Ekomodok hondakinak diseinu jasangarri bihurtzen ditu
Hondakinak diseinu bihurtzea. Hori da Ekomodo euskal enpresaren abiapuntua, birziklatzea berrikuntzarako eta diseinu jasangarrirako modu bihurtu baitu bere nortasun-zigilua. Donostian du egoitza eta Beasainen du bulegoa. Baztertutako plastikoak produktu funtzional, estetiko eta ingurumenarekin konprometitu bihurtzen ditu. Marka bat izateaz gain, ekonomia zirkularra ulertzeko modu berri bat da Ekomodo: ez joera bat bezala, premiazko behar eta aukera sortzaile bat bezala baizik.
Ekomodoren ideia Eko-RECen I+G+b sailean sortu zen, Andoainen kokatutako PET birziklatze plantan. Bertan ikuspegi argiko proiektua sortu zen: birziklapenak ez zuen bidearen amaiera izan behar, zerbait berriaren hasiera baizik. Taldeak ulertu zuen plastikozko botilak edo arrantza-sareak bezalako materialek bigarren bizitza bat izan zezaketela. Eraldatu ondoren, diseinua eta merkatu-balioa duten objektu erabilgarriak izango lirateke. 2019an, ikuspegi hori enpresa bihurtu zen. Sortzaileek ibilbide independente bati ekitea erabaki zuten, ekoizteko eta kontsumitzeko beste modu bat posible zelakoan. Ordutik, jasangarritasuna, estetika eta erabilgarritasuna eskutik helduta joan daitezkeela erakusteko lan egin dute.
Hiru lerro, filosofia bera
Ekomodo Sustainable Company enpresak bere negozio-lerroak kudeatzen dituen matrize gisa jokatzen du. Ildo bakoitzak ikuspegi komun bati erantzuten dio: hondakin plastikoetatik abiatuta produktuak sortzea, ingurumen-inpaktua murriztuz eta balio erantsia sortuz. Lehenengo lerroak enpresaren izen bera du, eta ehungintzako eta eguneroko gaiak biltzen ditu: motxilak, zorroak, botila berrerabilgarriak, nezesereak… Horiek guztiak material birziklatuz eginak daude eta irauteko pentsatuak. Azken bezeroari (online denda eta marketplace-n bidez) zein balio partekatuak dituzten produktu pertsonalizatuak bilatzen dituzten denda fisiko eta enpresei saltzen zaizkie.
Bigarren ildoak, Mertx izenekoak, enpresen merchandising jasangarriaren eskaera gero eta handiagoari erantzuten dio. Hemen, Ekomodok banatzaile gisa jokatzen du: produktu pertsonalizatuak hautatzen ditu, bere marka eraman ez arren, jasangarritasun-irizpideak (material birziklatu, organiko edo ziurtatuen erabilera, adibidez) betetzen dituztenak eta markei haien komunikazioa narratiba arduratsu batekin lerrokatzeko aukera ematen dietenak.
Hirugarrena, Altzariak, agian ukigarriena da: plastikozko hondakinez (botila-tapoiez, adibidez) egindako bankuak, paperontziak, mahaiak edo eserlekuak. Prozesua zirkularra da: bezeroek berek (udalek, ikastetxeek edo enpresa pribatuek) haien hondakinak jaso eta bidaltzen dituzte, eta horiek pieza funtzional eta iraunkor bihurtzen dira. Espazio publikora itzultzen dira zikloa itxiz.
Urte gutxiren buruan, bere ingurumen-konpromisoekin koherenteak diren irtenbideak bilatzen dituzten erakunde, marka eta administrazioen agendan sartzea lortu du. Eusko Jaurlaritza, Gipuzkoako Foru Aldundia, CAF, Irizar, Sanitas, L’Oréal Paris edo Real Sociedad bezalako erakundeekin lankidetzan aritu da. Guztira, 300 enpresa baino gehiagorekin lan egin du eta zazpi herrialde baino gehiagotara bidali ditu produktuak; bere fakturazioaren % 10 Estatutik kanpokoa da.
Bere taldea txikia da, baina diziplina anitzekoa. Aritz Gartzia, sortzaileetako bat, eta Sara Gamarra, eragiketen arduraduna, proiektuaren buru dira eta arlo guztiak koordinatzen dituzte, etengabeko berrikuntzari eta enpresa sortu zuten balioekiko koherentziari begira. Inplantalariak bezalako programak eta SPRIren Zabaldu laguntzak eman dioten sustatzeari esker hazi ahal izan da. Horiek berrikuntzak egiteko eta nazioartean hedatzeko gaitasuna indartu dute.
Jasangarritasuna ez da helburu finko bat, etengabe aldatzen ari den bide bat baizik. Enpresak ondo daki hori, eta, horregatik, berritzeko, araudi aldakorretara egokitzeko eta merkatuaren beharrei aurrea hartzeko bide berriak aztertzen jarraitzen du. Arreta berezia jartzen du birziklatzearen industrializazioan, erosketa publiko berdean edo hondakinen merkatuko prezioen mugimenduetan. Faktore horiek guztiak modu koherentean eta eragin positiboarekin hazten jarraitzeko aukerak dira.
Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
