Euskadiko Parke Teknologikoa, duela 25 urtetik industria bioteknologikoaren polo, Progenika bezalako enpresei esker
Sektore bioteknologiko eta biosanitarioko Progenika enpresak (Grifols taldekoa) 25. urteurrena ospatu du Euskadiko Parke Teknologikoko Bizkaiko Campusean sortu zenetik. Eusko Jaurlaritzak duela mende laurden abian jarritako estrategia bati erantzuten dio Derion ezartzeak, industria-sektore horretako enpresak erakartzeko, eta gaur egun Euskadi gailentzen ari da sektore horretan. 1990eko hamarkadan areagotu egin zen biozientziei lotutako enpresen eta ikerketa-zentroen erakarpena, eta garapen hori Eusko Jaurlaritzaren, Bizkaiko Foru Aldundiaren eta Zamudioko eta Derioko udalen arteko lankidetzari esker egin ahal izan zen; izan ere, teknologia aurreratuko enpresak instalatzeko ingurune egokia sustatu zuten, eta Progenika enpresa horietako kide da, CIC bioGUNE, Oncomatrix, Rubió Metabolics edo CIT enpresekin batera.
Progenikaren 25. urteurreneko ekitaldian izan dira Mikel Jauregi Industria, Trantsizio Energetiko eta Jasangarritasuneko sailburua, Elixabete Etxanobe Bizkaiko ahaldun nagusia eta Esther Apraiz Derioko alkatea. Enpresaren aldetik, Antonio Martínez, Grifols Diagnostic-eko presidentea, eta Nacho Albia, Grifols-eko kontseilari delegatua.
“Euskadi nazioarteko erreferentzia da industria bioteknologikoan eta bio-medikuntzan, eta hor erreferentziazko ingurune bat nabarmentzen da: Parke Teknologikoa. Berrikuntza, ikerketa eta garapen teknologikoko gunea da hau, guztion ahaleginarekin eraiki duguna, eta gaur beste aurrerapauso bat ematen ari garena. Grifols Taldearen babesa duen enpresa batean gaude, zeinak bi hamarkada baino gehiago baitaramatza pazienteen ongizateari laguntzen, transfusio-medikuntzaren sektorea gidatzen mundu mailan”, nabarmendu du Industria sailburuak.
“Pandemiarekin zerbait ikasi bagenuen, gure gaitasun industrialak indartu behar ditugu, eta ezin gara hirugarren herrialdeen mende egon krisi garaietan. Progenika ikaskuntza horren adibide ona da. Derioko egoitza honetatik berrikuntza garrantzitsuak garatu dituzue, hala nola, COVID birusa detektatzeko test bat. Made in Euskadi teknologiaz eta garapenaz ari gara. Jarraituko dugu erakunde ezberdinen arteko lana eta lankidetza publiko-pribatua sustatzen Parte Teknologikoaren ahalmena indartzeko, eredu arrakastatsua izan delako”, amaitu du Jauregik.
