana; Muskiz; Ortuella; Portugalete; Santurtzi; Sestao; Sopuerta; Turtzioz; Trapagaran; eta Zierbena.

Dirulaguntzek, norgehiagoka-prozeduraren bidez, milioi 1 euroko muga izango dute enpresa edo enpresa talde bakoitzeko.

Honako ehuneko hauek izango dituzte: % 10 enpresa handientzat, % 15 ertainentzat eta % 20 txikientzat. 

Programako laguntzen ezaugarriak: 

• Itzuli beharrik gabeko dirulaguntzak eskaintzen dizkie Euskal Autonomia Erkidegoan lehiakortasuna eta hazkundea hobetuko dituen produkzio-inbertsioa egiten duten enpresei. Diruz lagunduko dira enpresaren jarduera negozio-lerro, produktu, zerbitzu eta merkatu berrietara dibertsifikatzera eta/edo enpresaren produktibitatea eta lehiakortasuna handitzera eta hobetzera bideratutako jarduketak.

• Aktiboek zuzenean lotuta egon beharko dute laguntzaren xede diren eta negozio-lerro, produktu, zerbitzu eta merkatuen inguruko ahalmen berriak garatzen dituzten dibertsifikazio- eta/edo hazkunde-jarduerekin.

• Laguntzaren xede diren inbertsioek honako hauek dituzte xede: Jabetza industriala eta patentea, Aplikazio informatikoak, Lur eta ondasun naturalak, Eraikuntzak, Instalazio teknikoak, Makineria, Tresneria, beste instalazio batzuk eta Informazio-prozesuetarako ekipamenduak.

• Hasierako plantillari eusteko nahitaezkotasuna.