Delteco, robotikarekin makina-erreminta eraldatzen duen enpresa
Delteco makina-erremintaren salerosketa eraldatzen ari den Zumaiako enpresa bat da. 54 urteko ibilbidea du eta hamarkada bat da robotekin beren kabuz lan egiten duten makinak eskaintzen dituela. Enpresak arintasuna eskaintzen die bezeroei, 50 makina inguruko stock iraunkorrari esker.
Enpresa 1971n sortu zuen Eibarren Esteban Aranbarrik, oraingo presidente Xabier Aranbarriren aitak, eta hasieratik dihardu makina-erremintaren salerosketan.
2019an lekualdatu zen Zumaiako oraingo kokalekura, Korta industrialdera. «Espainian makina-erreminta inportatzen duen enpresarik handiena gara, eta estatu mailan multinazional garrantzitsuen esklusibotasuna dugu, hala nola Koreako DN Solutions edo Alemaniako Hermle», azaldu dute Xabier Aranbarrik, presidenteak, eta Ainara Rodríguezek, Robotikako Negozioaren garapenaren arduradunak.
Zumaiako pabiloian berrogeita hamar produktu baino gehiagoko stocka dute, eta bertan mekanizazioko zentroak eta tornuak dituzte, baita elektroerosioko eta mandrinatzeko makinak ere. «Gure stock horrek gaur egun 50 makina inguru ditu, eta haiei esker oso bizkorrak gara bezeroek soluzioak eskatzen dizkigutenean».
Duela 9 urte, enpresak jauzi kualitatiboa eman zuen Robotikako Saila sortuta. «Geure balio erantsia da. Ingeniaritza osorik garatzen dugu eta makina robotarekin batera saltzen dugu; gure zedula automatizatu propioak garatu eta espazioak sortzen ditugu, robotak makinekin batera lan egiteko, gizakiek esku hartu gabe, eta horrek aukera ematen du eguneko 24 orduetan lan egiteko»
Bezeroaren neurrira egindako soluzioa da, eta horrek lehiakideetatik bereizten du. «4 hilabeteko lana da; bi hilabete gure enpresan muntaketa eta probak egiteko, eta beste bi bezeroarenean. Giltza eskurako proiektuak dira guztiak, bezeroaren neurrira eginak».
Deltecok, hornitzaile esklusiboa denez, Espainian eta Portugalen oinarritzen ditu salmentak. Plantilla 75 pertsonak baino gehiagok osatzen dute, eta ordezkaritzak ditu Bartzelonan, Madrilen, Levanten eta Portugalen. I+G gero eta garrantzitsuagoa da eta urteko fakturazioaren % 20-30 inguru bideratzen dute horretara (45 milioi euro inguru).
Enpresak urtean 150 makina saltzen ditu batez beste. Koreako DNS Solutions multinazionalarekin bakarrik, urtean 110 lortzen ditu. Robotikako alorrean, urtean 15 zedula automatizatu inguru fabrikatzen ditu, eta lan horrek «lan handia eta etengabe ikastea eskatzen du».
Etorkizunera begira, erronka nagusia automatizazioarekin lotuta dago. «Makinen erosketan jarraituko dugu oinarria izaten, baina robotikaren sailean hazi egin nahi dugu, bezeroek horren beharra dutela ikusten baitugu». Beste erroka bat talentua erakartzea da, eta robotika bezain alor teknologiko batean talentu hori mantentzea lortzea.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
