Euskadik Estatuko Bioteknologia azokarik garrantzitsuena hartuko du 2026an
Bartzelonan, urriaren 7tik 9ra egin den Biospain 2025 azokaren azken egunean jaso dute datorren urteko azoka antolatzeko lekukoa Jaione Ganzaráin, Eusko Jaurlaritzako Teknologia, Berrikuntza eta Eraldaketa Digitaleko sailburuordeak eta Cristina Mugica, Bizkaiko Foru Aldundiko Lurralde Lehiakortasunerako eta Kanpo Sustapenerako zuzendariak. 2026ko irailaren 29tik urriaren 1era egingo da Biospain azoka BECen.
Lekukoa hartzerakoan Sailburuordeak esan du ‘Plazer eta ohore handia da azoka hau datorren urtean Euskadin ospatzea. Eta ez da kasualitatea, 2002tik Euskal Autonomia Erkidegoak biozientzien eta bioteknologiaren aldeko apustu iraunkorra egin duelako, bereziki osasunari aplikatuta. Biozientziei eta bioteknologiari lotutako garapen sozioekonomikoarekin dugun konpromisoa erabat lerrokatuta dago Europako berrindustrializazioaren ikuspegiarekin, osasun sektorearen garrantzi geoestrategikoaren aitorpenarekin eta balio kate biosanitario osoan kanpoko mendekotasuna murrizteko beharrarekin.’
Bestalde, Cristina Mugicak azpimarratu duenez, “Biospain 2026 hartzea aukera handia da Bizkaiak eta Euskadik nazioartean duten posizionamendua indartzeko, lurralde berritzailea eta munduari irekia baita. Bizkaiko Foru Aldundian lan egiten dugu gure enpresek eta zentro teknologikoek nazioarteko foro handietan aktiboki parte har dezaten, aliantzak sortuz, inbertsioa erakarriz eta bioteknologian, osasunean eta ezagutzaren ekonomian ditugun gaitasunak proiektatuz. Biospain lehen mailako erakusleihoa izango da gure ekosistemaren ezaugarri diren talentua, ikerketa eta enpresa konpromisoa erakusteko ”.
Ekitaldian izan dira Silvia Labé, Biocat erakundeko Marketing, Komunikazio eta Adimen Lehiakorreko zuzendaria, Ion Arocena, Asebioko zuzendari nagusia, Idoia Muñoz, Basque Health Clusterreko zuzendaria eta Cristina Oyón, Spriko zuzendari nagusiaren albokoa, azokan parte hartu duten euskal enpresetako ordezkariekin batera.
Euskadi Basque Country standa Bartzelonan
Eusko Jaurlaritzak, Sprik eta BHC-Euskadiko Osasun Klusterrak stand bateratua izan dute Bartzelonan, Euskadi-Basque Country Innovation Land markapean. Euskal osasun ikerkuntzako Bioinstitutuekin, hau da Bioef, BioAraba, BioBizkaia, BioGipuzkoa eta Biosistemakekin batera, sektoreko zazpi enpresak osatu dute standa: BioComputing, Golden Gait Biotech, Hawk, Innoprot, Tad, Miramoon eta Ubikare. Enpresok euren parte hartzearen balorazio positiboa egin dute, hiru egunetan zehar hainbat harreman lotzea lortu baitute, azokan zehar antolatutako jardunaldi eta mahai inguruetan parte hartzearekin batera.
34 herrialde, 2.400 parte hartzaile, 1.065 erakunde, 250 erakusketari eta 4.600etik gora batzar, eta 76 inbertsio-erakundetako 140 inbertitzaile, hauek dira Biospain 2025 azokak eman dituen zenbakiak Bartzelonako Firan egin den azokan.
