Weidmüller, elektronika, elektrizitate eta industria-automatizaziorako soluzioen fabrikatzailea
Weidmüller Euskadin presentzia duen enpresa da; zehazki, Derion (Bizkaia). Konpainiak konektibitate elektrikorako, elektronikarako eta industria-automatizaziorako soluzioak eskaintzen ditu. Bere jardunak energia, seinale eta datuen transmisioa hartzen du barne, baita industria-, energia- eta azpiegitura-inguruneetan informazioa jasotzea eta kudeatzea ere, sektore eta aplikazio desberdinetara egokituz.
175 urte baino gehiagoko historia duen Alemaniako enpresa baten parte da, eta elektronikan, konektibitatean eta industria-automatizazioan espezializatuta dago. Espainiaren kasuan, 1979an jarri zen martxan bere sare komertziala, eta lurraldeko hainbat eremuri ematen die zerbitzua, tartean iparraldeari (Nafarroa, Errioxa, Burgos eta Kantabria).
Euskadiko egoitzari dagokionez, lortutako mugarri aipagarrienen artean daude industria-automatizazioko proiektuetan parte hartzea eta produkzio-prozesuetan eraginkortasuna, konektibitatea eta digitalizazioa hobetzen laguntzen duten soluzioak ezartzea.
“Euskadin oso presente gaude automobilgintzara bideratutako makina-erremintaren sektorean, baita altzairutegietan, energia fotovoltaikoan, energia eolikoan, data center-etan, hidrogenoan, trengintzan, uraren kudeaketan, energia berriztagarrietan, IoT industrian eta azpiegituretan ere. Makineriaren aplikazioak ez ezik, energia, industria eta eraikuntza arloko azpiegiturak ere eskaintzen ditugu, konektibitateko eta Ethernet industrialeko soluzioak barne. Sektore askotan gaude, gure produktu-zorroa edozein industriatan aplika daitekeelako”, azaldu du Alex Pérez-Yarza Weidmüllerreko iparraldeko eremuko teknikari komertzialak.
Saltzen dituzten produktu nagusiak Snap-IN teknologia berridun bornak, erreleak, industria-konektibitatea eta automatizazio-soluzioak dira. Horien artean daude U-Control bezalako PLCak, U-Remote bezalako periferia deszentralizatuko sistemak, ethernet industriala (switchak eta routerrak, adibidez), eta industria-datuak jasotzera eta kudeatzera bideratutako soluzioak. “Espainiako estatuko egoitza nagusia Bartzelonan dago, eta handik garatzen dira ingeniaritza-soluzioak ere, bereziki energia fotovoltaikoaren arloan”.
Multinazionalak 5.700 langile inguru ditu mundu osoan, 80 herrialde baino gehiagotan saltzen du, eta urtean ia 1.000 milioi euroko fakturazioa du.
Euskadiko ordezkaritzak soluzio berritzaileak eskaintzen dizkie bezeroei industria-prozesuen automatizazioan, konektibitatean eta digitalizazioan.
I+G arloa funtsezkoa da Weidmüllerrentzat, “etengabe ari baikara produktuak berritzen, eta multinazionalaren barruan I+G arlo espezifikoa dugu”.
Etorkizunera begira, erronka nagusiak industria-automatizazioan hazten jarraitzea eta merkatua gehiago dibertsifikatzea dira, arreta berezia hidrogenoaren sektorean (besteak beste) jarriz.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
