Licores Barañano, nazioartekotzera jauzi egin duen mikroETEa
Licores Barañano Amurrion kokatuta dagoen mikroETEa dago eta familiako bosgarren belaunaldia ari da bertan lanean. Neurri txikia duen arren, duela hiru urtetik nazioartekotzearen aldeko apustua egin du, bezeroentzat kalitatezko eta pertsonalizatutako eskaintzaren bidez.
Egungo enpresa 1989koa da, baina enpresa-proiektu honen jatorria 1831koa da. Izan ere, ordu hartan, egungo gerente den Gaizka Barañanoren birraitonak likoreak eta bermutak produzitzeko enpresa sortu zuen XVIII. mendean.
«Gure bereizgarri nagusiak familia-tradizioa, bezero bakoitzarentzako neurrira egindako pertsonalizazioa eta kalitatea dira», azaldu du Gaizka Barañanok. «100 puntutik 93ko puntuazioa lortu dugu Peñín, Verema edo World Vermouth Awards gida espezializatuetan, besteak beste. Azken urteotan, negozio-bolumena handitzean baino gehiago, kalitatean jarri dugu arreta».
Merkatuaren bilakaera ikusita, enpresak nazioartean ere ezagunak diren bermuten lerroaren alde egin du. «Hiru edo lau urteko tartean, nazioarteko merkatuari zuzendutako lerroa ireki dugu, eta esparru horretan gehiago baloratzen da kalitatea». «Dagoeneko hasi dugu sektoreko beste enpresa batzuekin lankidetza nazioarteko merkatuetan sartzeko».
Gaur egun, Licores Barañanok hamabost bat produktu merkaturatzen ditu, likoreen eta bermuten artean. Horien artean nabarmentzekoak dira «Eskoziako whisky-upel batean zahartutako bermuta. Horrek ukitu ketua ematen dio, eta bazkalostean ere kontsuma daiteke, ez aperitibo gisa bakarrik»; eta «haritz gorrizko upelean zahartuko patxarana. Gainera, gu gara patxarana modu horretan ontziratzen duen enpresa bakarra. Egurraren ñabardura bereziak ematen dizkio patxaranari, eta maila bat gorago eramaten du. Eta bermutak izandako arrakasta ikusita, eskaintza bermut zuriarekin osatu dugu». Upelean zahartutako bermuta eta patxarana produktu berritzaileak dira, merkatuan parekorik ez dutenak.
Onlineko salmenta
Era askotako bezeroak dituzte: atzerriko inportatzaileak, estatu mailako banatzaileak eta jatetxeak… Baina onlineko salmenta ere egiten dute webgune bidez. Nazioartekotzeari ekin ziotenetik hiru urte baino igaro ez diren arren, esportazioak dagoeneko fakturazioaren % 5 dira. «Eta ehuneko hori handitzea espero dugu beste enpresa batzuekin elkarlanean garatuko dugun proiektuari esker. Nazioarteko azoketara eta herrialde jakin batzuetara (Mexikora, besteak beste) zuzenduta antolatutako misio komertzialetara joaten jarraituko dugu». Atzerriko bere merkatu nagusiak Ingalaterran, Alemanian, Mexikon eta Frantzian daude.
Estrategiaren barruan dago, halaber, Euskadi barruan «indartsuago bihurtzea, gertutasunagatik, produktuaren ezagutzagatik eta hemen dugun aberastasun gastronomikoagatik».
Gaur egun, enpresa bizpahiru lagunek osatzen dute, eta urteko fakturazioa 400.000 euro ingurukoa da. Azken urteetan, gainera, % 3 eta % 4 arteko hazkunde iraunkorrak izan ditu. Berrikuntzak ere garrantzi handia du enpresan, eta I+G proiektuak garatzen ari dira «aperitibo berriak ahalik eta modu naturalenean sortzeko, lehentasuna beti lehengaiaren kalitatean eta hurbiltasunean jarrita».
Nazioartekotzea areagotzeko planen barruan, SPRI Taldearen laguntzak eskatzeko asmoa dute, enpresentzat eskuragarri dauden programa ezberdinen bidez. Etorkizunera begirako erronkei dagokienez, aperitiboen proiektu berritzaile hori ezartzea eta «negozio-bolumena handitzean baino gehiago kalitatearen alde lanean jarraitzea» daude.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
