Eusko Jaurlaritzak 2026. urterako industriarako lehen laguntza teknologikoak abian ditu
- I+G+b programak `Euskadi 2030 – Industria Plana´ren “industria hobea” ardatzaren barruan daude, eta oro har, datozen hilabeteetan argitaratuko diren beste hirurekin batera, 253,26 milioi euro dira guztira
Industria, Trantsizio Energetiko eta Jasangarritasun Sailak 2026 urtekoak diren eta euskal industriarako bideratutako lehen hiru laguntzak jarri ditu abian. Hirurak I+G+b arlokoak dira. Zehazki, eskatzaileak SPRI Taldearen plataformatik sartu ahal izango dira Hazitek, Elkartek eta Azpitek programetan, gaurtik aurrera.
Guztira, lehen hiru laguntza hauek 175 milioi euro izango dira. Hazitek programak 119 milioi edukiko ditu Proiektu Eraldatzaileak, Proiektu Estrategikoak eta Proiektu Lehiakorrak egiten laguntzeko; Euskadiko Zientzia, Teknologia eta Berrikuntzaren Euskal Sareko ikerketa, garapen eta berrikuntzako erakundeek Elkartek progamaren 47 milioi eskura izango dituzte, elkarlanean bultzatutako ikerketa egiteko; eta Azpitek programako 9 milioiekin ikerketako azpiegiturak eta ekipamendua erosi, instalatu, berritu eta eguneratzeko baliogarriak izango dira.
I+G+b programak Euskadi 2030 Industria Planaren “Industria hobea” ardatzaren barruan daude, eta oro har, datozen hilabeteetan argitaratuko diren beste hirurekin 253,26 milioi euro dira guztira.
Hazitek programak 119 milioi eurorekin lagunduko ditu ikerketa-proiektu eraldatzaile, estrategiko eta lehiakorrakHorrela, programa honek proiektu eraldatzaile, estrategiko eta lehiakorrak egitea bultzatzen du, guztiak ikerketa industrialaren, garapen esperimentalaren eta/edo saiakuntza eta esperimentazioko azpiegituren arloan, enpresa-sektorean eta `Euskadi 2030 – Industria Planean´ bildutako lehentasunezko esparru eta sektoreetan.
Deialdiaren zenbateko osotik 43.000.000 euro bideratuko dira izaera lehiakorreko proiektuak finantzatzeko, 50.000.000 euro proiektu estrategikoak finantzatzeko eta 26.000.000 euro proiektu eraldatzaileak finantzatzeko.
Diruz lagundu daitezkeen proiektu-tipologia hauei laguntzak ematea du helburu:
- Proiektu Eraldatzaileak
Diruz lagundu ahal izango dira ikerketa industrialeko, garapen esperimentaleko eta saiakuntza eta esperimentazio eraldatzaileko azpiegiturak eskuratzeko proiektuak, bereizgarritzat eta bakartzat jotzen direnak beren ezaugarri eta berezitasunengatik, Euskadi 2030 – Industria Planaren lehentasun estrategikoekin bat datozenak, eta IRABAZI eta HAZI sektore estrategikoetan lehiakortasuna hobetzea dakartenak, bai eta Euskadik potentzia industrial berritzaile gisa duen irudia hobetzea ere.
Proiektu eraldatzaile horiek Euskadin eragin ekonomiko eta estrategiko handia duen industria-lidergoan oinarritzen dira, eta eragin nabarmena sortzen dute euskal ekonomian. 20 milioi eurotik gorako inbertsio eta kostu operatiboekin, kalitatezko enplegua sortzea, enpresa-sarea indartzea edo inbertsioak erakartzea dakarten proiektuak behar dute izan.
Proiektu eraldatzaileek balio katean zehar trakzio efektuak edo beste sektore batzuetako enpresa eta eragileekiko zeharkako sinergiak sortzeko gaitasuna dute, Klusterren Erakunde Dinamizatzaileen (KED) laguntza izanik, ikuspegi integral eta interkonektatu baten bidez egitura eraldaketak sustatuz.
Proiektu eraldatzaileek berrikuntza-maila handia erakusten dute beren eremuko ezagutzaren edo teknologiaren egungo egoerari dagokionez, eta Zientzia, Teknologia eta Berrikuntzaren Euskal Sareko (ZTBES) eragileekin lankidetzan garatzen dira, helburuko sektorean edo merkatuan eraldatzeko ahalmena duten irtenbideak sortuz.
Era berean, diruz lagunduko dira I+G jarduerak, produktu, prozesu edo zerbitzu berriak edo hobeak lortzeko ezagutza erabilgarri berriak sortzera bideratutako proiektu eraldatzaileen saiakuntza- eta esperimentazio-azpiegiturak eskuratzea. Baita, teknologia eraldatzaile berriak integratzea, patente berriak sortzea eta oinarri zientifiko-teknologikoko enpresak sortzea ere (Startups).
- Proiektu Estrategikoak
Diruz lagundu ahal izango dira ikerketa industrialeko edo garapen esperimental estrategikoko proiektuak, Euskadi 2030 – Industria Planean estrategikotzat ezarritako sektoreetan kokatzen direnak, baldin eta Ikerketa eta Garapen Teknologiko eta Berrikuntzan lankidetza publiko-pribatua sustatzen badute. Euskal Autonomia Erkidegoko industria trakzio eragina bultzatu beharko dute eta enpresa txiki ertainen parte hartzea zein Horizonte Europa Programan sartzea erraztuaz.
Era berean, proiektu estrategikoetako I+G jarduerak babesten dira, produktu, prozesu edo zerbitzu berriak edo hobeak lortzeko ezagutza erabilgarri berriak sortzera bideratuta, bai eta teknologia estrategiko berriak integratzera, patente berriak sortzera eta oinarri zientifiko-teknologikoko enpresak sortzera ere (Startup-ak). Eta hori guztia enplegua sortzera eta euskal industria sarea dibertsifikatzera bideratuta dago, baita enpresa-lehiakortasuna hobetzera ere.
- Proiektu Lehiakorrak
I+G proiektu lehiakorrak dira industria-ikerketara edo garapen esperimentalera bideratutakoak, produktu, prozesu edo zerbitzu berriak garatzeko edo lehendik daudenak nabarmen hobetzeko direnak.
Elkartek
Programa honen bidez, Eusko Jaurlaritzak Euskadiko Zientzia, Teknologia eta Berrikuntzaren Euskal Sarean sartuta dauden ikerketa, garapen eta berrikuntzako erakundeek elkarlanean egindako ikerketa bultzatzen du, sektore estrategikoekin, teknologia giltzarriekin eta zeharkakoekin eta Euskadi 2030 Industria Planeko proiektu eraldatzaileekin bat egiten laguntzeko.
Azpitek
Azkenik, Azpitek programarekin, ikerketako azpiegiturak eta ekipamendua erostea, instalatzea, berritzea eta eguneratzea bultzatzen da, sektore estrategikoekin, teknologia giltzarri eta zeharkakoekin eta Euskadi 2030 Industria Planeko Proiektu Eraldatzaileekin bat egiten lagunduko duen ezagutza sortzea errazteko asmoarekin.
Laguntza horiek I+G+b garatzera eta erakunde zientifiko-teknologikoek etorkizunean emaitzak baliozkotu eta frogatzera bideratuta daude. Horretarako, onuradun izango dira Zientzia, Teknologia eta Berrikuntzaren Euskal Sarean egiaztatuta dauden foku anitzeko zentro teknologikoak. Azken helburua da lortutako emaitzen kalitatea indartzea eta haien inpaktu zientifiko-teknologikoa, ekonomikoa eta soziala maximizatzea.
