Industriarako sare elektrikoen belaunaldi digital berria ‘made in Euskadi’ izango da

• Euskal industriaren balio-katea indartuko du sare elektrikoen sektorean. Sektore horrek 30.000 milioi euroko fakturazio orokorra du, eta zuzeneko 6.000 enplegu baino gehiago sortzen ditu.

• Ekipamendu teknologiko berrien lehen proba pilotuak datorren urtean egingo dira, eta euskal industriaren elektrifikazio-beharrak lehenetsiko dira.

• Proiektuaren hasierako inbertsioa 41 milioi eurokoa izango da ia. Zenbatetsitakoaren arabera, datozen hiru urteetan guztizko inbertsioa 160 milioi eurotik gorakoa izango da, eta I+Gko eta garapen teknologikoko jardueretara bideratuko da.

• Kualifikazio handiko zuzeneko 200 lanpostu eta zeharkako 320 lanpostu sortuko dira. Beraz, 520 enplegu berri izango dira guztira.

• Sare adimendunen industriak Euskadin I+Garen ikuspegi bereziarekin sortutako kualifikazio handiko enpleguak % 25eko igoera izango du datozen hiru urteetan.

• Proiektua Iberdrolak zuzenduko du, 62 enpresa trakzionatuko ditu (haietako 29 ETEak izango dira), eta Basque Energy Cluster izenekoaren laguntza izango du.

• Gainera, Zientzia, Teknologia eta Berrikuntzaren Euskal Sareko (ZTBES) hainbat zentro teknologiko eta eragile inplikatuko ditu, bereziki Tecnalia, Ikerlan eta CIC energiGUNE.

• Proiektu eraldatzaile hori Bilbon kokatutako Global Smart Grids Innovation Hub izenekoak koordinatuko du. Proiektu eraldatzaile horrek apirilaren 14an iragarritakoez bestelako garapen teknologikoak bultzatuko ditu inbertsio berrien bidez. Horrela, beraz, Eusko Jaurlaritzak bat egin du Iberdrolak eta Bizkaiko Foru Aldundiak bultzatutako berrikuntzako Hub horrekin. Grid4Industry proiektua Smart Grids Innovation Hub-aren parte da.

Bilbo, 2026ko ekainaren 4a. Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik Grid4Industry proiektu eraldatzailea aurkeztu du gaur goizean, Jose Ignacio Berroeta Zentro Korporatiboan. Proiektu hori Euskadi-2030 Industria Planaren esparruan sortutako industria-oinarriko bosgarrena da.

Proiektu berri horren bidez, industriarako sare elektrikoen belaunaldi digital berria “made in Euskadi” izango da, eta, bertatik, munduko gainerako herrialdeetara esportatuko da. Euskadin, industriako sare elektrikoak digitalizatzea eta elektrifikazioak industrian dituen erronka handiei erantzutea ahalbidetuko duten soluzio teknologiko berriak garatuko dira.

Grid4Industry proiektu eraldatzailea gaur goizean aurkeztu dute Iberdrolaren Jose Ignacio Berroeta Zentro Korporatiboan. Ekitaldian, proiektuan parte hartzen duten enpresetako, enpresa txiki eta ertainetako, zentro teknologikoetako eta klusterretako arduradunak bildu dira, eta honako hauek hartu dute parte: Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik, Bizkaiko Foru Aldundiko Sustapen Ekonomikoko diputatu Ainara Basurkok, Iberdrolaren Euskadiko ordezkari instituzional eta I-DEko presidente Asís Canalesek, Artecheko CEO eta presidente Alexander Artetxek eta Tecnaliako Trantsizio Energetikoko zuzendari Jose Luis Elejaldek.

Horiez gain, ekitaldian izan dira, besteak beste, Eusko Jaurlaritzako Trantsizio Energetikoko sailburuorde Irantzu Allende, Bizkaiko Foru Aldundiko Ogasun eta Finantza Saileko diputatu Itxaso Berrojalbiz, i-DEko CEO Eva Mancera, Tecnaliako zuzendari nagusi Jesús Valero, Ikerlaneko zuzendari nagusi Ion Etxeberria, CIC energiGUNEko zuzendari nagusi Nuria Gisbert eta Basque Energy Clusterreko zuzendari nagusi José Ignacio Hormaeche.

Mikel Jauregi sailburuak adierazi duenez, “industria deskarbonizatzen ari da elektrifikazioaren bidez, eta, horretarako, garapen teknologiko berriak behar dira sareetan. Euskadik sare elektrikoen belaunaldi digital berria zuzentzeko ahalmen teknologikoak eta industrialak ditu. Grid4Industry proiektuak euskal industriak industria mundu-mailan elektrifikatzen laguntzea du helburu. Proiektu eraldatzaile hau industria gehiago, industria hobea eta emisio gutxiago uztartzearen adibiderik onena da”.

Iberdrolaren i-DE banaketa-enpresako presidente eta euskal konpainiako ordezkari instituzional Asís Canalesek nabarmendu duenez, “Grid4Industry proiektuak ekipamendu elektrikoko ondasunen euskal fabrikatzaileen balio-katea (Iberdrolak historikoki trakzionatu duena) bultzatuko du, milioi askoko erosketen bidez. Erosketa horiek, gainera, areagotu egingo dira taldeko sareetan inbertitzeko asmo handiko planarekin. Sareak elektrifikazioaren bizkarrezurra dira. Elektrifikaziorik gabe ez dago independentzia energetikorik. Sarerik gabe ez dago elektrifikaziorik”.

Ainara Basurkok nabarmendu duenez, “sare elektriko adimendunik gabe ez dago trantsizio energetikorik. Eta ongi prestatutako sarerik gabe, gure industriak izan izango ditu bere prozesuak elektrifikatu, emisioak murriztu eta energia berriztagarriak txertatu, eta izan izango da lehiakorra izan merkatu globaletan”. “Trantsizio energetikoaz ari gara, bai. Baina, batez ere, aberastasunaz, enpleguaz eta industriaren etorkizunaz ari gara”, amaitu du.

Proiektu eraldatzaile berri horrek euskal ekonomiarako bereziki garrantzitsua den sektore baten balio-katea indartuko du, hots, sare elektrikoen sektorearena. Sektore horrek 30.000 milioi euroko fakturazio orokorra du gaur egun, eta zuzeneko 6.000 enplegu baino gehiago sortzen ditu.

Grid4Industry proiektuaren hasierako inbertsioa 41 milioi euro ingurukoa izango da. Zenbatetsitakoaren arabera, datozen hiru urteetan guztizko inbertsioa 160 milioi eurotik gorakoa izango da, eta I+Gko eta garapen teknologikoko jardueretara bideratuko da hiru urte horietan. Proiektuak balio erantsi handiko eta digitalizazio energetikoari, berrikuntzari eta lehiakortasunari lotutako industria-ehun bat finkatuko du.

Proiektua Iberdrolak zuzenduko du, 62 enpresa trakzionatuko ditu guztira (haietako 29 ETEak izango dira), eta Basque Energy Cluster izenekoaren laguntza izango du. Gainera, Zientzia, Teknologia eta Berrikuntzaren Euskal Sareko hainbat zentro teknologikok eta eragilek hartuko dute parte, eta Tecnaliak, Ikerlanek eta CIC energiGUNEk zeregin nabarmena beteko dute. Industriaren, ezagutza-zentroen eta erakundeen arteko aliantza horrek indartu egiten du proiektuaren oinarri den lankidetza publiko-pribatuaren eredua.

Ekipamendu teknologiko berrien lehen proba pilotuak datorren urtean egingo dira, eta euskal industriaren elektrifikazio-beharrei erantzuteari emango zaio lehentasuna.

Kalitatezko enpleguan inpaktu handia duen proiektua

Grid4Industry proiektuak zuzeneko inpaktua izango du enpleguan. Proiektuaren barruan kualifikazio handiko zuzeneko 200 lanpostu eta zeharkako beste 320 sortzea aurreikusten da. Beraz, 520 enplegu berri izango dira guztira. Gainera, sare adimendunen euskal industrian sortutako kualifikazio handiko enpleguak % 25 igoko dira datozen hiru urteetan.

Proiektu eraldatzaile hori Bilbon kokatutako Global Smart Grids Innovation Hub izenekoak koordinatuko du. Espazio hori sare adimendunen inguruan berrikuntza, garapen teknologikoa eta industria-lankidetza biltzeko sortu da.

Proiektu eraldatzaile honek garapen teknologiko berriak bultzatuko ditu, GSGIHren V. urteurrenean, joan den apirilean, iragarri zirenei inbertsio berriak eginez. Horrela, beraz, Eusko Jaurlaritzak bat egin du Iberdrolak eta Bizkaiko Foru Aldundiak bultzatutako berrikuntzako Hub horrekin. Grid4Industry proiektua Smart Grids Innovation Hub-aren parte da. Plataforma horren helburua da Euskadi sare elektriko adimendunen arloan nazioarteko erreferentzia bihurtzea.

Grid4Industry proiektuarekin, industriarako sare elektrikoen belaunaldi digital berria Euskadin diseinatu, garatu eta balidatuko da, egungo beharrei erantzuteko eta etorkizunean industriaren elektrifikazioan sortuko diren aukeretan buru izateko asmoarekin.

Proiektu eraldatzaileak: 642 milioi euroko inbertsioa eta 3.622 enplegu

Orain arte, bost Proiektu Eraldatzaile aurkeztu dira, 642 milioi eurotik gorako hasierako inbertsioa dakartenak; haietatik, 368 milioi euro I+Gra eta garapen teknologikora bideratzen dira.

Bost proiektuetan, kalitatezko 3.622 lanpostu gehiago sortuko dira datozen urteetan. Eta euskal industria-ehuneko beste 153 enpresa —gehienak ETEak— trakzionatuko dituzte, herrialdeko zentro teknologikoen laguntzarekin.

Orain arte, honako proiektu eraldatzaile hauek aurkeztu dira: “Euskadiko abiazio jasangarri eta lehiakorrerako motor aeronautikoko arkitektura berriak” izenekoa, ROBOOST proiektua eta “Nanomedikuntza pertsonalizaturako hidrogel adimendunak”.

Lehenengoa, ITP Aero buru duena, Euskadik, trantsizio energetiko eta digitalean oinarrituta, etorkizuneko motor aeronautikoen belaunaldi berrien arloan rol garrantzitsua betetzeko asmoarekin sortu da. Proiektuak hurrengo hiru urteetarako 110 milioi eurotik gorako inbertsioa izango du, eta, haietatik, 60 milioi euro baino gehiago I+Gra eta teknologiaren garapenera bideratuko dira. Proiektuak 800 lanpostu sortzea ekarriko du —zuzeneko 200 enplegu eta zeharkako 600 enplegu—.

Bestalde, ROBOOST proiektuak 50 milioi euro inguruko hasierako inbertsioa dakar datozen hiru urteetan, eta, haietatik, 35 milioi euro baino gehiago I+Gko eta garapen teknologikoko jardueretara bideratuko dira. Ekimenak 500 lanpostu sortzea ekarriko du —zuzeneko 200 enplegu eta zeharkako 300 enplegu—, eta euskal industria-ehunaren nazioarteko lehiakortasuna indartzen lagunduko du. Proiektu Eraldatzaile horri esker, Euskadi erreferentziazko eragilea izango da nitxo emergente batean, hots, robotika sendoan eta doitasunezkoan.

Bestalde, “Nanomedikuntza pertsonalizaturako hidrogel adimendunak” proiektuak 72 milioi euroko hasierako inbertsioa dakar datozen hiru urteetan, eta, haietatik, 28 milioi euro inguru I+Gra eta garapen teknologikora bideratuko dira. Proiektua I+Med enpresak gidatuko du trakzio-industria gisa, eta kualifikazio handiko zuzeneko 232 lanpostu eta zeharkako 370 lanpostu sortuko dira 2026-2028 aldian. Beraz, 602 enplegu berri sortuko dira guztira. Proiektu Eraldatzaile hori abian jartzean, sare biofarmazeutiko aurreratu bat egituratu ahal izango da haren inguruan, Euskadi Europan nanomedikuntza pertsonalizatuko erreferentzia bihurtuko duena.

“Erregai berriztagarrien Hub-a” proiektu eraldatzaileak erregai berriztagarrien garapen teknologiko eta industrialaren Europako abangoardian kokatuko du Euskadi. Hub berri horrek Energy Intelligence Center (EIC) zentroan izango du basea, eta Euskadik erregai berriztagarrien garapena bultzatzeko dituen ahalmen teknologikoak, industrialak eta zientifikoak egituratuko ditu. Erregai sintetikoei, bioerregai aurreratuei, CO₂-aren inguruko teknologiei eta hidrogeno berriztagarriari lotutako funtsezko teknologiak garatu eta ezarriko dira.

Proiektuak ia 250 milioi euroko hasierako inbertsioa dakar datozen hiru urteetan, eta, haietatik, 85 milioi euro I+Gko eta garapen teknologikoko jardueretara bideratuko dira. Kualifikazio handiko zuzeneko 300 lanpostu eta zeharkako 900 lanpostu sortuko dira. Beraz, 1.200 enplegu berri izango dira guztira.

Proiektua Petronor enpresak zuzenduko du, Eusko Jaurlaritzaren eta Bizkaiko Foru Aldundiaren babesarekin, eta 51 enpresa trakzionatuko ditu (haietako 23 ETEak izango dira). Gainera, Basque Energy Cluster izenekoaren laguntza jasoko du. Gainera, Zientzia, Teknologia eta Berrikuntzaren Euskal Sareko (ZTBES) 4 zentro teknologiko inplikatuko ditu nagusiki.