Aracel proiektuak irtenbide berriak garatu ditu eraikuntzan energia-mendekotasuna murrizteko
CO2 emisioak murriztera bideratutako teknologia, produktu eta material berrien eskaeran laguntzea, bai eraikuntzako materialak ekoizteko etapan, bai aktibo eraikiak erabiltzeko fasean. Horixe da, haien zuzen ere, Belako Lanak buru duen Aracel proiektuaren helburu nagusia, eta, gainera, “energia-mendekotasuna murriztea eta eraikuntza-produktu eta -sistemetan baliabide materialen zirkulartasuna handitzea” du helburu, Alejandro Baranda Bizkaiko enpresako I+Gko arduradunaren hitzetan.
Hala, “lehengaien eta energiaren kontsumoa murrizteko eta CO2 gutxiago isurtzen laguntzeko” irtenbideak ikertzen eta garatzen ditu proiektuak, aitortu du Belako Lanak elkarteko ordezkariak. Beraz, eraikuntza- eta eraispen-hondakinen (EEH) baliabide material organikoen (poliestireno hedatua edo EPS) eta ez-organikoen (artile mineralak) zikloak ixteko irtenbide holistikoak ikertu nahi ditu. “Karbono-aztarna txikiagoko produktu-sorta berri bat garatu nahi dugu (mortero teknikoak eta EPS eko-panelak), birgaitze energetikorako isolamendu-sistemetan aplikatzeko”, nabarmendu du.
Aracelek Europar Batasunak ezarritako helburuari lagundu nahi dio, hau da, 2050. urtean klima-neutraltasuna lortzeko helburuari. Helburu horrekin bat etorriz, hurrengo urteetan birgaitze energetikoaren jarduera nabarmen handituko dela aurreikusten da, eta horrek kanpoaldeko isolamendu-sistemen (SATE) erabilera eta salmenta areagotzea ekarriko du. “Proiektuan SATE sistema batean integratu daitezkeen karbono aztarna baxuko bi produkturen garapena ikertu da: karbono aztarna baxuko mortero bat eta EPS isolamenduko eko-panelak”, azpimarratu du Alejandro Barandak.
Karbono-aztarna murriztea
Hala, morteroen diseinuan karbono-aztarna murrizteko irizpideak sartzen dira, zementuaren ordez artile mineralen frakzio birziklatuetatik datozen baliabide mineral tratatuak erabiliz. Eta EPS isolamenduko eko-panelek kanpoaldetik isolamendu termikoko soluzio bat eskaintzen dute, ingurumen-inpaktu txikiagoarekin. Proiektuan garatutako produktuak merkatu hauetara bideratzen dira: “birgaitze energetikoaren merkatua, SATE sistemen merkatua, bigarren mailako lehengaien merkatua eta trazabilitate-sistemen merkatua”, adierazi du.
Belako Lanak elkarteaz gain, Ogerko, Langa Poes eta Serikat Consultoría e informática elkarteek ere parte hartu dute proiektuan. Zientzia, Teknologia eta Berrikuntzaren Euskal Sareko zenbait eragileren laguntza izan dute, hala nola Tecnalia R&I eta Build Inn euskal eraikuntza-klusterrarena. Guztira, hogeita hamar bat lagun aritu dira proiektuan lanean.
Proiektuaren aurrekontu osoa 1,45 milioi eurokoa izan da, eta SPRI Taldearen Hazitek laguntza-programaren eta Europar Batasunaren baterako finantzaketa jaso du, 2021-2027ko Eskualde Garapeneko Europako Funtsaren (EGEF) bidez.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
